2 MAHOSI 10

₁Zwino muḓini wa Samaria ho vha hu na vhana vha vhatuka vha 70 vha nnḓu ya Ahaba. Jehu a ṅwala maṅwalo a a rumela Samaria, a ya kha magota a Jesriele na kha vhahulwane na kha vhaṱunḓeli vha vhana vha Ahaba, a ri, ₂“Vhunga vhana vha vhatuka vha muṋe waṋu ni tshi dzula navho nahone ni na dzigariki na dzibere na muḓi wo tangwaho nga mitsheṱo na zwihali, zwenezwo ni tshi tou ṱanganedza luṅwalo holu, ₃ni mbo ḓi nanga ṅwana wa mutuka a fhiraho vhoṱhe o teaho kha vhana vha muṋe waṋu, ni mu vhee kha khuluṋoni ya khotsi awe, ni lwele nnḓu ya muṋe waṋu.”

₄Hone vha tshenuwa, vha ri, “Arali mahosi mavhili o vha a sa koni u imedzana nae, riṋe ri nga zwi kona hani?”

₅Ndi hone gota ḽine ḽa langa pfamo na muvhusi wa muḓi na vhahulwane na vhaṱunḓeli vha tshi swikisa mafhungo ha Jehu vha ri, “Riṋe ri vhalanda vhavho, ri ḓo ita zwoṱhe zwine vhone vha amba. A ri nga vhuyi ra vhea muṅwe muthu a vha khosi, vhone nga vha ite zwine vha vhona zwo fanela.”

₆Ndi hone Jehu a tshi dovha a vha ṅwalela luṅwalo a ri, “Arali ni tshi ima na nṋe, ni tshi ḓo nthetshelesa, ḓisani ṱhoho dza vhana vha vhatuka vha muṋe waṋu fhano matshelo nga tshifhinga tshenetshi, ni dzi ḓise fhano Jesriele.”

Zwino vhaḽa vhakololo vha 70 vho vha vhe na vharangaphanḓa vha muḓi vha tshi khou vha alusa. ₇Musi luṅwalo ulwo lu tshi swika, vhanna avho vha dzhia vhakololo vha vhatuka vhoṱhe vha 70 vha vha vhulaha. Vha dzhia ṱhoho dzavho vha dzi longa zwirunduni, vha dzi isa ha Jehu e Jesriele. ₈Musi muḓinḓa a tshi swika, a vhudza Jehu a ri, “Vho ḓisa ṱhoho dza vhakololo.”

Jehu a ri, “Vha vheeni nga zwiṱhopho zwivhili muṋangoni wa khoro ya muḓi ḽi vhuye ḽi tshe.”

₉Ḽi tshi tsha Jehu a bvela nnḓa, a ima phanḓa ha vhathu vhoṱhe a ri, “Inwi a ni na mulandu. Ndi nṋe we nda itela muṋe wanga tshimbevha nda mu vhulaha, hone we a vhulaha vhoṱhe avha ndi nnyi? ₁₀Zwino zwi ḓivheni uri na ipfi na ḽithihi ḽe Muṋe washu a amba nga nnḓu ya Ahaba a ḽi nga weli fhasi. Muṋe washu o ita zwe a fulufhedzisa nga mulomo wa muḓinḓa wawe Elia.” ₁₁Ndi hone Jehu a tshi vhulaha vhoṱhe vha nnḓu ya Ahaba vha re Jesriele khathihi na magota awe na khonani dzawe na vhotshifhe vhawe, ha si sale na muthihi wawe.

₁₂Jehu a takuwa Jesriele a livha Samaria. Nḓilani, fhethu hune ha pfi Mishashani ya Vhalisa, ₁₃a ṱangana na mashaka a khosi Ahasia wa Juda, a vha vhudzisa a ri, “Ni vhonnyi?”

Vhone vha ri, “Ri mashaka a Ahasia, ri khou ya Jesriele u resha vhana vha mufumakadzi Jesebele na nnḓu ya musanda.”

₁₄Jehu a vhudza vhanna vhawe a ri, “Vha dzhieni vha tshi khou tshila!” Ndi hone vha tshi vha dzhia vha tshi khou tshila, vha vha vhulaha tsini na bidzi ya Mishasha ya Vhalisa. Vhoṱhe vho ṱangana vho vha vhe 42, ha si sale na muthihi.

₁₅Jehu a dovha a takuwa, e nḓilani a ṱangana na Jonadaba ṅwana wa Rekhaba, a mu resha a ri, “Nṋa ni a anḓana na nṋe unga nṋe ndi tshi anḓana na inwi? Ni a fulufhedzea?”

Jonadaba a fhindula a ri, “Ndi ima navho.”

Jehu a ri, “Arali zwo ralo nkhaḓeni.” Vha khaḓana, Jehu a mu namedza gariki. ₁₆Jehu a ri, “Nga ri ṱuwe roṱhe ni yo zwi vhona nga aṋu maṱo uri ndi lwela hani Muṋe washu.” Vha namela vhoṱhe gariki vha ya Samaria. ₁₇Musi Jehu a tshi swika Samaria, a vhulaha vhoṱhe vha nnḓu ya Ahaba vho salaho henefho, a vha lozwa, nga he Muṋe washu a amba na Elisha.

₁₈Jehu a kuvhanganya vhathu vhoṱhe a vha vhudza a ri, “Khosi Ahaba o vha a tshi luvha Baali zwiṱuku, nṋe ndi ḓo mu luvha zwihulu. ₁₉Zwino vhidzani vhaporofita vhoṱhe vha Baali na vhoṱhe vha mu luvhaho na vhotshifhe vhawe vhoṱhe. Ni vhone uri hu si vhuye ha sala muthu, ngauri ndi khou ṱoḓa u ṋekedza Baali tshiṱhavhelo tshihulu. Ane a si vhe hone u ḓo vhulawa.” Hone tsho vha tshi tshimbevha tsha uri a kone u lozwa vhane vha luvha Baali.

₂₀Jehu a ri, “Ḓivhadzani ḓuvha ḽa vhuṱambo ha Baali.” Ḓuvha iḽo ḽa mbo ḓivhadzwa. ₂₁Jehu a ḓivhadza Israele ḽoṱhe, vhoṱhe vha no luvha Baali vha ḓa, ho vha hu si na na muthihi a siho. Vha kuvhangana thembeleni ya Baali, ya vhuya ya tou ḓala ya si tsha vha na vhupfelo ha mare. ₂₂Jehu a vhudza tshifhe ane a londola phuraphura a ri, “Ḓisani phuraphura ni dzi fhe vhoṱhe vhane vha luvha Baali.” A vha ḓisela. ₂₃Ndi hone Jehu na Jonadaba ṅwana wa Rekhaba vha tshi dzhena thembeleni ya Baali. Jehu a vhudza vhane vha luvha Baali a ri, “Sedzani ni vhone uri hu songo dzhena vha luvhaho Yahavee fhano, hu dzhene vhane vha luvha Baali fhedzi.” ₂₄Ndi hone vha tshi dzhena uri vha ṋekedze zwiṱhavhelo na nduvho dzi fhiswaho. Zwino Jehu o vha o vhea vhanna vha 80 nnḓa ha thembele a vha laya a ri, “Arali muṅwe waṋu a litsha muṅwe wa vhanna vhane nda ri ni vha vhulahe a ponyoka, u ḓo lifha nga ṱhoho yawe.”

₂₅Musi Jehu a tshi tou fhedza u ṋekedza tshiṱhavhelo tshi fhiswaho, a mbo ḓi vhudza vhalindi na magota a ri, “Dzhenani ni vha vhulahe, ni songo vhuya na litsha na muthihi a shavha.” Vha vha rema nga mapanga vha wela fhasi. Vhalindi na magota vha hwala zwitumbu vha zwi laṱa nnḓa, vha konou dzhena zwifhoni zwa ngomu thembeleni ya Baali. ₂₆Vha bvisa matombo a zwitungulo thembeleni ya Baali, vha i fhisa. ₂₇Vha thutha tombo ḽa u hulisa Baali, vha wisa thembele ya Baali, vhathu vha i ita bunga, na ṋamusi.

₂₈Jehu o fhelisa zwa u luvha Baali kha ḽa Israele nga u ralo. ₂₉Naho zwo ralo ho ngo laṱa vhuvhi ha Jerobiamu ṅwana wa Nebati, we a ita uri Vhaisraele vha tshinye nga u luvha mbohwana dza musuku dzi re Bethele na Dani.

₃₀Muṋe washu a vhudza Jehu a ri, “Vhunga wo ita zwi re zwone, wa khunyeledza zwe nda vha ndi tshi funa u ita nnḓu ya Ahaba, vhaḓuhulu vhau vha ḓo vha mahosi a Israele u vhuya u swika kha murafho wa vhuṋa.” ₃₁Hone Jehu ho ngo thetshelesa mulayo wa Muṋe washu Mudzimu wa Israele nga mbilu yawe yoṱhe. Ho ngo laṱa vhuvhi ha Jerobiamu we a ita uri Vhaisraele vha tshinye.

₃₂Misi yeneyo Muṋe washu a thoma u fhungudza shango ḽa Israele. Hazaele wa Aramu a kunda Vhaisraele shangoni ḽavho ḽoṱhe ₃₃vhubvaḓuvha ha Jorodani shangoni ḽoṱhe ḽa Giliadi, dzinguni ḽa Gadi na ḽa Rubeni na ḽa Manase, u bva muḓini wa Aruere mulamboni wa Arinoni u buḓekanya shango ḽa Giliadi u swika Bashani.

₃₄Mafhungo maṅwe a Jehu na zwoṱhe zwe a ita na vhuhali hawe o ṅwalwa buguni ya Histori ya Mahosi a Israele. ₃₅Jehu a dzama, a swiṱwa Samaria, ṅwana wawe Juahasi a vha khosi vhudzuloni hawe. ₃₆Jehu o vhusa Israele e Samaria a fhedza miṅwaha ya 28.