2 KORONIKA 18

₁Zwino Josafati khosi ya Juda a vha na lupfumo luhulu, a tou vha na bvumo, a dzetshelana na nnḓu ya Ahaba khosi ya Israele. ₂Hó no fhela miṅwahanyana Josafati a takuwa a yo dalela Ahaba muḓini wa Samaria. Ahaba a mu ṱhavhela nngu nnzhi na kholomo, a ṱhavhela na vhathu vhe a ḓa navho, a mu kunga uri a yo dia muḓi wa Ramotho kha ḽa Giliadi. ₃Ahaba khosi ya Israele a humbela Josafati khosi ya Juda a ri, “Vha nga ṱuwa na nṋe ra yo dia muḓi wa Ramotho kha ḽa Giliadi naa?”

Josafati a fhindula a ri, “Nṋe na vhone ri tshithu tshithihi, vhathu vhanga ndi vhathu vhavho, ri ḓo baḓekana navho nndwani.” ₄Huno Josafati a dovha a vhudza khosi ya Israele a ri, “Nga vha range u vhudzisa Muṋe washu.”

₅Ndi hone khosi ya Israele i tshi kuvhanganya vhaporofita vha 400 ya vha vhudzisa ya ri, “Ri bve pfumo ri yo lwa na muḓi wa Ramotho kha ḽa Giliadi kana ri litshe?”

Vhone vha fhindula vha ri, “Nga vha ye, Mudzimu u ḓo kumedza uyo muḓi zwanḓani zwavho.”

₆Hone Josafati a vhudzisa a ri, “A hu tshee na muṅwe muporofita wa Muṋe washu fhano ane a nga ri vhudzisela?”

₇Khosi ya Israele ya fhindula Josafati ya ri, “Hu kha ḓi vha na munna muthihi ane a nga ri vhudzisela ha Muṋe washu, hone ndi a mu vhenga ngauri ha vhuyi a porofita zwivhuya nga nṋe, zwi sokou vha zwa khombo misi yoṱhe. Ndi Mikhaya ṅwana wa Imila.”

Josafati a fhindula a ri, “Thovhele vha songo ralo.”

₈Ndi hone khosi ya Israele i tshi vhidza muṅwe wa vhaḓinḓa vhayo ya ri, “Ṱavhanyani ni ḓe na Mikhaya ṅwana wa Imila.”

₉Khosi ya Israele na Josafati khosi ya Juda vho vha vho ambara phuraphura dzavho dza vhuhosi, vho dzula kha khuluṋoni dzavho, luvhatani lwa u fhulela, tsini ha gethe ya khoro ya Samaria, vhaporofita vhoṱhe vha tshi khou porofita henefho phanḓa havho. ₁₀Zwino muṅwe wavho, Tsedekia ṅwana wa Khenaana, o vha o ita ṋanga dza tsimbi, a ḓivhadza a ri, “Muṋe washu u ri, ‘U ḓo runga Vhaaramu nga ṋanga hedzi wa vhuya wa vha lozwa.’ ” ₁₁Vhaporofita vhaṅwe vhoṱhe vho vha vha tshi khou ḓi porofita zwenezwo, vha tshi ri, “Nga vha yo dia muḓi wa Ramotho kha ḽa Giliadi, vha ḓo kunda, ngauri Muṋe washu u ḓo u kumedza zwanḓani zwavho.”

₁₂Muḓinḓa we a vha o ruṅwa u yo vhidza Mikhaya a mu vhudza a ri, “Nga vha vhone, vhaporofita vhaṅwe vhoṱhe vha khou amba ḽithihi, vha ri khosi zwi ḓo i nakela, na vhone vha ambe zwithihi navho, zwi takadzaho.”

₁₃Huno Mikhaya a ri, “Nga Muṋe washu a tshilaho, ndi ḓo mu vhudza zwenezwo zwine Mudzimu wanga a mmbudza.”

₁₄Musi a tshi swika, khosi ya mu vhudzisa ya ri, “Mikhaya, ri bve pfumo ri yo dia muḓi wa Ramotho kha ḽa Giliadi, kana ri songo ya?”

Mikhaya a fhindula a ri, “Nga vha ye, vha ḓo kunda, ngauri avho vhathu vha ḓo kumedzwa zwanḓani zwavho.”

₁₅Khosi ya mu vhudza ya ri, “Ndi ḓo vha anisa lungana nga dzina ḽa Muṋe washu uri vha mmbudze ngoho?”

₁₆Ndi hone Mikhaya a tshi fhindula a ri, “Ndo vhona Vhaisraele vhoṱhe vho balangana zwikwarani vha tshi nga nngu dzi si na mulisa, Muṋe washu a ri, ‘Vhathu havha a vha na muṋe wavho. Nndwa yo fhela, nga vha humele hayani.’ ”

₁₇Khosi ya Israele ya vhudza Josafati ya ri, “A tho ngo vha vhudza uri ha vhuyi a porofita zwivhuya nga nṋe, u porofita zwa khombo fhedzi?”

₁₈Mikhaya a dovha a ri, “Zwino nga vha thetshelese zwine Muṋe washu a amba! Ndo vhona Muṋe washu o dzula kha khuluṋoni yawe e na mara oṱhe o ima thungo ya tshauḽa tshawe na tshamonde. ₁₉Muṋe washu a ri, ‘Ndi nnyi ane a nga fhura Ahaba khosi ya Israele a yo dia muḓi wa Ramotho kha ḽa Giliadi, a yo fela henengei?’ Muṅwe a amba tshino, muṅwe a amba tshiḽa. ₂₀Muṅwe muya wa fhedza nga u ḓa wa ima phanḓa ha Muṋe washu wa ri, ‘Nṋe ndi ḓo mu fhura.’ Muṋe washu a vhudzisa a ri, ‘U ḓo mu fhura hani?’ ₂₁Muya wa fhindula wa ri, ‘Ndi ḓo bva nda vha muya wa mazwifhi milomoni ya vhaporofita vhoṱhe.’ Muṋe washu a ri, ‘Tshimbila u yo mu fhura, u ḓo zwi kona.’

₂₂“Zwino Muṋe washu o ita uri vhaporofita havha vhavho vha vha zwifhele. Muṋe washu o itela uri vha welwe nga khombo.”

₂₃Ndi hone Tsedekia ṅwana wa Khenaana a tshi takuwa a ya kha Mikhaya a mu vhanda luṱaha, a mu vhudzisa a ri, “Zwo ḓa hani Muya wa Muṋe washu a tshi bva kha nṋe a ḓa u amba na inwi?”

₂₄Mikhaya a fhindula a ri, “Izwo ni ḓo zwi ḓivha musi une na yo dzumbama ni tshi bva kamarani iṅwe na shavhela kha iṅwe.”

₂₅Khosi ya Israele zwenezwo ya bvisa ndaela ya ri, “Dzhiani Mikhaya ni mu vhuedzedze ha Amoni mulangi wa muḓi na ha Juasi ṅwana wa khosi, ₂₆ni swike ni ri, ‘Khosi i ri: Hoṋelani muthu hoyu dzhele, ni mu fhe vhurotho vhuṱuku na maḓi fhedzi u swika ndi tshi vhuya ndo takala ndi songo huvhala.’ ”

₂₇Mikhaya a ḓivhadza a ri, “Arali vha vhuya vha tshi tshila, izwo Muṋe washu u ḓo vha a songo amba nga mulomo wanga.” Mikhaya a dovha a ri, “Inwi vhathu noṱhe, thetshelesani zwe nda amba!”

₂₈Ndi hone Ahaba khosi ya Israele na Josafati khosi ya Juda vha tshi takuwa vha livha muḓini wa Ramotho kha ḽa Giliadi. ₂₉Khosi ya Israele ya vhudza Josafati ya ri, “Nṋe ndi ḓo dzhena nndwani ndo ḓikhakhisa, vhone vha ambare zwiambaro zwavho zwa vhuhosi.” Ndi hone khosi ya Israele i tshi ḓikhakhisa, ya dzhena nndwani.

₃₀Zwino khosi ya Aramu yo vha yo laya vhalangi vha gariki yayo ya ri, “Ni songo londa muthu na muthihi, a nga vha e muṱuku kana e muhulwane, ni londe khosi ya Israele fhedzi.” ₃₁Musi vhalangi vha gariki vha tshi vhona khosi Josafati, vha ri, “Vhukuma uyu ndi ene khosi ya Israele.” Vha rembuluwa uri vha mu wele, hone Josafati a ṱavha mukosi, Muṋe washu a mu lamukisa. Mudzimu a ita uri vha mu ṱutshele. ₃₂Musi vhalangi vha gariki vha tshi zwi vhona uri a si ene khosi ya Israele, vha litsha u mu pandamedza. ₃₃Muṅwe a sokou posa musevhe wawe a sa londi a pfula khosi ya Israele he zwitsimbi zwa tshiambaro tshawe tsha nndwa zwa ṱanganywa hone. Khosi ya vhudza mutshimbidzi wa gariki ya ri, “Ndo huvhala, tshimbidzani gariki ni mmvise hafhano nndwani!” ₃₄Nndwa ya lwiwa ḓuvha ḽoṱhe i tshi tou duga, khosi ya Israele ya ḓitika garikini yayo yo livhana na Vhaaramu ḽa vhuya ḽa kovhela. Ḽi tshi kovhela ya dzama.