2 KORONIKA 2

₁Solomoni a bvisa ndaela dza u fhaṱela dzina ḽa Muṋe washu thembele na pfamo ya musanda ya ene muṋe. ₂A ṋea vhanna vha 70 000 mushumo wa u hwala thundu dza u fhaṱa, na vhanna vha 80 000 a vha ṋea mushumo wa u tsheṱa matombo zwikwarani, a vhea vhanna vha 3 600 vha u langa vhenevho.

₃Solomoni a swikisa mafhungo haya ha khosi Hiramu wa Tiro a ri, “Nga vha nthumele matanda a mukedara sa zwe vha itela khotsi anga Dafita zwiḽa vha tshi vha rumela mikedara ya u fhaṱa pfamo ya u dzula khayo. ₄Zwino nṋe ndi ṱoḓa u fhaṱela dzina ḽa Muṋe washu Mudzimu wanga thembele, nda mu kumedza yone uri hu fhiswe zwioro phanḓa hawe, a dzule a tshi ṋekedzwa vhurotho vhune ha kumedzwa Ene, a ṋekedzwa zwiṱhavhelo zwi fhiswaho misi yoṱhe nga matsheloni na nga madekwana na nga Dzisabatha na nga vhuṱambo ha Ṅwedzi Muswa na nga vhuṱambo ho vhewaho ha Muṋe washu Mudzimu washu. Heyo ndi ndayo ya Vhaisraele ya lini na lini. ₅Thembele ine nda ḓo i fhaṱa i ḓo vha khulwane, ngauri Mudzimu washu u fhira midzimu miṅwe yoṱhe. ₆Huno ane a nga kona u mu fhaṱela thembele ndi nnyi? Hufha ḽiṱaḓulu naho ḽi ḽiṱaḓulu ḽa nṱha-nṱha a sa koni u fhelela khaḽo. Ndi nga tou fhaṱa nnḓu ine ra nga mu ṋekedza nduvho khayo.

₇“Zwino nga vha nthumele munna wa mutsila kha mushumo wa zwa musuku na siliva na musinaseṱha na tsimbi na zwa masila a tshisumbusumbu na muridili na matswuku, a vhe na nḓivho ya u vhaḓa matombo, onoyo u ḓo shuma na vhatsila vha Juda na Jerusalema vhe vha waniwa nga khotsi anga Dafita. ₈Vha nthumele na matanda a mukedara na mupaini na dziṅwe thanda dzavhuḓi dza Libanoni, ngauri ndi a zwi ḓivha uri vhanna vha havho ndi vhakoni kha u rema miri henefho. Vhanna vha hashu vha ḓo shuma na vha havho, ₉vha nngwanela matanda manzhi, ngauri thembele ine nda i fhaṱa i fanela u vha khulu ya manakanaka. ₁₀Vhashumi vhavho vha maṱaka vha u rema miri ndi ḓo vha ṋea thani dza 3 300 dza goroi na thani dza 3 300 dza baḽi na ḽitha dza 400 000 dza waini na ḽitha dza 400 000 dza mapfura a muolivi.”

₁₁Khosi Hiramu wa Tiro a ṅwalela Solomoni luṅwalo a tshi mu fhindula a ri, “Yahavee u funa vhathu vhawe, ndi zwe a ita uri vhone vha vhe khosi yavho.” ₁₂Hiramu a dovha a ri, “Nga hu rendwe Yahavee Mudzimu wa Israele Musiki wa ḽiṱaḓulu na ḽifhasi! O ṋea khosi Dafita ṅwana wa vhuṱali a re na ṱhalukanyo na vhusedzi, ene u ḓo fhaṱela Yahavee thembele, a dovha a ḓifhaṱela pfamo. ₁₃Ndi khou ruma Huramu mueletshedzi wanga ha vhone, ndi mutsila vhukuma. ₁₄Mme awe o vha e wa tsinde ḽa Dani, khotsi awe e wa Tiro. Munna uyo o gudiswa mushumo wa zwa musuku na siliva na musinaseṱha na tsimbi na tombo na thanda na zwa masila a muridili na tshisumbusumbu na sila ḽitswuku na lukhaha. U na nḓivho kha zwa tshakha dzoṱhe dza zwa u vhaḓa matombo nahone a nga bvisa tshifanyiso tshifhio na tshifhio tshe a ṋewa. U ḓo shuma na vhatsila vhavho na vha muṋe wanga, khosi Dafita khotsi avho. ₁₅Zwino vhone muṋe wanga nga vha rumele vhashumi vhavho goroi na baḽi na mapfura a muolivi na waini sa zwe vha fulufhedzisa. ₁₆Riṋe ri ḓo gonya thavha dza Libanoni ra rema matanda oṱhe a mukedara ane vha a ṱoḓa, ra a vhofha a ita madzanda, ra a tshimbidza lwanzheni ra a swikisa Jopa, vhone vha konou a dzhia vha gonya nao Jerusalema.”

₁₇Khosi Solomoni a vhala vhatsinda vhoṱhe vhe vha vha vha tshi dzula shangoni ḽa Israele. Izwo zwo tevhela u vhaliwa ha vhathu he ha itwa nga khotsi awe Dafita. Vhatsinda avho vha wanala vhe 153 600. ₁₈Vha 70 000 a vha hwesa mushumo wa u hwala thundu ya u fhaṱa, vha 80 000 vha vha vha u vhaḓa matombo dzithavhani, na vhanna vha 3 600 vha vha langaho vha tshi ita uri vha shume.