2 KORONIKA 17

₁Josafati a vha khosi vhudzuloni ha khotsi awe, a pfumbisa vhuhosi hawe shangoni ḽa Israele, ₂a vhea mmbi miḓini yoṱhe ya Juda yo tangedzwaho nga mitsheṱo, a vhea vhahali kha ḽa Juda na miḓini yo thubiwaho nga khotsi awe shangoni ḽa Efraimi. ₃Muṋe washu o vha e na Josafati nge a kanda vhuṱalani ha makhulukuku wawe Dafita ha musi a tshi thoma u vhusa, a si luvhe midzimu ya Baali. ₄Ene o shumela Mudzimu wa khotsi awe, a thetshelesa ndayo dzawe, a si tevhedze maitele a Vhaisraele. ₅Muṋe washu a ita uri muvhuso wawe u ṱoke midzi, vhathu vha Juda vhoṱhe vha isa nduvho ha Josafati, a vha na lupfumo luhulu, a huliswa. ₆A tshila a tshi ita zwine Muṋe washu a zwi funa, a thutha zwitembele zwa zwikwarani na zwifanyiso zwa thanda zwa Ashera mudzimu wa tshisadzi shangoni ḽa Juda.

₇Nga ṅwaha wa vhuraru wa muvhuso wa Josafati, a ruma magota awe Benihaili na Obadia na Zakaria na Nathaniele na Mikhaya vha yo funza miḓini ya Juda. ₈Vhenevho vho fhelekedzwa nga Vhalivi vhaṱanu na vhaṋa na vhotshifhe vhavhili. Vhalivi vho vha vhe Shemaya na Nethania na Zebadia na Asaele na Shemiramotho na Jehonathani na Adonia na Tobia na Tobadonia, vhotshifhe vho vha vhe Elishama na Jehoramu. ₉Vho dzhia bugu ya Mulayo wa Muṋe washu, vha buḓekanya ḽoṱhe ḽa Juda, vha mona na miḓi yoṱhe ya Juda vha tshi funza vhathu.

₁₀Muṋe washu a ita uri mivhuso ya mashango oṱhe o tangaho Juda i dzhenwe nga nyofho ya si tsha lwa na khosi Josafati. ₁₁Vhaṅwe Vhafilista vha isela Josafati zwifhiwa na nduvho ya siliva, Vhaarabia vha mu isela masambi a nngu, thutha dza 7 700, na mbudzi dza 7 700.

₁₂Maanḓa a Josafati a ḓi hula a tshi ya, a fhaṱa madzhavhelo na miḓi ya u vhulungela zwiḽiwa shangoni ḽa Juda, ₁₃a shuma mishumo minzhi miḓini ya Juda. Jerusalema a vhea vhahali vhomakone. ₁₄Vha ṅwalwa zwi tshi ya nga miṱa yavho. Vha tsinde ḽa Juda, vhalangammbi vha zwigwada zwa 1 000, vho vha vhe na mulangammbi Adina, e na vhahali vha 300 000 vhane a vha langa. ₁₅Ha tevhela mulangammbi Jehohanani, e na vhahali vha 280 000, ₁₆ha tevhela Amasia ṅwana wa Zikhiri, ene o tou ḓikumedza u shumela Muṋe washu, e na vha 200 000. ₁₇Vha tsinde ḽa Benyamini vho vha vhe na mulangammbi Eliada, ene muhali nndwani, e na vhanna vha 200 000 vhane a vha langa, vho fara vhura na zwiṱangu. ₁₈Ha tevhela Jehozabadi, e na vhanna vha 180 000, vho shomaho u bva pfumo. ₁₉Ndi vhone vhanna vhe vha vha vha tshi shumela khosi Jerusalema, ha dovha ha vha na vhaṅwe vhahali vhe a vha vhea miḓini yo tangedzwaho nga mitsheṱo kha ḽoṱhe ḽa Juda.