2 KORONIKA 20

₁Ngavhuya mmbi dza Muaba na Amoni, khathihi na vhane vha ima navho, vha Meuni, vha dia Juda vha tshi ḓa u lwa na Josafati.

₂Zwa ḓivhiswa khosi Josafati ha pfi, “Hu na mmbi khulu i no ḓa u lwa navho i tshi bva Edomo, i khou bva seli ha Lwanzhe lwa Muṋo. Vho no ḓi swika Hatsatsoni Thamara.” (Iḽo ndi ḽiṅwe dzina ḽa Engedi.) ₃Josafati a tshenuwa, a rabela a vhudzisa Muṋe washu, a ḓivhadza uri vhathu vhoṱhe vha Juda vha ḓidzime zwiḽiwa. ₄Vhathu vha miḓi yoṱhe ya Juda vha kuvhangana Jerusalema vha humbela Muṋe washu uri a vha farise.

₅Ndi hone Josafati a tshi takuwa tshivhidzoni tsha Juda na Jerusalema thembeleni ya Muṋe washu phanḓa ha Muṱa Muswa, ₆a rabela a ri, “Yawee Muṋe washu Mudzimu wa vhokhotsi ashu, kani a u Mudzimu a re ṱaḓulu? Hufha u tshi vhusa mivhuso yoṱhe ya dzitshakha. Iwe u na maanḓa na nungo, a hu na ane a nga imedzana na Iwe. ₇Yawee Mudzimu washu, ndi Iwe wo thathaho vhadzulapo vha ḽino shango u swikani ha vhathu vhau Vhaisraele, wa ḽi ṋea vhaḓuhulu vha Abrahamu khonani yau uri ḽi vhe ḽavho lini na lini. ₈Vho dzula khaḽo vha fhaṱela dzina ḽau hukhethwa khaḽo, vha tshi ri, ₉‘Arali ra welwa nga khombo ya pfumo ḽa u ri lifhedza kana dwadze kana nḓala, ri ḓo ima phanḓa ha thembele yenei ine ya vhidzwa nga dzina ḽau, ra u lilela ro ṱungufhala, Iwe wa ri pfa, wa ri tshidza.’

₁₀“Zwino vhanna vha Amoni na vha Muaba na vha Edomo ngevha vho ḓa. Zwiḽa Vhaisraele vha tshi bva Egipita a wo ngo vha tendela vha tshi dzhena shangoni ḽa avho vhathu, ndi zwe vha vha litsha vha si vha lozwe. ₁₁Vhona uri vha khou ri lifhedza hani nga u ḓa vha ri thatha shangoni ḽe wa ri ṋea uri ḽi vhe ḽashu. ₁₂Yawee Mudzimu washu, a vha haṱulwi zwavho naa? Riṋe a ri na maanḓa a u imedzana na mmbi hei khulu ine ya khou ri levhela. Riṋe a ri ḓivhi tshine ra nga tshi ita, ro lavhelesa henengeo.”

₁₃Vhanna vhoṱhe vha Juda na vhasadzi vhavho na vhana vhavho na vhaṱuku, vho vha vho ima henefho phanḓa ha Muṋe washu. ₁₄Ndi hone Muya wa Muṋe washu a tshi tsa a ḓa kha muṅwe Mulivi we a vha o ima henefho guvhanganoni. O vha a tshi pfi Jahasiele ṅwana wa Zakaria, ṅwana wa Benaya, ṅwana wa Jeiele, ṅwana wa Mathania, wa lutsinga lwa Asafu. ₁₅Jahasiele a ri, “Thovhele Josafati na vhoṱhe vha dzulaho Juda na Jerusalema, thetshelesani! Muṋe washu u ri, ‘Ni songo ofha tshithu, ni songo kulea nungo ni tshi vhona mmbi iyo khulu. Nndwa a si yaṋu ndi ya Mudzimu. ₁₆Matshelo ni bve ni yo lwa navho. Vha ḓo vha vha tshi khou gonya nga Phara ya Tsitsi, ni ḓo vha wana hune govha ḽa guma hone phangani ya Jeruele. ₁₇Nndwa iyo a ni nga ḓo i lwa. Imani vhuimoni haṋu, ni ime no khwaṱha, ni vhone Yahavee a tshi ni lamulela. Inwi vha Juda na Jerusalema ni songo ofha tshithu, ni songo kulea nungo. Matshelo ni bve ni yo livhana navho, Yahavee u ḓo vha na inwi.’ ”

₁₈Khosi Josafati a kotama tshifhaṱuwo tshawe tsha kwama fhasi, vhathu vhoṱhe vha Juda na Jerusalema vha gwadama phanḓa ha Muṋe washu vha luvha. ₁₉Ndi hone vhaṅwe Vhalivi vha mutupo wa Kehathi na Kora vha tshi takuwa vha renda Muṋe washu Mudzimu wa Israele, vha tshi tou ṱavha mukosi.

₂₀Nga matshelo vha fhindutshela phangani ya Thekua. Musi vha tshi takuwa, Josafati a ima a ri, “Inwi vhathu vha Juda na Jerusalema, nthetsheleseni! Fulufhelani Muṋe washu, ndi hone ni tshi ḓo ima na khwaṱha, fulufhelani vhaporofita, ndi hone zwi tshi ḓo ni nakela.” ₂₁Josafati musi o no eletshedza vhathu, a vhea vhanna vhane vha ḓo imbela Muṋe washu, vha tshi renda vhugala ha vhukhethwa hawe, vho ranga mmbi phanḓa vha tshi ri, “Nga hu rendwe Muṋe washu! Lufuno lwawe a lu shanduki!”

₂₂Musi vha tshi thoma u imba, vha tshi renda, Muṋe washu a vha o no vhea vhalaleli vha u kovhola vhanna vha Amoni na vha Muaba na vha Edomo vhe vha vha vha tshi khou dia Juda, vha vha kunda. ₂₃Vhanna vha Amoni na vha Muaba vha vutshela vhanna vha Edomo uri vha vha lozwe tshoṱhe. Musi vho no fhedza u vhulaha vhanna vha Edomo, vha thoma u fhedzana nga tshavho.

₂₄Musi vhanna vha Juda vha tshi swika fhethu ho livhanaho na phanga, vha tshi sedza mmbi iḽa khulu, vha vhona zwitumbu fhedzi zwo rambalala fhasi, ho vha hu si na we a vhuya a ponyoka. ₂₅Ndi hone Josafati na vhanna vhe a vha e navho vha tshi yo hwala zwe vha ṱangula vha ṱuwa nazwo, vha wana khazwo hu na thundu nnzhi na zwiambaro na zwithu zwa mutengo muhulu lwe vha si kone u hwala zwoṱhe vha ṱuwa nazwo. Ho vha hu na zwinzhisa zwe vha ṱangula lwe vha fhedza maḓuvha mararu vha tshi zwi kuvhanganya. ₂₆Nga ḓuvha ḽa vhuṋa vha kuvhangana Govhani ḽa Berakha, henefho vha renda Muṋe washu. Ndi zwine na ṋamusi ḽa kha ḓi pfi Govha ḽa Berakha (Thendo). ₂₇Vhanna vhoṱhe vha Juda na Jerusalema vha vhuelela Jerusalema vha tshi fhululedza, vho rangwa phanḓa nga Josafati, nge Muṋe washu a vha o vha takadza nga u kunda maswina avho. ₂₈Vha dzhena Jerusalema vha livha thembeleni ya Muṋe washu vha tshi khou lidza dziharipa na zwihwana na dziphalaphala. ₂₉Mivhuso yoṱhe ya mashango ya ofha Mudzimu musi vha tshi pfa zwe Muṋe washu a lwa na maswina a Vhaisraele. ₃₀Ha vha na mulalo muvhusoni wa Josafati nge Mudzimu wawe a vha o mu tsireledza masia oṱhe.

₃₁Josafati o vha khosi ya Juda e na miṅwaha ya 35, a vhusa e Jerusalema a fhedza miṅwaha ya 25. Mme awe o vha a tshi pfi Azuba, ṅwananyana wa Shilihi. ₃₂O kanda vhuṱalani ha khotsi awe Asa, a si vhuye a pambuwa khaho, a tshi ita zwi takadzaho Muṋe washu. ₃₃Hone zwitembele zwa midzimu zwikwarani zwa si thuthwe, na vhathu vha si livhise mbilu dzavho ha Mudzimu wa vhokhotsi avho.

₃₄Mafhungo maṅwe a muvhuso wa Josafati, u bva mathomoni awo u swika magumoni, o ṅwalwa buguni ya Histori ya Jehu ṅwana wa Hanani, eneo o ṅwalwa buguni ya Histori ya Mahosi a Israele.

₃₅Ngavhuya khosi Josafati a pfana na Ahasia khosi ya Israele we a vha o ita vhuvhi vhunzhi. ₃₆A pfana nae uri vha fhaṱe zwikepe vhuimazwikepe ha Etsioni Gebere, zwe zwa vha zwi tshi ya Tharashishi. ₃₇Eliesere ṅwana wa Dodavahu, wa Maresha, a porofita a tshi kaidza Josafati, a ri, “Muṋe washu u ḓo pwashekanya zwe vha ita nge vha pfana na Ahasia.” Nangoho zwikepe izwo zwa pwashekana, zwa si tsha kona u tala zwi tshi ya Tharashishi.