2 KORONIKA 26

₁Ndi hone vhathu vhoṱhe vha Juda vha tshi dzhia ṅwana wawe Uzia, vha mu vhumba khosi vhudzuloni ha khotsi awe Amasia. Uzia o vha e na miṅwaha ya 16 a tshi vha khosi. ₂Ndi ene we a vusa muḓi wa Elathi a u vhuedzedza Juda, musi Amasia o no dzama.

₃Uzia a tshi thoma u vhusa o vha e na miṅwaha ya 16, a vhusa e Jerusalema a fhedza miṅwaha ya 52. Mme awe o vha a tshi pfi Jekholia wa Jerusalema. ₄Uzia o ita zwi takadzaho Muṋe washu, u ḓi nga khotsi awe Amasia. ₅O shumela Mudzimu misi Zakaria a tshi kha ḓi tshila, ndi ene we a vha a tshi mu laya uri a ofhe Mudzimu. Musi a tshi shumela Muṋe washu, Mudzimu o vha a tshi ita uri zwi mu nakele.

₆Uzia a bva pfumo a yo lwa na Vhafilista, a thutha mitsheṱo ya miḓi ya Gathi na Jabune na Ashidodo, a konou vusa miḓi tsini ha Ashidodo na huṅwe vhukati ha Vhafilista. ₇Mudzimu a mu farisa a tshi lwa na Vhafilista na musi a tshi lwa na Maarabia vhe vha vha vha tshi dzula Guru Baali na musi a tshi lwa na Vhameuni. ₈Vhaamoni vha isa nduvho ha Uzia, bvumo ḽawe ḽa swika na masakhani a Egipita, nge a vha e na maanḓa.

₉Uzia a fhaṱa dzithawara Jerusalema Khoroni ya Khuḓa na Khoroni ya Govha na khuḓani ya mutsheṱo, a dzi khwaṱhisa. ₁₀A ita na u fhaṱa dziṅwe phangani, a bwa bidzi nnzhi, nge a vha e na masambi manzhi a kholomo zwilindini na midavhini. O vha e na vhathu vha no shuma masimuni awe na a minḓirivhe mivhunduni na masimuni o nonelaho, ngauri o vha a tshi funa mavu.

₁₁Uzia o vha e na mmbi ya vhanna vho gudiswaho vhukuma, vhe vha vha vha tshi dzula vho ḓilugisela u bva pfumo nga gomane dzi tshi ya nga tshivhalo tshavho, vha tshi kuvhanganyiwa nga muṅwaleli wawe Jeiele na Maaseya we a vha e ṋegota, vha tshi langwa nga Hanania, muṅwe wa vhakoma vha musanda. ₁₂Tshivhalo tshoṱhe tsha vharangaphanḓa vha miṱa tshi no langa vhanna vha lwaho tsho vha tshi 2 600. ₁₃Vho vha vha tshi langa mmbi ya vhanna vha 307 500 vho gudiswaho zwa nndwa, mmbi ya maanḓa ine ya tikedza khosi i tshi lwa na maswina ayo. ₁₄Uzia o vha a tshi ṋea vhahali vhoṱhe zwiṱangu na mafumo na miṅadzi na madzhasi a u ḓipilela na vhura na gatho. ₁₅Afho Jerusalema vhatsila vhawe vho vha vho ita mitshini ya u posa misevhe na ya u posa matombo i dzithawarani na khuḓani dza mitsheṱo. Bvumo ḽawe ḽa swika kule, a vha na maanḓa mahulu nge a vha a tshi fariswa nga Mudzimu.

₁₆Huno musi khosi Uzia o no vha na maanḓa, a thoma u ḓihudza, u ralo ha vha u ḓiṱulela khombo. Uzia a nyadza Muṋe washu Mudzimu wawe nga u dzhena thembeleni ya Muṋe washu a dubisa zwioro kha aḽiṱari ya zwioro. ₁₇Tshifhe Azaria a ṱuwa na vhaṅwe vhotshifhe vha 80 vha sa ofhi vha mu tevhela vha swika vha dzhena. ₁₈Vha imedzana nae vha ri, “Thovhela Vho-Uzia, a vha na pfanelo ya u dubisela Muṋe washu zwioro. Hoyo ndi mushumo wa vhotshifhe vhaḓuhulu vha Aroni, ndi vhone vhe vha kumedzwa Mudzimu uri vha dubise zwioro. Nga vha bve hafhano hukhethwa, vho khakhela Muṋe washu Mudzimu, ha tsha ḓo vha ṋea vhuhulwane.”

₁₉Uzia o vha o fara mudzio wa zwioro nga tshanḓa a tshi ṱoḓa u dubisa zwioro, a mbo ḓi sinyuwa. Musi o halifhela vhotshifhe vhe henefho phanḓa ha aḽiṱari ya zwioro thembeleni ya Muṋe washu, tshifhaṱuwo tshawe tsha mbo ḓi shatwa vhulwadze vhu ofhisaho ha lukanda. ₂₀Musi tshifhe muhulu Azaria na vhotshifhe vhaṅwe vhoṱhe vha tshi mu sedza, vha vhona tshifhaṱuwo tshawe tsho shatwa nga vhulwadze ha lukanda, vha mbo ḓi ṱavhanya vha mu bvisela nnḓa. Vhukuma ene muṋe o vha o no ḓilugisela u ṱuwa nge ya vha i ṱhamu ya Muṋe washu.

₂₁Khosi Uzia o lwala uho vhulwadze ha lukanda a vhuya a dzama. O vha a tshi dzula nḓuni yawe i re thungo, a si tsha dzhena thembeleni ya Muṋe washu. Mishumo yawe yoṱhe o vha a si tsha i shuma, ṅwana wawe Jothamu a tshi dzula pfamoni, a tshi vhusa vhathu vha shango.

₂₂Mafhungo maṅwe a Uzia, u bva mathomoni u swika magumoni, o ṅwalwa nga muporofita Yesaya ṅwana wa Amutsi. ₂₃Uzia a dzama, a swiṱwa tsini ha zwalo he ha vha hu ha mahosi, a si swiṱwe zwaloni zwa musanda, nge vha ri, “O vha e na vhulwadze vhu ofhisaho ha lukanda.” Ṅwana wawe Jothamu a vha khosi vhudzuloni hawe.