2 KORONIKA 1

₁Solomoni ṅwana wa khosi Dafita o pfumbisa muvhuso wawe wa khwaṱha nge Muṋe washu Mudzimu wawe a vha e nae, a mu hulisa zwihulu.

₂Khosi Solomoni a amba na Vhaisraele vhoṱhe, vhalangammbi na vhalangagomane na vhahaṱuli na vharangaphanḓa vha Israele na ṱhoho dza miṱa, ₃Solomoni na tshivhidzo tshoṱhe vha gonya tshikwarani tsha Gibioni, ngauri dennde ya u ṱangana na Mudzimu yo fhaṱwaho phangani nga Mushe muḓinḓa wa Muṋe washu yo vha i henefho. ₄Zwino mbulungelo ya Mudzimu khosi Dafita o vha o i hwala Kiriathi Jiarimu a i isa Jerusalema, a i vhea fhethu he a i lugisela, ngauri o vha o i akhela dennde henefho. ₅Hone aḽiṱari ya musinaseṱha yo fhaṱwaho nga Betsaliele ṅwana wa Uri, ṅwana wa Huru, yo vha i muḓini wa Gibioni phanḓa ha dennde ya Muṋe washu. Khosi Solomoni na tshivhidzo vha luvha Muṋe washu henefho. ₆Solomoni a takuwa a ya kha aḽiṱari ya musinaseṱha phanḓa ha Muṋe washu a re denndeni ya u ṱangana nae, a ṋekedza zwiṱhavhelo zwi fhiswaho zwine zwa swika tshigidi.

₇Vhusiku honoho Muṋe washu a ḓisumbedza Solomoni a mu vhudza a ri, “Humbela tshine wa funa ndi tshi u ṋea.”

₈Solomoni a fhindula Mudzimu a ri, “Wo itela khotsi anga Dafita vhuthu vhuhulu, nṋe wa nnyita khosi vhudzuloni hawe. ₉Zwino, Mudzimu Muṋe washu, khwaṱhisa zwe wa fulufhedzisa khotsi anga Dafita, ngauri wo nnyita khosi uri ndi vhuse vhathu vho andaho unga buse ḽa shango. ₁₀Mphe vhuṱali na nḓivho, uri ndi kone u ranga vhathu havha phanḓa, ngauri ane a nga kona u vhusa lushaka ulu luhulu a nga vha nnyi?”

₁₁Mudzimu a fhindula Solomoni a ri, “Vhunga zwi zwenezwo zwe mbilu yau ya tama, ú songo humbela thundu na lupfumo kana khuliso kana lufu lwa maswina au, vhunga ú songo humbela u lalama, wó humbela vhuṱali na nḓivho uri u kone u vhusa vhathu vhanga vhe nda u ita khosi uri u vha vhuse, ₁₂zwenezwo ndi ḓo u ṋea vhuṱali na nḓivho. Ndi ḓo u ṋea na thundu na lupfumo na khuliso, zwi sa athu vhuya zwa ṋewa iṅwe khosi yo u rangaho phanḓa, na ine ya ḓo u tevhela a i nga fani na iwe.”

₁₃Ndi hone Solomoni a tshi takuwa a livha Jerusalema a tshi bva tshikwarani tsha Gibioni, phanḓa ha dennde ya u ṱangana na Mudzimu. Solomoni a vhusa Vhaisraele.

₁₄Solomoni a vhumba mmbi ya gariki dza 1 400 na bere dza 12 000, dziṅwe a dzula nadzo Jerusalema, dziṅwe a dzi vhea miḓini ya dzigariki. ₁₅A khokha siliva na musuku Jerusalema zwa anda unga matombo, matanda a mukedara a anda unga mihuyu matsindeni a zwikwara. ₁₆Bere dza Solomoni dzo vha dzi tshi rengwa Egipita na Kue, vhashavhi vha musanda vha tshi dzi renga Kue. ₁₇Gariki vho vha vha tshi renga Egipita nga mangwende a 600 a siliva, bere i tshi rengwa nga mangwende a 150. Vho vha vha tshi ita na u dzi rengisela mahosi a Vhahithi na Vhaaramu.