2 KORONIKA 29

₁Hiskia a tshi vha khosi o vha e na miṅwaha ya 25, a vhusa e Jerusalema a fhedza miṅwaha ya 29. Mme awe o vha e Abia ṅwananyana wa Zakaria. ₂O ita zwe zwa vha zwi tshi takadza Muṋe washu, u ḓi nga makhulukuku wawe Dafita.

₃Hiskia o vula miṋango ya thembele ya Muṋe washu nga ṅwedzi wa u ranga wa ṅwaha we a thoma u vhusa, a i vusa. ₄A kuvhanganya vhotshifhe na Vhalivi muṱani wa vhubvaḓuvha wa thembele, ₅a ri, “Inwi Vhalivi, nthetsheleseni! Ḓikumedzeni Mudzimu zwino, ni kumulule thembele ya Muṋe washu Mudzimu wa vhokhotsi aṋu, ni bvise na tshika dzoṱhe afho hukhethwa. ₆Vhokhotsi ashu vho vha vha sa fulufhedzei, vho ita zwi sa takadzi Mudzimu Muṋe washu, vha mu ṱutshela, vha lavhelesa thungo, vha furalela fhethu hune a dzula hone. ₇Vha ita na u vala miṋango ya maguḓa, vha dzima mbone. A vho ngo tsha dubisa zwioro kana vha ṋekedza zwiṱhavhelo zwi fhiswaho hukhethwa ha Mudzimu wa Israele. ₈Ndi zwe mbiti dza Muṋe washu dza wela vhathu vha Juda na Jerusalema, a vha ita zwi ofhisaho, vha nyadzwa nga vhoṱhe; inwi ni khou zwi vhona nga aṋu maṱo. ₉Ndi zwe vhokhotsi ashu vha vhulawa nndwani, vhana vhashu na vhasadzi vhashu vha hwaliwa vha iswa vhuthubwani.

₁₀“Zwino ndo elekanya u vhofha mulanga na Muṋe washu, Mudzimu wa Israele, uri mbiti dzawe dzi ofhisaho dzi ri ṱutshele. ₁₁Vhananga, ni songo tsha lenga zwino, ngauri Muṋe washu o ni nanga uri ni ime phanḓa hawe ni mu shumele, ni range vhathu phanḓa vha tshi mu luvha, ni mu dubisele zwioro.”

₁₂Ndi hone Vhalivi havhano vha tshi ḓilugisela u shuma:

₁₅Vhanna avho vha kuvhanganya Vhalivi vha havho, vha vha kumedza kha Mudzimu, vha ṱuwa vha yo dzhena thembeleni ya Muṋe washu vha i kumulula, nga he khosi ya vha laya, vha tshi tevhedza zwe Muṋe washu a amba. ₁₆Vhotshifhe vha dzhena hukhethwa ha Muṋe washu vha hu kumulula. Vha bvisa tshika dzoṱhe thembeleni ya Muṋe washu vha dzi vhea muṱani wa thembele ya Muṋe washu. Vhalivi vha dzi dzhia vha dzi bvisela nnḓa vha yo dzi kudza Govhani ḽa Kidroni. ₁₇Vha thoma maitele ayo nga ḓuvha ḽa u ranga ḽa ṅwedzi wa u ranga, nga ḓuvha ḽa vhuṱanu na vhuraru ḽa ṅwedzi vha swika guḓani ḽa Muṋe washu. Vha dovha vha fhedza maḓuvha maṱanu na mararu vha tshi khou kumulula thembele ya Muṋe washu yone iṋe, vha fhedza nga ḓuvha ḽa 16 ḽa ṅwedzi wa u ranga.

₁₈Ndi hone Vhalivi vha tshi ya ha khosi Hiskia vha swikisa mafhungo vha ri, “Ro kumulula thembele yoṱhe ya Muṋe washu na aḽiṱari ya zwiṱhavhelo zwi fhiswaho na midzio yayo yoṱhe, na ḓafula ḽa u vhea vhurotho ho kumedzwaho Mudzimu na thundu dzaḽo dzoṱhe. ₁₉Ro lugisa ra kumulula thundu yoṱhe ye khosi Ahasi a i bvisa nga u sa fulufhedzea hawe zwiḽa a tshee khosi. Zwino ro i vhea phanḓa ha aḽiṱari ya Muṋe washu.”

₂₀Nga matshelo khosi Hiskia a fhinduwa, a kuvhanganya vhahulwane vha miḓi, a gonya thembeleni ya Muṋe washu. ₂₁Vha isa mboho ṱhanu na mbili na thutha ṱhanu na mbili na thuthana ṱhanu na mbili na zwibokoṱo zwiṱanu na zwivhili, tsha vha tshiṱhavhelo tsha tshipfumelo tsha muvhuso na tsha hukhethwa na tsha Juda. Khosi ya laya vhotshifhe, vha lutsinga lwa Aroni, uri vha zwi ṋekedze kha aḽiṱari ya Muṋe washu. ₂₂Ndi hone vha tshi shidzha idzo mboho, vhotshifhe vha dzhia malofha vha handulula aḽiṱari ngao, vho no fhedza vha ṱhavha dzithutha vha dzhia malofha vha handulula aḽiṱari ngao, vha konou ṱhavha ngwana vha dzhia malofha adzo vha handulula aḽiṱari ngao. ₂₃Mbudzi dza tshiṱhavhelo tsha tshipfumelo dza iswa phanḓa ha khosi, vhone na tshivhidzo vha vhea zwanḓa zwavho khadzo. ₂₄Ndi hone vhotshifhe vha tshi ṱhavha idzo mbudzi, vha isa malofha adzo kha aḽiṱari ya tshiṱhavhelo uri a pfumelele Vhaisraele vhoṱhe, nge khosi ya vha yo vha laya ya ri hu ṋekedzwe tshiṱhavhelo tshi fhiswaho na tshiṱhavhelo tsha tshipfumelo zwi tshi itelwa Vhaisraele vhoṱhe.

₂₅Khosi Hiskia a vhea Vhalivi thembeleni ya Muṋe washu vhe na tshele na dziharipa na zwihwana hu tshi tevhedzwa ndayo dza Dafita na Gadi muporofita wa khosi na muporofita Nathani, hezwo ndi zwe Muṋe washu a vha laya nga milomo ya vhaporofita. ₂₆Ndi hone Vhalivi vha tshi ima vho ḓilugisa vhe na zwilidzo zwa Dafita, vhotshifhe vhe na dziphalaphala. ₂₇Hiskia a bvisa ndaela ya uri aḽiṱarini hu ṋekedzwe tshiṱhavhelo tshi fhiswaho. Musi vha tshi thoma u ṋekedza, vhathu na vhone vha thoma u renda Muṋe washu nga nyimbo, hu tshi lila dziphalaphala na zwilidzo zwa Dafita khosi ya Israele. ₂₈Tshivhidzo tshoṱhe tsha gwadama tsha luvha, vhaimbi vhone vha tshi khou imba, vhalidzi vha phalaphala vha tshi khou dzi lidza. Zwa ḓi ralo tshiṱhavhelo tshi fhiswaho tsha vhuya tsha ṱhoṱhela. ₂₉Musi vho no fhedza u ṋekedza zwiṱhavhelo, khosi na vhoṱhe vhe vha vha vhe henefho nayo vha gwadama vha luvha. ₃₀Khosi Hiskia na vhakoma vhawe vha vhudza Vhalivi uri vha rende Muṋe washu nga nyimbo dza Dafita na dza muvhoni Asafu; Vhalivi vha mbo renda vho takala, vha konou gwadama vha rabela.

₃₁Ndi hone Hiskia a tshi ri, “Zwino no ḓikumedza Muṋe washu. Iḓani ni ise zwiṱhavhelo na nduvho dza ndivhuho thembeleni ya Muṋe washu.” Vhathu vha tshivhidzo vha mbo isa zwiṱhavhelo na nduvho dza ndivhuho, na vhoṱhe vhe mbilu dzavho dza vha dzi tshi zwi funa vha isa zwiṱhavhelo zwi fhiswaho. ₃₂Tshivhalo tsha zwiṱhavhelo zwi fhiswaho zwo iswaho nga tshivhidzo tsho vha tshi mboho dza 70 na thutha dza ḓana na thuthana dza 200, dzoṱhe dzi dza tshiṱhavhelo tshi fhiswaho tshi ṋekedzwaho Muṋe washu. ₃₃Zwifuwo zwa zwiṱhavhelo zwo ṋekedzwaho zwo vha mboho dza 600 na nngu na mbudzi dza 3 000. ₃₄Fhedzi vhotshifhe vha u via zwiṱhavhelo zwoṱhe zwi fhiswaho vho vha vhe vhaṱuku, ndi zwe vha havho Vhalivi vha vha farisa mushumo uyo wa vhuya wa fhela, na vhaṅwe vhotshifhe vha vhuya vha fhedza u ḓikumedza Mudzimu, ngauri Vhalivi vho vha vho ḓifunga u ḓikumedza Mudzimu u fhira vhotshifhe. ₃₅Zwiṱhavhelo zwi fhiswaho zwo vha zwo ḓala, khathihi na mapfura a nduvho ya vhuthihi na nduvho ya zwinwiwa zwo fhelekedzaho zwiṱhavhelo zwi fhiswaho.

Ndi hone mushumo wa thembele ya Muṋe washu u tshi dovha wa pfumbiswa. ₃₆Khosi Hiskia na vhathu vhoṱhe vha pembela nga u vhona zwe Mudzimu a itela vhathu vhawe, nge zwa ṱavhanya u itea.