2 KORONIKA 5

₁Musi khosi Solomoni o fhedza mushumo woṱhe wa thembele ya Muṋe washu, a dzhenisa zwithu zwe khotsi awe Dafita a zwi kumedza Mudzimu, siliva na musuku na thundu, a zwi longa zwisikuni zwa thembele ya Mudzimu.

₂Ndi hone khosi Solomoni a tshi ramba vhahulwane vha Israele na ṱhoho dza matsinde na vhahulwane vha miṱa ya Vhaisraele, vha kuvhangana Jerusalema uri vha yo dzhia mbulungelo ya mulanga ya Muṋe washu, vha i dzhie Tsioni Muḓini wa Dafita vha i ḓise thembeleni. ₃Vhanna vhoṱhe vha Israele vha kuvhangana musanda nga tshifhinga tsha vhuṱambo ha Mishasha nga ṅwedzi wa vhuṱanu na vhuvhili. ₄Musi vhahulwane vhoṱhe vha Israele vho no swika, Vhalivi vha hwala mbulungelo, ₅vha i isa thembeleni. Vhotshifhe, Vhalivi, vha hwala dennde ya u ṱangana na Mudzimu na thundu yoṱhe khethwa ye ya vha i ngomu hayo vha zwi isa thembeleni. ₆Khosi Solomoni na tshivhidzo tshoṱhe tsha Israele vha kuvhangana phanḓa ha mbulungelo ya mulanga vha tshi khou ṋekedza zwiṱhavhelo zwinzhi zwa nngu na kholomo dzi sa ṅwalei nahone dzi sa vhalei.

₇Ndi hone vhotshifhe vha tshi isa mbulungelo ya mulanga ya Muṋe washu vhudzuloni hayo thembeleni vha i vhea hukhethwa ha nga ngomu, hone Hukhethwakhethwa, fhasi ha phapha dza vhakherube. ₈Vhakherube vho vha vho ṱharamudza phapha dzavho nṱha ha fhethu hu re na mbulungelo, vha tibedza mbulungelo na thanda dza u i hwala. ₉Thanda idzo dzo vha dzo lapfa u fhira mbulungelo lwe ṱhodzi dzadzo dza kona u vhonala muṋangoni wa hukhethwa ha nga ngomu, hone dzi sa vhonali muthu e nnḓa ha Hukhethwakhethwa. Thanda idzo dzi tshee henefho na ṋamusi. ₁₀Ngomu ha mbulungelo ho vha hu na dziḽa mbaba mbili dza matombo fhedzi dze Mushe a longa khayo musi vhe Horebe, zwiḽa Muṋe washu a tshi vhofha mulanga na Vhaisraele u pfuluwani havho Egipita.

₁₁Ndi hone vhotshifhe vha tshi bva Hukhethwakhethwa. Vhotshifhe vhoṱhe vhe vha vha vhe henefho vho vha vho ḓikumedza Mudzimu, hu sa sedzwi uri ndi vha tshigwada tshifhio. ₁₂Vhalivi vhoṱhe vhe vha vha vhe vhaimbi, Asafu na Hemani na Jeduthuni na vhana vhavho vha vhatuka na mashaka avho, vho vha vho ima thungo ya vhubvaḓuvha ya aḽiṱari, vho ambara zwiambaro zwa lukhaha lu songo vangiwaho, vha tshi khou lidza dzitshele na dziharipa na madende, vha tshi bvumelwa nga vhotshifhe vha 120 vha tshi lidza dziphalaphala. ₁₃Vhalidzi vha dziphalaphala na vhaimbi vhoṱhe vho vha vha tshi imba zwithihi sa muthu muthihi, vha tshi renda Muṋe washu vha tshi mu livhuha. Vha takusa maipfi avho vha tshi renda Muṋe washu, vha tshi bvumelwa nga dziphalaphala na mirumba na zwiṅwe zwilidzo, vha tshi imba vha tshi ri,

Zwenezwo thembele ya Muṋe washu ya ḓala gole, ₁₄vhotshifhe vha si tsha kona u shuma mishumo yavho nga iḽo gole, nge lupenyo lwa Muṋe washu lwa vha lwo ḓadza thembele ya Mudzimu.