2 KORONIKA 11

₁Musi Rehabiamu a tshi swika Jerusalema, a kuvhanganya vhahali vhomakone vha 180 000 vha matsinde a Juda na Benyamini, a tshi ri a bve pfumo a yo lwa na Vhaisraele uri muvhuso u vhuelela khae.

₂Hone ipfi ḽa Muṋe washu ḽa ḓa ha Shemaya muḓinḓa wa Mudzimu ḽa ri, ₃“Vhudza Rehabiamu ṅwana wa Solomoni khosi ya Juda na Vhaisraele vhoṱhe kha ḽa Juda na ḽa Benyamini u ri, ₄‘Yahavee u ri: Ni songo yo lwa na vha haṋu. Muṅwe na muṅwe waṋu nga a ye hayani ngauri izwo zwo itwa nga Nṋe!’ ” Ndi hone vha tshi thetshelesa maipfi a Muṋe washu, vha huma vha si tsha yo lwa na Jerobiamu.

₅Rehabiamu o dzula Jerusalema, a vusa miḓi ya Juda yo tsireledzwaho. ₆Ndi Betlehema na Etamu na Thekua ₇na Bethe Tsuru na Sokho na Adulamu ₈na Gathi na Maresha na Zifi ₉na Adoraimi na Lakhishi ₁₀na Azeka na Tsora na Ayaloni na Hebroni. Heyo yo vha i yone miḓi yo tsireledzwaho kha ḽa Juda na Benyamini. ₁₁Miḓi iyo a i fhaṱela mitsheṱo mihulu, a vhea vhalangammbi khayo na zwiḽiwa na mapfura a muolivi na waini, ₁₂a vhea zwiṱangu na mafumo miḓini yoṱhe, a i khwaṱhisa vhukuma. A vhusa ḽa Juda na ḽa Benyamini nga u ralo.

₁₃Vhotshifhe na Vhalivi vha madzingu oṱhe a Israele vha ima na Rehabiamu. ₁₄Vhalivi vha ita na u ṱutshela mashango avho a pfulo na thundu yavho vha ya Juda na Jerusalema nge Jerobiamu na vhana vhawe vha vha landula vha si tende vha tshi shuma vhe vhotshifhe vha Muṋe washu. ₁₅Jerobiamu a vhea vhotshifhe vhawe vha zwitembele zwikwarani na vha zwitungulo zwa madimoni na zwa ṋamana zwe a vha o zwi ita. ₁₆Matsinde oṱhe a Vhaisraele vhe vha vha vho ṋekedza Muṋe washu Mudzimu wa Israele mbilu dzavho, vha tevhela Vhalivi vha ya Jerusalema u ṋekedza Muṋe washu Mudzimu wa vhokhotsi avho zwiṱhavhelo. ₁₇Vha khwaṱhisa muvhuso wa Juda, vha tikedza Rehabiamu ṅwana wa Solomoni miṅwaha miraru, vha tshi kanda vhuṱalani ha khosi Dafita na khosi Solomoni misi yeneyo.

₁₈Rehabiamu o dzea Mahalathi ṅwananyana wa Jerimotho, ṅwana wa Dafita. Mme a uyo ṅwananyana o vha e Abihaili, ṅwananyana wa Eliaba ṅwana wa Isai. ₁₉Vho vha na vhana vhararu vha vhatuka, Jeushi na Shemaria na Zahamu. ₂₀Ngavhuya a vhinga Maakha ṅwananyana wa Abisalomo, vha vha na vhana vhaṋa vha vhatuka, Abia na Athai na Zisa na Shelomithi. ₂₁Rehabiamu o vha a tshi funesa Maakha ṅwananyana wa Abisalomo u fhira vhafumakadzi vhawe vhoṱhe na vhasadzi vhawe vha dziphuli. Vhafumakadzi vhawe vhoṱhe vho ṱangana vho vha vhe 18, a dovha a vha na vhasadzi vha 60 vha dziphuli, vhana vhawe vha vhatuka vha vha 28, vha vhananyana vha vha 60. ₂₂Rehabiamu a vhea Abia ṅwana wa Maakha uri a vhe ene ṅwana muhulwane kha vhana vha hawe, a tshi itela uri a mu vhumbe khosi. ₂₃Rehabiamu a vhamba maano, a balanganya vhana vhawe na madzingu oṱhe a Juda na Benyamini, na miḓi yoṱhe i na mitsheṱo. A vha ṱunḓela zwiḽiwa zwinzhi, a vha dzetshela vhasadzi vhanzhi.