2 KORONIKA 27

₁Jothamu o vha khosi e na miṅwaha ya 25 a vhusa e Jerusalema a fhedza miṅwaha ya 16. Mme awe o vha a tshi pfi Jerusha ṅwananyana wa Tsadoko. ₂Jothamu o vha a tshi takadza Muṋe washu, u ḓi nga khotsi awe Uzia, hone ene ho ngo ita zwa khotsi awe zwe a tshinya nga u dzhena thembeleni ya Muṋe washu a dubisa zwioro. Vhathu vha Juda vhone vha ḓi isa phanḓa u tshinya.

₃Jothamu ndi ene we a vusa Khoro ya Nṱha ya thembele ya Muṋe washu, a shuma mushumo muhulu mutsheṱoni tshikwarani tsha Ofele. ₄O fhaṱa na miḓi thavhani dza Juda, maṱakani a fhaṱa madzhavhelo na dzithawara.

₅Jothamu a bva pfumo a yo lwa na khosi ya Vhaamoni, a vha kunda. Ṅwaha wonoyo Vhaamoni vha mu luvha nga siliva ya khilogiramu dza 3 400 na goroi ya thani dza 1 000 na bali ya thani dza 1 000. Vhaamoni vha ḓi mu luvha nga u ralo ha vhuya ha fhela ṅwaha wa vhuvhili na wa vhuraru. ₆Jothamu a vha na maanḓa nge a vha a tshi tshimbila nḓilani ya Muṋe washu Mudzimu wawe a sa pambuwi khayo.

₇Mafhungo maṅwe a Jothamu, hu tshi angaredzwa na nndwa dzoṱhe dze a lwa na zwiṅwe zwe a ita, o ṅwalwa buguni ya Histori ya Mahosi a Israele na a Juda. ₈Jothamu o vha khosi e na miṅwaha ya 25, a vhusa e Jerusalema a fhedza miṅwaha ya 16. ₉Jothamu a dzama, a swiṱwa Muḓini wa Dafita. Ṅwana wawe Ahasi a vha khosi vhudzuloni hawe.