2 MAHOSI 11

₁Musi Athalia mme a khosi Ahasia a tshi pfa uri ṅwana wawe o vhulawa, a mbo ḓi vhulahisa vhakololo vhoṱhe vho salaho. ₂We a ponyoka ndi Juasi ṅwana wa Ahasia fhedzi. O vha a tshi ṱoḓa u vhulawa na vhaṅwe, hone a lamukiswa nga makhadzi wawe Jehoshiba, ṅwananyana wa khosi Jehoramu, we a dovha a vha khaladzi ya Ahasia. Jehoshiba a mu dzhia na muleli wawe a vha dzhenisa kamarani ya u eḓela thembeleni, a mu dzumba uri Athalia a si mu vhone, ndi zwe a si vhulawe. ₃Jehoshiba a mu londola, a mu dzumba na muleli wawe thembeleni ya Muṋe washu ha vhuya ha fhela miṅwaha miṱanu na muthihi, musi Athalia a tshi khou vhusa shango.

₄Hone nga ṅwaha wa vhuṱanu na vhuvhili tshifhe Jehoyada a ramba magota ane a langa vhalindakhosi na vhalindi vha pfamo, a ita uri vha ḓiswe khae thembeleni ya Muṋe washu. A vhofha mulanga navho, a vha anisa thembeleni ya Muṋe washu. Ndi hone a tshi vha sumbedza Juasi. ₅A vha laya a ri, “Ni ite hezwi: Inwi vhane na shuma nga Sabatha, tshigwada tshithihi kha zwiraru tshi linde pfamo, ₆tshiṅwe tshigwada tshithihi kha zwiraru tshi linde Khoro ya Suru, tshiṅwe tshigwada tshithihi kha zwiraru tshi linde khoro i re murahu ha vhaṅwe vhalindi. ₇Zwigwada zwivhili zwine zwa si vhe mushumoni nga Sabatha zwi linde thembele zwi tsireledze khosi. ₈Ni linde khosi Juasi no fara mafumo, ni vhe nae hoṱhe hune a ya. Ane a vhuya a sendela tsini haṋu a vhulawe.”

₉Magota vha thetshelesa zwe tshifhe Jehoyada a vha laya, vha ḓisa vhanna vhe vha vha vhe navho khae, vhane vha si shume nga Sabatha na vhane vha shuma. ₁₀Vhalangammbi a vha ṋea mafumo na zwiṱangu zwe zwa vha zwi zwa khosi Dafita, zwo vhulungwaho thembeleni ya Muṋe washu. ₁₁Vhalindi avho vha ima vho tanga khosi, muṅwe na muṅwe a fara tshihali, tsini ha aḽiṱari na thembele, u bva tshipembe ha thembele u ya devhula hayo. ₁₂Jehoyada a ḓisa Juasi ṅwana wa khosi, a vhea khare ya vhuhosi ṱhohoni yawe, a mu ṋea ḽiṅwalo ḽa vhuṱanzi, a ḓivhadza uri ndi ene khosi. Vha mu ḓodza mapfura, vhathu vha vhanda zwanḓa vha ṱavha mukosi vha luvha vha ri, “Thovhele nga a lalame!”

₁₃Mufumakadzi Athalia a pfa mukosi une wa khou ṱavhiwa nga vhalindi na vhathu, a ya kha vhathu thembeleni ya Muṋe washu. ₁₄A tshi sedza, a vhona khosi yo ima tsini ha phuphu muṋangoni wa thembele, hu tshi tevhedzwa maitele. Magota na vhalidzi vha phalaphala vho vha vhe tsini ha khosi, vhaḓivhalea vhoṱhe vha shango vho vha vha tshi khou pembela vha tshi lidza phalaphala. Athalia a kherukanya zwiambaro zwawe a ṱavha mukosi a ri, “Ndi tshimbevha itshi! Ndi tshimbevha!”

₁₅Tshifhe Jehoyada a laya vhalangaḓana vhe vha vha vha tshi langa dzimmbi a ri, “Mu bviseni nga vhukati ha miduba mivhili ya vhalindi, ni vhulahe muṅwe na muṅwe ane a mu tevhela.” Ndi uri tshifhe o vha o ri, “A songo vhulawa thembeleni ya Muṋe washu.” ₁₆Vha mu fara, vha mu isa pfamoni, vha mu vhulahela Khoroni ya Bere.

₁₇Zwino tshifhe Jehoyada a ita uri khosi Juasi na vhathu vha vhofhe mulanga na Muṋe washu uri vha ḓo vha vhathu vha Muṋe washu, a dovha a ita uri khosi i vhofhe mulanga na vhathu. ₁₈Vhathu vhoṱhe nga shango vha ya thembeleni ya Baali vha i thutha vha i phusukanya. Vha thutha na dziaḽiṱari na zwitungulo, vha ita na u vhulaha Mathani tshifhe wa Baali henefho phanḓa ha aḽiṱari dzenedzo.

Zwino tshifhe Jehoyada a vhea vhalindi thembeleni ya Muṋe washu. ₁₉Jehoyada na magota na vhalindakhosi na vhalindi vha pfamo na vhaḓivhalea vhoṱhe vha shango vha fhelekedza khosi i tshi bva thembeleni ya Muṋe washu i tshi ya pfamoni, vha dzhena nga nḓila ya khoro ya Vhalindi. Ndi hone khosi i tshi dzula vhudzuloni hayo kha khuluṋoni ya musanda. ₂₀Vhathu vhoṱhe nga shango vha pembela, ha vha na mulalo muḓini nge Athalia a vha o vhulawa pfamoni.

₂₁Juasi o vha khosi e na miṅwaha miṱanu na mivhili.