2 KORONIKA 7

₁Musi Solomoni a tshi fhedza u rabela, ha wa mulilo u tshi bva ḽiṱaḓulu, wa fhisa nduvho i fhiswaho na zwiṱhavhelo, lupenyo lu kombodzaho lwa Muṋe washu lwa ḓadza thembele, ₂vhotshifhe vha si kone u dzhena nḓuni ya Muṋe washu nge ya vha yo ḓala lupenyo lwa Muṋe washu. ₃Musi Vhaisraele vhoṱhe vha tshi vhona mulilo u tshi wa u tshi bva ṱaḓulu na lupenyo lwa Muṋe washu lwo alama kha thembele, vha gwadama kha pheivimennde zwifhaṱuwo zwavho zwa kwama fhasi, vha luvha Muṋe washu, vha mu livhuha vha tshi khou ri,

₄Ndi hone khosi na vhathu vhoṱhe vha tshi ṋekedza Muṋe washu zwiṱhavhelo. ₅Khosi Solomoni a ṋekedza tshiṱhavhelo tsha kholomo dza 22 000 na nngu na mbudzi dza 120 000, ngauralo ha vha hu hone khosi na vhathu vhoṱhe vho kumedza Mudzimu thembele yawe. ₆Vhotshifhe vha ima vhuimoni havho, na Vhalivi vha ima vho lavhelesana navho, vha tshi khou renda Muṋe washu nga zwilidzo zwo itwaho nga khosi Dafita, vha tshi imba luimbo vha tshi ri, “Lufuno lwawe a lu dzinginyei!” nga he vha laiwa nga Dafita. Vhotshifhe vha lidza dziphalaphala, Vhaisraele vhoṱhe vhó ima nga milenzhe.

₇Solomoni a kumedza Mudzimu tshipiḓa tsha vhukati tsha muṱa u re phanḓa ha nnḓu ya Muṋe washu, henefho a ṋekedza zwiṱhavhelo zwi fhiswaho na mapfura a zwiṱhavhelo zwa u konana na Mudzimu, ngauri aḽiṱari ya musinaseṱha ye a vha o i fhaṱa yo vha i ṱhukhu, zwiṱhavhelo zwi fhiswaho na nduvho dza thoro na miraḓo ya mapfura zwi sa fheleli khayo.

₈Solomoni na Vhaisraele vhoṱhe vha ita vhuṱambo ha Mishasha misi yeneyo vha fhedza maḓuvha maṱanu na mavhili. Ho vha ho kuvhangana gogo ḽa vhathu vhanzhi vha tshi bva Pharani ya Hamathi thungo ya devhula u vhuya u swika Mulamboni wa Egipita thungo ya tshipembe. ₉Nga ḓuvha ḽa vhuṱanu na vhuraru vha kuvhangana, ngauri vho vha vho ita vhuṱambo ha u kumedza aḽiṱari vha fhedza maḓuvha maṱanu na mavhili, vha dovha vha ita vhuṱambo ha Mishasha vha fhedza maṅwe maḓuvha maṱanu na mavhili. ₁₀Nga ḓuvha ḽa 23 ḽa ṅwedzi wa vhuṱanu na vhuvhili Solomoni a ri vhathu vha ye mahayani avho, vha ṱuwa vha tshi pembela, vho takala mbiluni dzavho nga zwivhuya zwe Muṋe washu a itela Dafita na Solomoni na vhathu vhawe Vhaisraele.

₁₁Musi khosi Solomoni o no fhedza u fhaṱa thembele ya Muṋe washu na pfamo ya musanda, o no vuledza zwoṱhe zwe zwa vha zwi mbiluni yawe zwa thembele ya Muṋe washu na pfamo yawe, ₁₂Muṋe washu a ḓisumbedza ene vhusiku a mu vhudza a ri, “Thabelo yau ndo i pfa, ndo ḓinangela fhethu afha uri i vhe thembele hune nda ḓo ṋekedzwa zwiṱhavhelo. ₁₃Musi ndi tshi vala ḽiṱaḓulu mvula ya si tsha na, kana nda ruma magerere a ḓa a ḽa zwimela masimuni, kana nda ḓisela vhathu vhanga dwadze, ₁₄arali vhathu vhanga vhane vha vhidzwa nga dzina ḽanga vha ḓiṱukufhadza, vha rabela, vha ṱoḓa tshifhaṱuwo tshanga, vha laṱa vhuvhi havho, zwenezwo ndi ḓo zwi pfa ndi ṱaḓulu, nda vha hangwela vhutshinyi havho, nda fhodza shango ḽavho. ₁₅Ndi hone ndi tshi ḓo linda fhethu hafhano, nda thetshelesa thabelo dzi rabelwaho fhano. ₁₆Zwino thembele hei ndo i nanga, nda i shudufhadza uri dzina ḽanga ḽi vhe henefho lini na lini. Ndi ḓo i linda, nda i funa misi yoṱhe.

₁₇“Huno iwe, arali wa ntshumela unga khotsi au Dafita, wa ita zwoṱhe zwine nda u laya, wa tevhedza ndayo dzanga na milayo yanga, ₁₈ndi ḓo pfumbisa khuluṋoni yau ya vhuhosi, nga he nda vhofha mulanga na khotsi au Dafita zwiḽa ndi tshi ri, ‘A u nga kundwi u vha na muḓuhulu ane a ḓo vhusa Israele.’

₁₉“Huno arali na mpfuralela, na ṱutshela ndayo dzanga na milayo yanga ye nda ni ṋea, na yo shumela miṅwe midzimu, na i luvha, ₂₀zwenezwo ndi ḓo thatha Vhaisraele shangoni ḽanga ḽe nda vha ṋea, nda landula thembele hei ye nda i shudufhadza uri i vhe ya dzina ḽanga. Ndi ḓo ita uri tshakha dzoṱhe dzi tshi i sedza dzi i nyadze. ₂₁Naho thembele iyi zwino i tshi huliswa, misi yeneyo vhafhiri vha nḓila vhoṱhe vha vho ḓo tshenuwa vha ri, ‘Ndi mini Yahavee o ita zwo raliho shangoni ḽino na thembeleni iyi?’ ₂₂Vhathu vha ḓo konou fhindula vha ri, ‘Ndi nge vha ṱutshela Yahavee Mudzimu wa vhokhotsi avho, we a vha pfulusa Egipita, vha kuvhatedza miṅwe midzimu, vha i luvha vha i shumela, ndi zwe a vha ḓisela khombo hei.’ ”