2 KORONIKA 19

₁Khosi Josafati wa Juda a vhuelela pfamoni yawe Jerusalema a songo huvhala. ₂Muporofita Jehu, ṅwana wa Hanani, a bva u yo mu ṱanganedza, a vhudza khosi a ri, “Vha vhona zwi zwone u farisa vhavhi, vha ima na vhane vha vhenga Muṋe washu? Muṋe washu o vha sinyutshela nga zwenezwo. ₃Naho zwo ralo, vhone vha kha ḓi vha na zwivhuya, vho thutha zwifanyiso zwa thanda zwa Ashera mudzimu wa tshisadzi fhano shangoni, vha linga u tevhedza zwine Mudzimu a zwi funa.”

₄Josafati o vha a tshi dzula Jerusalema, hone o vha a tshi ita a tshi bva a tshi yo dalela vhathu vhawe, u bva Bierisheba u swika mivhunduni ya Efraimi, a tshi vha vhuedzedza ha Muṋe washu Mudzimu wa vhokhotsi avho. ₅Josafati a vhea vhahaṱuli shangoni iḽo, miḓini yoṱhe ya Juda yo tangedzwaho nga mitsheṱo. ₆A vha laya a ri, “Ni elekanye zwavhuḓi zwine na ita, ngauri a ni haṱuleli muthu, ni haṱulela Muṋe washu, Ene u na inwi musi ni tshi haṱula. ₇Zwino ofhani Muṋe washu. Haṱulani nga vhusedzi ngauri Mudzimu Muṋe washu ha pfani na vhufhura na tshiṱalula na tshanḓanguvhoni.”

₈Jerusalema na hone, Josafati a vhea Vhalivi na vhotshifhe na ṱhoho dza miṱa ya Vhaisraele uri vha haṱule nga mulayo wa Muṋe washu na u pfumedzanya vhadzulapo vha uyo muḓi. ₉A vha laya a ri, “Ni shume nga u fulufhedzea na nga mbilu yoṱhe ni tshi ofha Muṋe washu. ₁₀Mulandu muṅwe na muṅwe une wa ḓiswa kha inwi u tshi bva kha vhadzulapo vha haṋu, u nga vha wa u vhulaha muthu kana ho pfukiwa mulayo kana ndayo kana zwidayo, ni vha laye uri vha songo khakhela Muṋe washu, a sa ḓo sinyutshela inwi na vha haṋu. Itani nga u ralo, ndi hone ni sa ḓo tshinya. ₁₁Tshifhe muhulu Amaria ni ḓo hwedza khae milandu yoṱhe ya zwa Muṋe washu, Zebadia ṅwana wa Ishmaele, murangaphanḓa wa tsinde ḽa Juda, ni ḓo hwedza khae milandu ya zwa shango. Vhalivi vha ḓo shuma vhe vhaṅwaleli vha u vhona uri zwe zwa haṱulwa khoroni zwi tevhedzwe. Shumani ni na nungo, ngavhe Muṋe washu a tshi vha na vhane vha ita zwi re zwone.”