2 KORONIKA 8

₁Solomoni o fhedza miṅwaha ya 20 a tshi fhaṱa thembele ya Muṋe washu na pfamo yawe. ₂Musi o fhedza a konou vusa miḓi ye a vha o ṋewa nga khosi Hiramu, a dzudza Vhaisraele khayo. ₃Solomoni a ṱuwa a yo thuba shango ḽa Hamathi na Tsoba, ₄a ita na u vusa muḓi wa Thadimoro u re phangani, na miḓi yoṱhe ya u vhulungela zwiḽiwa ye a vha o i fhaṱa Hamathi. ₅A vusa na miḓi ya Bethe Horoni wa Nṱha na Bethe Horoni wa Fhasi, miḓi ya mitsheṱo na dzikhoro na tswinga dza mabaphathi a tsimbi, ₆na muḓi wa Baalathi na miḓi yoṱhe ya u vhulungela zwiḽiwa na miḓi yoṱhe he a vha a tshi vhea gariki dzawe na bere dzawe, a fhaṱa na tshiṅwe na tshiṅwe tshe a vha a tshi tou funa Jerusalema na Libanoni na mashangoni oṱhe he a vha a tshi vhusa.

₇Vhathu vhoṱhe vha tsalela dza Vhahithi na Vhaamori na Vhapherisi na Vhahivi na Vhajebusi, vhe vha vha vhe si Vhaisraele, ₈vhaḓuhulu vha vhenevho vhe vha vha vho sala shangoni, vha songo lozwiwaho nga Vhaisraele, Solomoni a vha shumisa nga khombekhombe, na ṋamusi zwi tshee zwo ralo. ₉Hone Vhaisraele Solomoni ho ngo vha shumisa mishumo yeneyo, vhone vho vha vhe vhahali vhawe na vhalangi na vhakoma vhawe na vhalangi vha gariki dzawe na vhatshimbidzi vha dzigariki. ₁₀Khosi Solomoni o vhea na magota a 250 mivhunduni yo fhambanaho.

₁₁Solomoni o vha o dzea ṅwananyana wa Farao. Ene a mu pfulusa Muḓini wa Dafita a mu isa pfamoni ye a vha o mu fhaṱela, nge a ri, “Mufumakadzi wanga ho ngo fanela u dzula pfamoni ya khosi Dafita wa Israele, ngauri fhethu he mbulungelo ya Muṋe washu ya dzhena hone ndi hukhethwa.”

₁₂Solomoni a ṋekedza Muṋe washu zwiṱhavhelo zwi fhiswaho kha aḽiṱari ya Muṋe washu ye a vha o i fhaṱa phanḓa ha guḓa. ₁₃O ṋekedza zwiṱhavhelo zwi fhiswaho a tshi tevhedza Mulayo wa Mushe wa zwi ṱoḓeaho ḓuvha ḽikhethwa ḽiṅwe na ḽiṅwe, Dzisabatha na vhuṱambo ha Ṅwedzi Muswa na vhuṱambo ha ṅwaha nga ṅwaha, vhuṱambo ha Vhurotho vhu si na mbilisa na vhuṱambo ha Mishasha. ₁₄Solomoni a tevhedza ndayo dza khotsi awe Dafita, a nanga zwigwada zwa vhotshifhe a vha ṋea mishumo yavho, a nanga na Vhalivi uri vha range phanḓa hu tshi imbiwa thendo na u farisa vhotshifhe kha zwoṱhe zwi ṱoḓeaho misi yoṱhe. A ita na u nanga vhalindakhoro vha ita zwigwada zwa u linda khoro dzo fhambanaho, ngauri izwo yo vha i ndaela ya Dafita muḓinḓa wa Mudzimu. ₁₅A vho ngo vhuya vha pambuwa kha ndaela dza khosi Dafita dzi kwamaho vhotshifhe kana Vhalivi kha mafhungo oṱhe, hu tshi katelwa na mafhungo a nnḓu dza mbulungelo.

₁₆Mushumo woṱhe wa Solomoni wa shumiwa, u bva ḓuvha ḽe ha tewa muteo wa thembele ya Muṋe washu ya vhuya ya fhela u fhaṱiwa, thembele ya Muṋe washu ya vha yo fhela.

₁₇Ndi hone Solomoni a tshi takuwa a ya Etsioni Gebere na Elathi, khunzikhunzini ya lwanzhe ya Edomo. ₁₈Khosi Hiramu a mu rumela zwikepe zwe zwa vha zwi tshi khou langwa nga magota awe, vhanna vhe vha vha vha tshi ḓivha lwanzhe. Vhenevho vha tala lwanzheni nga zwikepe vhe na vhanna vha Solomoni vha ya shangoni ḽa Ofiri vha vhuya na musuku we wa vha u tshi nga eḓana thani dza 15 na hafu, vha u isa ha khosi Solomoni.