2 KORONIKA 28

₁Ahasi a tshi vha khosi o vha e na miṅwaha ya 20, a vhusa e Jerusalema a fhedza miṅwaha ya 16. Ene ho ngo kanda vhuṱalani havhuḓi ha makhulukuku wawe Dafita, o ita zwi sa takadzi Muṋe washu. ₂O kanda vhuṱalani ha mahosi a Israele, a fula zwitungulo zwa zwifanyiso zwa Vhobaali. ₃A dubisa zwioro Govhani ḽa Beni Hinomu, a ita na u ṋekedza vhana vhawe vha vhatuka a vha ita nduvho dzi fhiswaho, a tshi tevhedza maitele a nengisaho a tshakha dze Muṋe washu a dzi thatha musi Vhaisraele vha tshi lwa navho. ₄O ṋekedza zwiṱhavhelo a fhisa zwioro zwitembeleni zwa zwikwarani na miṱumbani ya zwikwara na fhasi ha miri yoṱhe yo bvukaho.

₅Ndi zwe Muṋe washu Mudzimu wawe a mu kumedza zwanḓani zwa khosi ya Aramu. Vhaaramu vha mu kunda, vha thuba vhathu vhawe vhanzhi, vha vha hwala vha vha isa Damasko.

Ahasi a dovha a kumedzwa zwanḓani zwa khosi ya Israele, uyo a vhulaha vhathu vhawe vhanzhi. ₆Pheka ṅwana wa Remalia a vhulaha vhahali vha 120 000 vha Juda nga ḓuvha ḽithihi, nge vhathu vha Juda vha ṱutshela Muṋe washu Mudzimu wa vhokhotsi avho. ₇Muṅwe muhali wa Efraimi we a vha a tshi pfi Zikhiri a vhulaha ṅwana wa khosi Ahasi we a vha a tshi pfi Maaseya na ṋegota we a vha a tshi pfi Asrikamu na Elikana, we a vha e tshanḓa tsha khosi. ₈Vhaisraele vha thuba vhasadzi na vhana vha vhatuka na vhasidzana vha Juda vha 200 000, naho vho vha vhe mashaka avho, vha vha hwala vha vha isa Samaria, vha ita na u hwala thundu nnzhi ye vha ṱangula vha ṱuwa nayo.

₉Hone henefho muḓini wa Samaria ho vha hu tshi dzula muporofita wa Muṋe washu we a vha a tshi pfi Odede. Onoyo a bva a yo ṱanganedza mmbi musi i tshi vhuya Samaria, a vha vhudza a ri, “Muṋe washu Mudzimu wa vhokhotsi aṋu o vha o sinyutshela vhathu vha Juda, ndi zwe a vha kumedza zwanḓani zwaṋu. Hone no vha vhulaha nga tshiṱuhu tshe tsha tou swika makoleni. ₁₀Zwino ni ṱoḓa u dzhia vhanna na vhasadzi vha Juda na Jerusalema na vha ita phuli dzaṋu. Hone a ni zwi ḓivhi uri na inwi no khakhela Muṋe washu Mudzimu waṋu naa? ₁₁Zwino nthetsheleseni! Vhathu havha vha haṋu vhe na vha ita dziphuli, vha litsheni vha ṱuwe, Muṋe washu a sa ḓo ni sinyutshela a ni lifhedza.”

₁₂Ndi hone vhaṅwe vharangaphanḓa vha Efraimi, Azaria ṅwana wa Jehohanani na Berekhia ṅwana wa Mishilimotho na Jehiskia ṅwana wa Shalumu na Amasia ṅwana wa Hadilai, vha tshi dzivhisa vhe vha vha vha tshi khou swika vha tshi bva nndwani vha ri, ₁₃“Ni songo ḓa na phuli hedzo fhano, ri sa ḓo ovha mulandu phanḓa ha Muṋe washu. Ro no ḓi tshinya, ro no ḓi vha na mulandu. Kani ni ṱoḓa ri tshi phapha mbulu kha iṅwe? Ndi uri mulandu washu wo no hulela, mbiti dza Muṋe washu dzi ofhisaho dzi ḓo wela Vhaisraele.”

₁₄Ndi hone vhahali vha tshi kumedza magota na tshivhidzo tshoṱhe idzo phuli na zwe vha ṱangula. ₁₅Ha tiwa vhaṅwe vhanna uri vha dzhie phuli idzo, vhoṱhe vhe vha vha vhe fhedzi vha ambadzwa zwiambaro zwi tshi bva kha thundu ye ya ṱangulwa. Vha vha ṋea zwiambaro na navhula na zwiḽiwa na zwinwiwa, vha shela mapfura a muolivi kha mbonzhe dzavho. Vhoṱhe vhe vha vha vha si tshee na nungo vha vha namedza dzidonngi. Ndi hone vha tshi vha vhuedzedza ha vha havho Jerikho, Muḓini wa Mitshevho, vhone vha humela Samaria.

₁₆Misi yeneyo khosi Ahasi a ruma vhaḓinḓa ha khosi ya Ashuru uri a mu phalale. ₁₇Vhaedomo vho vha vho dovha vha yo dia Juda vha thuba vhathu vha ṱuwa navho, ₁₈ngeno Vhafilista vho dia miḓi zwigodini na Negeve kha ḽa Juda. Vha thuba miḓi ya Bethe Shemeshe na Ayaloni na Gederotho khathihi na miḓi ya Sokho na Thimina na Gimiso na miḓi yo i tangaho, vha dzula khayo. ₁₉Muṋe washu a nyadzisa vhathu vha Juda nge Ahasi khosi ya Juda a tendela vhuvhi vhu tshi anda Juda, a nyadza Muṋe washu. ₂₀Thigilathi Philisere khosi ya Ashuru a ya ha khosi Ahasi, a si tsha mu phalala, tshawe ha tou vha u mu dina. ₂₁Ahasi a dzhia zwiṅwe zwithu thembeleni ya Muṋe washu na pfamoni ya musanda na mahayani a vhavhusi, a zwi ṋea khosi ya Ashuru, hone na izwo zwa si mu farise tshithu.

₂₂Musi khosi Ahasi e khomboni, a ḓi khakhela Muṋe washu a tshi ya. ₂₃Ahasi a ṋekedza midzimu ya Damasko zwiṱhavhelo, ya vhenevho vhathu vhe vha mu kunda, nge a ri, “Vhunga midzimu ya mahosi a Aramu yo vha farisa, ndi ḓo i ṋekedza zwiṱhavhelo uri na nṋe i mpfarise.” Hone u ralo ha vha u ḓiṱulela khombo na u ṱulela Vhaisraele vhoṱhe khombo. ₂₄Ahasi a kuvhanganya thundu ya thembele ya Mudzimu a i pwashekanya. A vala miṋango ya thembele ya Muṋe washu, a fhaṱa dziaḽiṱari khuḓani dzoṱhe dza mikoto ya Jerusalema. ₂₅Muḓini muṅwe na muṅwe wa Juda a fhaṱa zwitembele zwa midzimu zwikwarani uri midzimu isili i dubiselwe zwioro, u ralo ha vha u ṱunga Muṋe washu Mudzimu wa vhokhotsi awe, a sinyuwa.

₂₆Mafhungo maṅwe a Ahasi, u bva mathomoni u swika magumoni, o ṅwalwa buguni ya Histori ya Mahosi a Juda na Israele. ₂₇Khosi Ahasi a dzama, a swiṱwa muḓini wa Jerusalema, hone a si vhewe zwaloni zwa mahosi a Israele. Ṅwana wawe Hiskia a vha khosi vhudzuloni hawe.