2 MAHOSI 12

₁Nga ṅwaha wa vhuṱanu na vhuvhili wa muvhuso wa Jehu khosi ya Israele, Juasi a vha khosi ya Juda, a vhusa e Jerusalema a fhedza miṅwaha ya 40. Mme awe o vha a tshi pfi Tsibia, a tshi bva muḓini wa Bierisheba. ₂Juasi o ita zwe zwa vha zwi tshi takadza Muṋe washu misi yoṱhe tshifhe Jehoyada a tshi kha ḓi mu laya. ₃Naho zwo ralo ho ngo thutha zwitembele zwa zwikwarani, vhathu vha ḓi ṋekedza zwiṱhavhelo vha fhisa zwioro henefho.

₄Juasi a vhudza vhotshifhe a ri, “Kuvhanganyani tshelede yoṱhe ya nduvho khethwa ine ya ḓiswa thembeleni ya Muṋe washu, na mithelo ine ya kuvhanganywa hu tshi vhalwa vhathu, na tshelede i no bviswa nga vhathu vhe vha tou fulufhedzisa, na tshelede ine muthu a tou bvisa nga u funa hawe a i ṋea thembele. ₅Tshifhe muṅwe na muṅwe nga a ṱanganedze tshelede i tshi bva kha mukuvhanganyi, i shume u vusa ho tshinyalaho thembeleni.”

₆Huno nga ṅwaha wa 23 wa muvhuso wa khosi Juasi vhotshifhe vho vha vha sa athu vusa thembele. ₇Ndi zwe khosi Juasi a vhidza tshifhe Jehoyada na vhaṅwe vhotshifhe a vha vhudzisa a ri, “Ndi mini ni sa vusi ho tshinyalaho thembeleni? Ni songo tsha dzhia tshelede kha vhakuvhanganyi vhayo na dzula nayo, ni i ḓise uri i vuse thembele.” ₈Vhotshifhe vha tenda uri a vha tsha ḓo kuvhanganya tshelede i tshi bva kha vhathu na uri a vha tsha ḓo vusa thembele vhone vhaṋe.

₉Jehoyada a dzhia bogisi, a phula buli kha tshitibo tshaḽo, a dzhia bogisi iḽo a ḽi vhea tsini ha aḽiṱari thungo ya tshauḽa musi muthu a tshi dzhena thembeleni ya Muṋe washu. Vhotshifhe vhe vha vha vha tshi linda muṋango vha dzhia tshelede yoṱhe ye ya ḓiswa thembeleni ya Muṋe washu vha i longa ngomu ha iḽo bogisi. ₁₀Musi vha tshi vhona uri afho bogisini ho no vha na tshelede nnzhi, muṅwaleli wa musanda na tshifhe muhulu vho vha vha tshi ḓa vha dzhia iḽa tshelede ye ya ḓiswa thembeleni ya Muṋe washu, vha i vhea nga zwiṱhopho vha i kala. ₁₁Musi tshelede yo no kalwa, vha i ṋea vhalavhelesi vha mushumo uyo wa u vusa thembele. Vha dzhia iyo tshelede vha holela vhavhaḓi na vhafhaṱi vha u lugisa thembele ya Muṋe washu, ₁₂na vhafhaṱi vha mitsheṱo na vhavhaḓi vha matombo. Vha renga matanda na matombo a u fhaṱa uri thembele ya Muṋe washu i lugiswe, vha lifha na dziṅwe tshinyalelo dza u lugisa thembele. ₁₃Tshelede yo ḓiswaho thembeleni a yo ngo shuma u ita ndongo dza siliva kana zwiṱunyathambo kana ndilo dza u handulula kana dziphalaphala kana muṅwe mudzio wa musuku kana siliva wa thembele ya Muṋe washu, ₁₄yo vha ya u holela vhashumi vhe vha shuma ngayo u lugisa thembele. ₁₅A vho ngo vhuya vha ṱoḓa vhuṱanzi kha vhe vha vha ṋekedza tshelede iyo uri vha holele vhashumi ngayo, ngauri avho vho vha vha tshi fulufhedzea. ₁₆Tshelede ya nduvho dza tshipfumelo na nduvho dza vhutshinyi a yo ngo ḓiswa thembeleni ya Muṋe washu, yo vha ya vhotshifhe.

₁₇Nga tshifhinga tshenetsho Hazaele khosi ya Aramu a gonya a yo dia muḓi wa Gathi a u kunda, a konou rembulutshela u yo dia Jerusalema. ₁₈Huno Juasi khosi ya Juda a dzhia thundu khethwa yoṱhe ye vhokhotsi awe mahosi a Juda, Josafati na Jehoramu na Ahasia vha dzi kumedza Mudzimu, na nduvho dze ene muṋe a kumedza Mudzimu, na musuku woṱhe we wa wanala mbulungeloni dza thembele ya Muṋe washu na pfamoni ya musanda, zwenezwo a luvha Hazaele khosi ya Aramu ngazwo. Ndi hone Hazaele a tshi ṱuwa Jerusalema.

₁₉Maṅwe mafhungo a khosi Juasi na zwoṱhe zwe a ita o ṅwalwa buguni ya Histori ya Mahosi a Juda.

₂₀Magota a khosi Juasi vha mu itela tshimbevha, vha mu vhulaha fhethu hune ha pfi Bethe Milo nḓilani ine ya tsela Sila. ₂₁Magota vho mu vhulahaho ndi Jozabadi ṅwana wa Shimiathi na Jehozabadi ṅwana wa Shomere. Juasi a dzama a swiṱwa zwaloni zwa musanda Muḓini wa Dafita, ṅwana wawe Amasia a vha khosi vhudzuloni hawe.