2 KORONIKA 6

₁Ndi hone khosi Solomoni a tshi rabela a ri, “Muṋe washu, wo amba wa ri u ḓo dzula goleni ḽitswu. ₂Zwino nṋe ndo u fhaṱela thembele ya vhugala, hune wa ḓo dzula hone lini na lini.”

₃Tshivhidzo tshoṱhe tsha Israele tsho vha tsho ima henefho. Khosi ya rembuluwa ya vha shudufhadza. ₄Ndi hone Solomoni a tshi ri, “Nga hu rendwe Muṋe washu Mudzimu wa Israele! Zwe a fulufhedzisa khotsi anga Dafita nga mulomo wawe, o zwi khunyeledza nga maanḓa awe. ₅Ndi uri o ri, ‘U bva tshee nda pfulusa vhathu vhanga Egipita, a tho ngo vhuya nda nanga muḓi kha tsinde ḽiṅwe ḽa Israele uri dzina ḽanga ḽi fhaṱelwe thembele hone nahone a tho ngo vhuya nda nanga muṅwe muthu uri a vhe murangaphanḓa wa vhathu vhanga Vhaisraele. ₆Huno zwino ndo nanga Jerusalema uri dzina ḽanga ḽi vhe henefho, nda nanga Dafita uri a vhuse vhathu vhanga Vhaisraele.’

₇“Khotsi anga Dafita vho vha vhe nazwo mbiluni yavho uri vha fhaṱele dzina ḽa Muṋe washu Mudzimu wa Israele thembele. ₈Hone Muṋe washu o vhudza khotsi anga Dafita a ri, ‘Wo ita zwone u tshi elekanya u fhaṱela dzina ḽanga thembele. ₉Hone a si iwe ane wa ḓo fhaṱa thembele; ṅwana wau wa dzofha ḽau, ndi ene ane a ḓo fhaṱela dzina ḽanga thembele.’

₁₀“Zwino Muṋe washu o khunyeledza zwe a fulufhedzisa. Nṋe ndo vha khosi vhudzuloni ha khotsi anga Dafita, zwino ndo dzula kha khuluṋoni ya Israele, sa zwe Muṋe washu a fulufhedzisa, nda fhaṱela dzina ḽa Muṋe washu Mudzimu wa Israele thembele. ₁₁Henefho thembeleni ndo vhea mbulungelo, ngomu hayo hu na mulanga wa Muṋe washu we a vhofha na vhathu vhawe Vhaisraele.”

₁₂Ndi hone Solomoni a tshi ima phanḓa ha aḽiṱari ya Muṋe washu ó lavhelesa tshivhidzo tshoṱhe tsha Israele, a imisa zwanḓa. ₁₃Zwino Solomoni o vha e na ḓingo ḽa musinaseṱha o ḽi vhea vhukati ha muṱa wa nnḓa. Ḓingo iḽo ḽo vha ḽi na vhunavha ha mitha mbili na hafu na vhuphara ha mitha mbili na hafu na mitha nthihi na hafu vhulapfu u ya nṱha. Solomoni a gonya iḽo ḓingo, a gwadama phanḓa ha tshivhidzo tshoṱhe tsha Israele, a imisa zwanḓa zwawe zwa livha ṱaḓulu, ₁₄a rabela a ri, “Muṋe washu Mudzimu wa Israele, a hu na Mudzimu ane a nga Iwe ṱaḓulu kana fhano fhasi. Iwe u vhulunga mulanga wau we wa u vhofha na vhathu vhau, wa vha sumbedza lufuno lwau arali vha tshi u thetshelesa nga mbilu yoṱhe. ₁₅Wo khunyeledza zwe wa fulufhedzisa khotsi anga Dafita muḓinḓa wau, ṋamusi zwe wa fulufhedzisa nga mulomo wau, wo zwi khunyeledza nga tshanḓa tshau.

₁₆“Zwino Muṋe washu Mudzimu wa Israele, khunyeledza zwe wa fulufhedzisa khotsi anga Dafita mulanda wau zwiḽa u tshi ri, ‘A u nga kundwi u wana ṅwana wa mutuka ane a ḓo dzula phanḓa hanga kha khuluṋoni ya Israele arali vhana vhau vhe na vhulondo kha zwoṱhe zwine vha ita, vha tshi tshila phanḓa hanga vha tshi tevhedza mulayo wanga, unga iwe.’ ₁₇Zwino-ha Muṋe washu Mudzimu wa Israele, zwe wa fulufhedzisa Dafita mulanda wau nga zwi vhe hone.

₁₈“Huno vhukuma Mudzimu u ḓo dzula fhano fhasi na vhathu naa? Ḽiṱaḓulu naho ḽi ḽiṱaḓulu ḽa nṱha-nṱha u nga si fhelele khaḽo. Zwino iyi thembele ye nda fhaṱa u nga fhelela khayo hani? ₁₉Yawee Muṋe washu Mudzimu wanga, naho zwo ralo thetshelesa thabelo yanga na mukosi wanga. Ipfa tshililo na thabelo ine nda khou rabela maṱoni au. ₂₀Ngavhe maṱo au a tshi dzula o sedza thembele iyi vhusiku na masiari, fhethu hafhano he wa ri dzina ḽau ḽi ḓo luvhiwa hone. Ngavhe u tshi thetshelesa thabelo ine nda rabela ndo sedza fhethu fhano. ₂₁Thetshelesa thabelo yanga na dza vhathu vhau Vhaisraele musi vha tshi rabela vho sedza fhano fhethu. Ri pfe u ṱaḓulu hune wa dzula hone, musi u tshi ri pfa u ri hangwele.

₂₂“Arali muthu a khakhela muṅwe, a pfi a ane muano, a ḓa a fulufhedzisa nga muano phanḓa ha aḽiṱari yau thembeleni ino, ₂₃zwenezwo thetshelesa u ṱaḓulu u haṱule vhalanda vhau, u lifhedze a re na mulandu nga he zwa mu tea, a si na mulandu u mu vhofholole.

₂₄“Musi vhathu vhau Vhaisraele vho kundwa nga maswina nge vha u khakhela, vha rembulutshela kha Iwe, vha ḓa fhano thembeleni ino vha u renda vha u rabela nga u ḓiṱukufhadza uri u vha hangwele, ₂₅zwenezwo vha thetshelese u ṱaḓulu, u hangwele vhathu vhau Vhaisraele vhutshinyi havho, u vha vhuedzedze shangoni ḽe wa ḽi ṋea vhone na vhomakhulukuku wavho.

₂₆“Musi wo vala ḽiṱaḓulu, nge vhathu vhau vha u khakhela, mvula i si tsha na, vhone vha u rabela nga u ḓiṱukufhadza vho sedza fhethu fhano vha tshi ḓisola nge wa vha ṱungufhadza, ₂₇zwenezwo vha thetshelese u ṱaḓulu, vhalanda vhau Vhaisraele u vha hangwele vhutshinyi havho. Vha funze u ita zwine zwa vha zwone, u nise mvula fhano shangoni ḽe wa ṋea vhathu vhau uri ḽi vhe ḽavho.

₂₈“Musi fhano shangoni hu tshi wa nḓala kana ha vha na dwadze kana done kana muunda kana magerere kana vhuukhula kana musi vhathu vha tshi govhelwa nga maswina miḓini yavho kana vha welwa nga khombo iṅwe-vho kana vha farwa nga vhulwadze, ₂₉musi muṅwe wa vhathu vhau Vhaisraele a tshi u humbela nga thabelo, muṅwe na muṅwe nga u vhona u tambula hawe na u pfa vhuṱungu a tshi imisa zwanḓa zwawe zwa livha thembele hei, ₃₀zwenezwo thetshelesa u ṱaḓulu hune wa dzula hone. Vha hangwele, ṋea muṅwe na muṅwe zwo mu teaho, ngauri u ḓivha mbilu yawe, hufha e Iwe une wa ḓivha mbilu dza vhathu u woṱhe, ₃₁ndi hone vha tshi ḓo u ofha, vha tshimbila nḓilani dzau misi yoṱhe vha tshi tshila shangoni ḽe wa ṋea vhomakhulukuku washu.

₃₂“Mutsinda ene ane a si vhe muṅwe wa vhathu vhau Vhaisraele, we a tou ḓa a tshi bva shangoni ḽa kule nge a pfa a dzina ḽau ḽihulu na maanḓa au na mishumo yau, musi a tshi ḓa a rabela o sedza thembele hei, ₃₃zwenezwo thetshelesa u ṱaḓulu hune wa dzula hone, u ite zwine uyo mutsinda a u humbela, uri tshakha dzoṱhe dza ḽifhasi dzi ḓivhe dzina ḽau, dzi u ofhe, u ḓi nga vhathu vhau Vhaisraele vha tshi u ofha, dzi ḓivhe uri nnḓu hei ye nda fhaṱa i vhidzwa nga dzina ḽau.

₃₄“Musi vhathu vhau vha tshi bva pfumo u yo lwa na maswina avho, hoṱhe hune wa vha ruma, musi vha tshi u rabela vho sedza muḓi houno we wa u nanga na thembele hei ye nda i fhaṱela dzina ḽau, ₃₅zwenezwo thetshelesa thabelo yavho na tshililo tshavho u ṱaḓulu, u ite uri vha kunde.

₃₆“Musi vha tshi u khakhela – ngauri a hu na ane a si khakhe – Iwe wa vha sinyutshela, wa vha kumedza maswina, vha vha thuba vha vha hwala vha vha isa shangoni ḽa kule kana ḽa tsini, ₃₇vha ri vhe henengei mbilu dzavho dza sala dzi tshi laṱa vhuvhi vha ḓisola, vha u lilela vha ri, ‘Ro tshinya, ro khakha, ro ita zwo vhifhaho,’ ₃₈arali vha rembulutshela kha Iwe nga mbilu yoṱhe na muya woṱhe vhe shangoni ḽe vha hwaliwa vha iswa khaḽo vhe mathubwa, vha u rabela vho sedza shango ḽe wa ṋea vhomakhulukuku wavho, vho sedza muḓi we wa u nanga, vho sedza thembele ye nda fhaṱela dzina ḽau, ₃₉zwenezwo u thetshelese thabelo yavho na zwililo zwavho u ṱaḓulu hune wa dzula hone, u vha khathutshele, u hangwele vhathu vhau vhe vha u khakhela.

₄₀“Zwino Mudzimu wanga, ngavhe maṱo au a tshi sedza, nḓevhe dzau dza thetshelesa thabelo dzi rabelwaho fhano fhethu.