2 KORONIKA 9

₁Khosi ya musadzi ya Sheba a pfa bvumo ḽa khosi Solomoni a fara lwendo a ya Jerusalema uri a mu linge nga mbudziso dzi konḓaho. O ṱuwa na vhalanda vhanzhi na gamela dzó hwala zwilungi na musuku munzhi na matombo a mutengo muhulu, a swika ha Solomoni a amba nae nga zwoṱhe zwe zwa vha zwi mbiluni yawe. ₂Solomoni a fhindula mbudziso dzawe dzoṱhe, hu si vhe na tshithihi tshe tsha mu konḓela u ṱalutshedza. ₃Mufumakadzi wa Sheba a pfa vhuṱali ha Solomoni, a vhona na thembele ye a i fhaṱa, ₄na zwiḽiwa zwa ḓafulani ḽawe na madzulele a vhahulwane vhawe na vhashumi vhane vha mu shumela vho ambara phuraphura dzavho na vhafari vha zwinwelo vho ambara phuraphura dzavho na muḓalo we vha ḓala vha tshi yo ṋekedza nduvho thembeleni ya Muṋe washu, zwa mu akhamadza.

₅Khosi iyo ya musadzi ya vhudza khosi ya ri, “Mafhungo e nda a pfa shangoni ḽanga nga mishumo yavho na vhuṱali havho ndi ngoho! ₆Hone a tho ngo tenda zwe vha mmbudza, nda vhuya nda swika nda zwi vhona nga anga maṱo. Vhukuma a tho ngo vhuya nda vhudzwa na hafu ya vhuṱali havho, zwine vha vha zwone zwi fhira kule zwe nda zwi pfa. ₇Vhanna vhane vha vha navho vha na mashudu mangafhani! Magota avho vhane vha ḓi ima phanḓa havho vha tshi pfa vhuṱali havho vha na mashudu mangafhani! ₈Nga hu rendwe Yahavee Mudzimu wavho, we a vha takalela, a vha dzudza kha khuluṋoni yawe vha vha khosi uri vha vhuse nga dzina ḽa Yahavee Mudzimu wavho. Mudzimu wavho o funa Vhaisraele, a funa u vha tika lini na lini, ndi zwe vhone a vha ita khosi yavho, uri hu ḓi vha na khaṱhulo mbuya, hu itwe zwi re zwone.”

₉Ndi hone mufumakadzi uyo a tshi ṋea khosi Solomoni thwala dze a ḓa nadzo dza musuku we wa vha u tshi nga fhira thani nṋa na zwilungi zwinzhi na matombo a mutengo muhulu. Ho vha hu sa athu vhuya ha vha na zwilungi zwi no nga izwo zwe iyo khosi ya Sheba ya zwi ṋea khosi Solomoni.

₁₀Vhanna vha khosi Hiramu na vha khosi Solomoni vha ḓisa musuku we wa vha u tshi bva shangoni ḽa Ofiri, vha ḓisa na matanda a mudzhunipha na matombo a mutengo muhulu. ₁₁Khosi Solomoni a dzhia matanda ayo a mudzhunipha a fhaṱa ngao zwiṱepisi zwa thembele ya Muṋe washu na zwa pfamo ya musanda, a ita dziharipa na madende a vhaimbi ngao. Zwa u ralo zwo vha zwi sa athu vhuya zwa vhonwa Juda.

₁₂Khosi Solomoni a ṋea khosi ya musadzi ya Sheba zwoṱhe zwe ya vha i tshi zwi tama ya zwi humbela, a mu ṋea zwi no fhira zwe ya mu ḓela nazwo. Ndi hone mufumakadzi uyo a tshi vhuelela shangoni ḽawe na vhalanda vhawe.

₁₃Ṅwaha muṅwe na muṅwe khosi Solomoni o vha a tshi wana musuku une wa nga vha thani dza 23, ₁₄hu sa vhalwi mithelo ine ya ḓiswa nga vhashavhi na vhavhambadzi. Mahosi oṱhe a Arabia na vhavhusi vha madzingu a Israele na vhone vho vha vha tshi ḓisa musuku na siliva ha Solomoni.

₁₅Khosi Solomoni a fula zwiṱangu zwihulu zwa 200 zwa musuku, tshiṅwe na tshiṅwe tsho fhomiwa musuku wo fuliwaho une wa nga vha khilogiramu ṱhanu na mbili. ₁₆Solomoni a ita na zwiṱangu zwiṱuku zwa 300 zwa musuku wo fuliwaho, tshiṅwe na tshiṅwe tshi na musuku une wa nga vha khilogiramu tharu na hafu. Khosi ya zwi vhea Huvhewazwihali ha Maṱaka a Libanoni.

₁₇Ndi hone khosi i tshi fhaṱa khuluṋoni khulu nga ṋanga dza nḓou ya fhomiwa nga musuku u songo vangiwaho. ₁₈Khuluṋoni iyo yo vha i na zwiṱepisi zwiṱanu na tshithihi, yo mometshedzwa tshivheamilenzhe tsho fhomiwaho musuku. Masia oṱhe a khuluṋoni ho vha hu na zwitikazwanḓa, hu na tshifanyiso tsha ndau yo imaho ngeno na ngeno hazwo. ₁₉Ho vha ho ima ndau dza 12 dza zwifanyiso kha izwo zwiṱepisi zwiṱanu na tshithihi, sia ḽiṅwe na ḽiṅwe ḽa tshiṱepisi ho ima nthihi. Ho vha hu sa athu vhuya ha vha na khuluṋoni ya u ralo kha muṅwe muvhuso.

₂₀Zwinwelo zwoṱhe zwa khosi Solomoni zwo vha zwi zwa musuku, na thundu yoṱhe i re Huvhewazwihali ha Maṱaka a Libanoni yo vha i ya musuku u songo vangiwaho. Misi ya Solomoni siliva yo vha i tshi tou nyadziwa. ₂₁Khosi yo vha i na zwikepe zwa vhushavhi zwe zwa vha zwi tshi tala lwanzheni na zwa vhalanda vha khosi Hiramu zwi tshi ya Tharashishi. Ho vha hu tshi ri ho fhela miṅwaha miraru zwa vhuya zwo hwala musuku na siliva na ṋanga dza nḓou na ṱhoho na mapfeṋe.

₂₂Khosi Solomoni o vha a tshi fhira maṅwe mahosi oṱhe a ḽifhasi nga lupfumo na vhuṱali. ₂₃Mahosi oṱhe a ḽifhasi o vha a tshi funa u thetshelesa Solomoni a tshi amba uri vha pfe vhuṱali he Mudzimu a vhu vhea mbiluni yawe. ₂₄Ṅwaha muṅwe na muṅwe, muṅwe na muṅwe we a mu dalela o vha a tshi ḓa na nduvho, zwithu zwa siliva na musuku, na zwifuko na zwihali na zwilungi na bere na meila.

₂₅Khosi Solomoni o vha e na madanga a bere na gariki zwi no swika 4 000 na vhanameli vha bere vha 12 000 vhe a vha o vha vhea miḓini ine ya dzula dzigariki, dziṅwe a tshi dzula nadzo Jerusalema. ₂₆Solomoni o vha a tshi vhusa mahosi oṱhe u bva mulamboni wa Yufuratha u swika shangoni ḽa Vhafilista u vhuya u swika nga masakha a Egipita. ₂₇Khosi ya khokha siliva Jerusalema ya anda unga matombo, matanda a mikedara a anda unga mihuyu zwigodini. ₂₈Bere dza Solomoni dzo vha dzi tshi bva Egipita na mashangoni maṅwe oṱhe.

₂₉Mafhungo maṅwe a Solomoni u bva mathomoni u swika magumoni, o ṅwalwa kha Histori ya Muporofita Nathani na kha Vhuporofita ha Ahia wa Shilo na kha Mabono a muporofita Ido, a tshi porofita nga muvhuso wa khosi Jerobiamu wa Israele, ṅwana wa Nebati. ₃₀Solomoni o vhusa ḽoṱhe ḽa Israele e Jerusalema a fhedza miṅwaha ya 40. ₃₁Solomoni a dzama, a swiṱwa Muḓini wa Dafita khotsi awe. Ṅwana wawe Rehabiamu a vha khosi vhudzuloni hawe.