2 KORONIKA 4

₁Khosi Solomoni a fhaṱa aḽiṱari ya musinaseṱha ye ya vha i na vhunavha ha mitha dza fumi na vhuphara ha mitha dza fumi na vhulapfu ha mitha ṱhanu u ya nṱha. ₂Solomoni a ita na thannge ya musinaseṱha ya tshitendeledzi, vhulapfu u ya nṱha yo vha i mitha mbili na hafu, u buḓekanya u bva kha lubomo u swika kha luṅwe i mitha ṱhanu, u mona nayo i mitha dza 15. ₃Nga fhasi ha lubomo ho vha hu na makolo a mboho u mona nayo, hafu ya mitha iṅwe na iṅwe i na fumi ḽadzo. Mboho idzo dzo vha dzo fulwa dza ita miduba mivhili dzo momekana na thannge. ₄Thannge yo vha yo ima kha miṱana ya mboho dza 12 dza musinaseṱha, zwikondo zwadzo zwo ela vhukati, tharu dzo lavhelesa devhula, tharu dzo lavhelesa vhukovhela, tharu dzo lavhelesa tshipembe, tharu dzo lavhelesa vhubvaḓuvha. ₅Thannge kha matungo ayo yo vha i na vhudenya ha tshanḓa tsha muthu, lubomo lwayo lu tshi nga lwa tshinwelo, lu tshi nga dzuvha ḽa volenga. Thannge iyo yo vha i tshi kona u fara maḓi a ḽitha dza 60 000. ₆Solomoni a ita na masambelo a fumi, maṱanu a vhewa thungo ya tshipembe ya thembele, maṱanu thungo ya devhula. Henefho ho vha hu tshi ṱukiswa miraḓo ya zwifuwo zwa zwiṱhavhelo zwi fhiswaho; vhotshifhe vhone vho vha vha tshi ṱamba nga maḓi a thannge khulwane.

₇Solomoni a ita zwivheambone zwa fumi zwa musuku zwi tshi ya nga he ha pfi zwi itwe ngaho, a zwi vhea thembeleni, zwiṱanu thungo ya tshipembe, zwiṱanu thungo ya devhula. ₈A ita na maḓafula a fumi a a vhea thembeleni, maṱanu thungo ya tshipembe, maṱanu thungo ya devhula. A ita na ndilo dza ḓana dza musuku dza u handulula.

₉Solomoni a ita muṱa wa vhotshifhe, na muṱa muhulu na mahothi awo, a a fhoma musinaseṱha. ₁₀Thannge a i vhea thungo ya tshipembe, khuḓani ya vhubvaḓuvhatshipembe ha thembele.

₁₁Huramu a ita na dzikhali na dzifosholo na ndilo dza u handulula.

Ha vha hu hone Huramu o fhedza mushumo we a vha a tshi khou u shumela khosi Solomoni thembeleni ya Mudzimu:

Zwithu zwoṱhe zwe Huramu a ita thembeleni ya Muṋe washu a tshi itela khosi Solomoni zwo vha zwi zwa musinaseṱha wo kulutedzwaho.

₁₇Khosi ya ri zwi itwe milondoni mudavhini wa Jorodani vhukati ha Sukotho na Tserede. ₁₈Zwoṱhe hezwo zwithu zwe Solomoni a zwi ita zwo vha zwo ḓala lwe muthu a si kone u ḓivha tshileme tsha musinaseṱha wazwo.

₁₉Khosi Solomoni a ita na thundu yoṱhe ye ya vha i thembeleni ya Mudzimu: aḽiṱari ya musuku na maḓafula a vhurotho vhune ha ṋekedzwa Mudzimu, ₂₀na zwivheambone zwa musuku u songo vangwaho na mbone dzazwo dzine dza duga phanḓa ha Hukhethwakhethwa zwi tshi ya nga he zwa dzudzanywa, ₂₁na makolo a maluvha a musuku na mbone na zwiṱoṱomodzathambo zwa musuku wo dziaho ₂₂na zwiṱunyathambo zwa musuku u songo vangiwaho na ndilo dza u handulula na ndongo dza u hwala masimbe na zwidongo zwa zwioro na mahothi a musuku a thembele: mahothi a nga ngomu a musi muthu a tshi ya Hukhethwakhethwa na mahothi a holo khulwane.