2 KORONIKA 25

₁Amasia a tshi vha khosi o vha e na miṅwaha ya 25, a vhusa e Jerusalema a fhedza miṅwaha ya 29. Mme awe o vha a tshi pfi Jehuadini, wa Jerusalema. ₂Amasia o ita zwi takadzaho Muṋe washu, hone ho ngo zwi ita nga mbilu yoṱhe. ₃Musi muvhuso wa Amasia u tshi tou khwaṱha, a vhulaha magota vho vhulahaho vhamusanda khotsi awe. ₄Naho zwo ralo ho ngo vhulaha vhana vhavho, o tou tevhedza zwo ṅwalwaho buguni ya Mulayo wa Mushe he Muṋe washu a laya a ri, “Vhokhotsi vha songo fela milandu ya vhana vhavho, na vhana vha songo fela milandu ya vhokhotsi avho, muṅwe na muṅwe u fela vhutshinyi hawe ene muṋe.”

₅Khosi Amasia a kuvhanganya vhathu vha Juda, a vha kumedza vhalangammbi na vhalangagomane vha Juda ḽoṱhe na Benyamini, zwi tshi ya nga miṱa yavho. A vhala vhoṱhe u bva kha vha miṅwaha ya 20 a wana vhe vhanna vha 300 000 vho teaho u bva pfumo, vhane vha kona u fara pfumo na tshiṱangu. ₆Amasia a ita na u thola vhahali vha 100 000 vha no bva Israele a vha holela nga siliva ine ya nga vha khilogiramu dza 3 400.

₇Huno ha ḓa muḓinḓa wa Mudzimu khae a ri, “Thovhela, mmbi hedzi dza Israele dzi songo tshimbila navho, ngauri Muṋe washu ha imi na Vhaisraele, ha imi na muthihi wa vhathu vha Efraimi. ₈Nangwe vha bva vha yo lwa nga nungo dzoṱhe nndwani, Mudzimu u ḓo vha laṱa vha tshi lwa na maswina, ngauri Mudzimu u na maanḓa a u farisa muthu kana u mu laṱa.”

₉Amasia a vhudzisa uyo muḓinḓa wa Mudzimu a ri, “Zwino iḽa siliva ya khilogiramu dzine dza nga vha 3 400 ye nda ṋea mmbi dza Vhaisraele?”

Uyo muḓinḓa wa Mudzimu a fhindula a ri, “Muṋe washu u a kona u vha ṋea zwi no fhira zwenezwo.”

₁₀Ndi hone Amasia a tshi humisa idzo mmbi dzi no bva kha ḽa Efraimi, a ri dzi ye hayani. Vhanna avho vha sinyutshela vhathu vha Juda, vha livha hayani vha tshi tou duga nga mbiti.

₁₁Ndi hone Amasia a tshi vusa nungo dzawe, a ranga mmbi yawe phanḓa ya livha Govhani ḽa Muṋo, henefho a vhulaha vhanna vha Edomo vha 10 000. ₁₂Mmbi ya Juda ya ita na u thuba vhanna vha 10 000 vha tshi kha ḓi tshila, vha vha isa muṱumbani wa luwa, vha vha sukumedzela fhasi, vhoṱhe vha thathekana.

₁₃Zwenezwo mmbi dza Vhaisraele dze Amasia a dzi humisa, a si dzi tendele dzi tshi ya nndwani, dza mbo ḓi dia miḓi ya Juda u bva Samaria u swika Bethe Horoni. Vha vhulaha vhathu vha 3 000, vha thuba thundu nnzhi vha i hwala vha ṱuwa nayo.

₁₄Musi Amasia a tshi vhuya a tshi bva u kunda Vhaedomo, a vhuya na midzimu ya vhathu vha Edomo. Amasia a imisa iyo midzimu ya vho vha yawe, a i gwadamela, a i dubisela zwioro. ₁₅Muṋe washu a sinyutshela Amasia, a ruma muṅwe muporofita a ya khae a swika a ri, “Ndi mini vha tshi luvha midzimu ya havha vhathu, ye ya kundwa u tshidza vhathu vha hayo zwanḓani zwavho?”

₁₆Musi a tshi kha ḓi amba khosi ya mu vhudza ya ri, “Vhone ro vha vhea uri vha vhe mueletshedzi wa khosi naa? Nga vha fhumule, nṋe ndi a vha vhulaha!”

Ndi hone muporofita uyo a tshi fhumula, hone a ri, “Nṋe ndi a zwi ḓivha uri Mudzimu o ḓiimisela u vha lozwa, nge vha ita hezwo, nahone vha si thetshelese ndi tshi vha eletshedza.”

₁₇Musi Amasia khosi ya Juda o no vhudzisana na vhaeletshedzi vhawe, a ruma vhaḓinḓa vha ya ha Juasi, ṅwana wa Juahasi ṅwana wa Jehu khosi ya Israele, a ita khaedu a ri, “Nga vha ḓe ri lwe.”

₁₈Hone Juasi khosi ya Israele a fhindula Amasia khosi ya Juda a ri, “Mutshutshungu wa Libanoni wo vhuya wa ruma muḓinḓa a ya ha mukedara wa Libanoni a ri, ‘Tenda ṅwananyana wau a dzewe nga ṅwana wanga.’ Hu si kale ha fhira phukha ya Libanoni ya kandekanya uyo mutshutshungu. ₁₉Vhone vha ri vho kunda Vhaedomo, zwino vha vho ḓihudza. Hone nga vha ḓidzulele zwavho hayani! Ndi mini vha tshi levha? A vha zwi vhoni uri vha ḓiṱulela khombo khathihi na shango ḽa Juda?”

₂₀Hone Amasia a si zwi thetshelese. Mudzimu o vha o tou zwi funa uri Amasia a kundiwe nga Juasi, nge a gwadamela midzimu ya Edomo. ₂₁Ndi hone Juasi khosi ya Israele a tshi bva pfumo a yo lwa na Amasia khosi ya Juda, ha lwiwa Bethe Shemeshe kha ḽa Juda. ₂₂Vhajuda vha kundwa nga Vhaisraele, muṅwe na muṅwe a shavhela hayani hawe. ₂₃Juasi khosi ya Israele a thuba Amasia khosi ya Juda, ṅwana wa Juasi ṅwana wa Ahasia, henefho Bethe Shemeshe. Ndi hone Juasi a tshi mu isa Jerusalema a swika a pwasha mutsheṱo wa Jerusalema u bva Khoroni ya Efraimi u swika Khoroni ya Khuḓa, tshikhala tshine tsha nga ita mitha dza 200. ₂₄Juasi a dzhia musuku woṱhe na siliva yoṱhe na zwithu zwoṱhe zwe zwa vha zwi thembeleni ya Mudzimu, zwe zwa vha zwi tshi londolwa nga Obede Edomo, a dzhia na zwa mbulungeloni dza pfamo, a ita na u thuba vhathu vha u farelwa, a vhuelela Samaria.

₂₅Amasia khosi ya Juda, ṅwana wa Juasi, o tshila a fhedza miṅwaha ya 15 musi Juasi khosi ya Israele, ṅwana wa Juahasi, o no dzama. ₂₆Mafhungo maṅwe a Amasia, u bva mathomoni u swika magumoni, o ṅwalwa buguni ya Histori ya Mahosi a Juda na Israele. ₂₇U bva tshee Amasia a furalela Muṋe washu, vha mu langana Jerusalema, ene a shavhela muḓini wa Lakhishi, hone vha ruma vhathu vha mu tevhela Lakhishi vha mu vhulahela henengei. ₂₈Tshitumbu tsha Amasia tsha iswa Jerusalema tsho hwalwa nga bere, a swiṱwa zwaloni zwa musanda Muḓini wa Dafita.