1 MAHOSI 5

₁Musi Hiramu khosi ya Tiro a tshi pfa uri Solomoni o ḓodzwa mapfura a vhumbwa khosi vhudzuloni ha khotsi awe Dafita, a ruma vhaḓinḓa vhawe ha Solomoni, ngauri o vha e khonani ya Dafita. ₂Solomoni a humisela malaedzwa ha Hiramu a ri,

₃“Vhone vha a ḓivha uri nndwa dze khotsi anga Dafita vha dzi lwa matungo oṱhe dzo vha kundisa u fhaṱela dzina ḽa Muṋe washu Mudzimu wavho thembele, Muṋe washu a vhuya a ita uri vha kande maswina avho nga milenzhe. ₄Huno zwino Muṋe washu Mudzimu wanga o nndadzela shango masia oṱhe, a hu tshee na swina kana khombo. ₅Zwenezwo ndo elekanya uri ndi fhaṱele dzina ḽa Muṋe washu Mudzimu wanga thembele, nga he Muṋe washu a vhudza khotsi anga Dafita a ri, ‘Ṅwana wau ane nda ḓo mu vhea kha khuluṋoni vhudzuloni hau u ḓo fhaṱela dzina ḽanga thembele.’ ₆Zwino nga vha ṋee ndaela uri ndi remelwe mikedara thavhani ya Libanoni. Vhanna vhanga vha ḓo shuma na vhavho, nṋe ndi ḓo vha holela nga hune vhone vha i ta ngaho. Vhone vha a ḓivha uri riṋe a ri na vhatsila vhane vha kona u vhaḓa miri unga Vhasidoni.”

₇Hiramu a tshi pfa mafhungo a Solomoni, a takala nga maanḓa, a ri, “Nga hu rendwe Yahavee ṋamusi, ngauri o ṋea Dafita ṅwana wa vhuṱali uri a vhuse lushaka holu luhulu.”

₈Ndi hone Hiramu a tshi swikisa ipfi ha Solomoni a ri, “Mafhungo avho o swika kha nṋe, ndi ḓo ita zwoṱhe zwine vha zwi ṱoḓa nda vha ṋea matanda a mikedara na mipaini. ₉Vhanna vhanga vha ḓo a dzhia Libanoni vha a ḓisa lwanzheni, vha a vhofhekanya a vha magungwa vha a ḓisa nga lwanzheni vha a isa hune vhone vha hu amba. Henefho vha ḓo a vhofholola, vhanna vhavho vha konou a dzhia vha ṱuwa nao. Tshine nṋe nda tshi tama ndi uri vhone vha ṋee vha no dzula musanda wanga zwiḽiwa.”

₁₀Ngauralo Hiramu a ḓi isela Solomoni matanda oṱhe a mikedara na mipaini ane a a ṱoḓa, ₁₁Solomoni a ṋea Hiramu dzithani dza maṱiriki dza 2 000 dza goroi na mapfura a muolivi a dzilitha dza 4 400 uri zwi ḽiwe nga muṱa wawe. Solomoni a ḓi itela Hiramu zwenezwo ṅwaha nga ṅwaha. ₁₂Muṋe washu a ṋea Solomoni vhuṱali, nga he a mu fulufhedzisa ngaho. Hiramu na Solomoni vha ḓi dzula vha tshi pfana, vha ita na u vhofha mulanga.

₁₃Khosi Solomoni a ṅwala vhashumi vha no bva kha ḽa Israele ḽoṱhe, vha vha vhanna vha 30 000. ₁₄A vha ruma Libanoni vha tshi tou sielisana nga zwigwada zwa 10 000 nga ṅwedzi. Vho vha vha tshi fhedza ṅwedzi vhe Libanoni, vha fhedza miṅwedzi mivhili vhe hayani. Adoniramu o vha e ene ane a langa mushumo wonoyo wa khombekhombe. ₁₅Solomoni o vha e na vhatsheṱi vha matombo vha 80 000 mivhunduni na vhahwali vha 70 000, ₁₆a vhea vhanna vha 3 300 uri vha ingamele uyo mushumo vha tshi langa vhashumi. ₁₇Khosi ya vha laya uri vha tsheṱe matombo mahulwane avhuḓi uri a vhe one a muteo wa thembele. ₁₈Vhatsila vha Solomoni na Hiramu na vhanna vha Gebala vha tumula matanda vha a dzudzanya na matombo a u fhaṱa thembele.