2 KORONIKA 10

₁Rehabiamu a takuwa a ya Shikheme, ngauri Vhaisraele vhoṱhe vho vha vho ya henengei uri vha mu vhumbe khosi. ₂Musi Jerobiamu ṅwana wa Nebati a tshi zwi pfa, a vhuya a tshi bva Egipita, ngauri o vha o shavhela Egipita a tshi shavha khosi Solomoni. ₃Vhathu vha vhidzisa Jerobiamu, ene na Vhaisraele vhoṱhe vha ya ha Rehabiamu vha swika vha mu vhudza vha ri, ₄“Khotsi aṋu vho ri hwesa dzhogo ya u lemela, huno zwino ri fhungudzeleni mushumo wa tshiṱuhu na dzhogo i lemelaho ye vha ri hwesa yone, ndi hone ri tshi ḓo vha vhalanda vhaṋu.”

₅Rehabiamu a fhindula a ri, “Vhuyani hó fhela maḓuvha mararu.” Ndi hone vhathu vha tshi ṱuwa.

₆Khosi Rehabiamu a vhudzisa vhakalaha vhe vha vha vha tshi shumela khotsi awe Solomoni vha tshi kha ḓi tshila, vha tshi vha eletshedza, a vha vhudzisa a ri, “Nnyeletshedzeni uri avha vhathu ndi vha fhindule hani!”

₇Vhone vha fhindula vha ri, “Arali vhathu avha na vha itela vhuthu, na vha takadza, na vha fhindula nga nḓila i takadzaho, vha ḓo vha vhalanda vhaṋu tshoṱhe.”

₈Huno Rehabiamu a landula nyeletshedzo ya vhahulwane, a yo vhudzisa vhaṱhannga vhe vha aluwa nae, vhe vha vha vha tshi khou mu shumela vhe vhone vhaeletshedzi vhawe. ₉Rehabiamu a vha vhudzisa a ri, “Inwi ni tshi nnyeletshedza ni ri mini? Vhathu avha ri fanela u vha fhindula hani vhane vha nkhumbela vha ri ndi vha fhungudzele dzhogo ye khotsi anga a vha hwesa yone?”

₁₀Vhaṱhannga vhe vha aluwa nae vha fhindula vha ri, “Vhudzani vhathu vhe vha ni vhudza vha ri khotsi aṋu o vha hwesa dzhogo ya u lemela, hone inwi ni vha leludzele dzhogo, ni ri, ‘Tshinwaanwane tshanga tsho denyefhala u fhira khundu dza khotsi anga. ₁₁Khotsi anga vho ni hwesa dzhogo ya u lemela, nṋe ndi ḓo ita uri i lemelese. Khotsi anga vho ni rwa nga zwimebi, nṋe ndi ḓo ni rwa nga mboma.’ ”

₁₂Ho no fhela maḓuvha mararu Jerobiamu na vhathu vhoṱhe vha vhuelela ha khosi Rehabiamu nga he a vha vhudza a ri, “Vhuyani ho fhela maḓuvha mararu.” ₁₃Khosi ya vha ḽela vhuhali i tshi vha fhindula, ya landula nyeletshedzo ya vhahulwane, ₁₄ya tevhela nyeletshedzo ya vhaṱhannga, ya ri, “Khotsi anga vho ni hwesa dzhogo i lemelaho, nṋe ndi ḓo ni hwesa i lemelesaho. Khotsi anga vho ni rwa nga zwimebi, nṋe ndi ḓo ni rwa nga mboma.” ₁₅Khosi a yo ngo thetshelesa vhathu, ngauri izwo zwo iteaho zwo vha zwi tshi bva kha Mudzimu uri hu khunyelele zwe Muṋe washu a amba a tshi vhudza Jerobiamu ṅwana wa Nebati nga mulomo wa Ahia wa Shilo.

₁₆Musi Vhaisraele vhoṱhe vha tshi vhona uri khosi yo landula zwe vha humbela, vha fhindula khosi vha ri,

Ndi hone Vhaisraele vhoṱhe vha tshi vhuelela hayani. ₁₇Hone Vhaisraele vhe vha vha vha tshi dzula miḓini ya Juda vha ḓi vhuswa nga Rehabiamu.

₁₈Khosi Rehabiamu a ruma Adoniramu mulangi wa mushumo wa khombekhombe, hone Vhaisraele vha mu kanḓa nga matombo vha mu vhulaha. Khosi Rehabiamu zwa ri u ralo a ṱavhanya a namela gariki yawe a shavhela Jerusalema. ₁₉Vhaisraele vha mbo ḓi vha vho shandukela nnḓu ya Dafita, na ṋamusi.