1 KORONIKA 29

₁Khosi Dafita a vhudza tshivhidzo tshoṱhe a ri, “Ṅwananga Solomoni, we Mudzimu a mu nanga e eṱhe, u tshee muṱuku, ha athu ḓivha tshithu, huno mushumo une wa fanela u shumiwa ndi muhulu, ngauri heyo a si pfamo ya muthu, ndi thembele ya Mudzimu Muṋe washu. ₂Ndo shuma nga nungo dzoṱhe nda wana thundu ya u fhaṱa thembele ya Mudzimu wanga – musuku wa zwa musuku na siliva ya zwa siliva na musinaseṱha wa zwa musinaseṱha na tsimbi ya zwa tsimbi na matanda a zwa thanda na matombo a onikisi na matombo a mosaiki na matombo matswu na matombo a mivhala yo fhambanaho na matombo a tshakha dzoṱhe a mutengo muhulu, na mmabulu munzhi. ₃Zwi si izwo fhedzi, ndo bvisa na lupfumo lwanga lwa musuku na siliva zwa thembele ya Mudzimu wanga ngauri ndi funa thembele ya Mudzimu wanga. Zwoṱhe zwe nda bvisela thembele khethwa ₄ndi thani dza ḓana dza musuku u songo vangiwaho na thani dza 240 dza siliva i songo vangiwaho ya u hulunga mbondo dza iyo thembele, ₅zwa musuku na zwa siliva na zwa mushumo woṱhe une wa ḓo shumiwa nga vhatsila. Zwino ane a funa u ḓikumedza Muṋe washu ṋamusi uri a bvise-vho mutendelo ndi nnyi?”

₆Ndi hone ṱhoho dza miṱa na magota a matsinde a Vhaisraele na vhalangammbi na vhalangagomane na vhalangi vha mushumo wa khosi vha tshi bvisa nga u tou zwi funa. ₇Vha bvisela mushumo wa thembele ya Mudzimu thani dza 170 dza musuku na thani dza 340 dza siliva na thani dza 620 dza musinaseṱha na thani dza 3 400 dza tsimbi. ₈We a vha e na nungu dza mutengo muhulu a bvisa zwa dzhena tshisikuni tsha thembele ya Muṋe washu zwa londolwa nga Jehiele wa mutupo wa Vhalivi vha Gerisoni. ₉Vhathu vha pembela vha tshi vhona vharangaphanḓa vhavho vha tshi bvisa vha tshi tou zwi funa, ngauri vho ṋea Muṋe washu nga fhedzi nahone nga mbilu yoṱhe. Khosi Dafita na ene a pembela zwihulu.

₁₀Khosi Dafita a renda Muṋe washu henefho phanḓa ha tshivhidzo tshoṱhe a ri,

₁₄“Huno nṋe ndi tou vha mini, vhathu vhanga vhone vha tou vha mini, zwine ra kona u bvisa zwingafha ri si na vhutshivha? Zwoṱhe zwi bva kha Iwe, ro u ṋea zwi no bva tshanḓani tshau fhedzi. ₁₅U tshi ri sedza u vhona ri tshi nga vhafhalali na vhatsinda, u ḓi nga vhomakhulukuku washu. Maḓuvha ashu fhano fhasi a nga murunzi u fhiraho, a ri na ndalamo. ₁₆Yawee Muṋe washu Mudzimu washu, zwoṱhe hezwi zwe ra kuvhanganya ri tshi itela u fhaṱela dzina ḽau ḽikhethwa thembele, zwi bva tshanḓani tshau, zwoṱhe ndi zwau. ₁₇Mudzimu wanga, ndi a zwi ḓivha uri Iwe u ṱola mbilu ya muthu, u takalela u fulufhedzea ha muthu. Zwithu zwoṱhe hezwi ndo bvisa nga u tou zwi funa, nga mbilu u fulufhedzeaho. Zwino nda takala ndi tshi vhona vhathu vhau vha re fhano, na vhone vha tshi u ṋea vha tshi tou zwi funa. ₁₈Yawee Muṋe washu Mudzimu wa vhokhotsi ashu Abrahamu na Isaka na Israele, longa lutamo holu mbiluni dza vhathu vhau lini na lini, u ite uri mbilu dzavho dzi dzule dzi tshi u fulufhela. ₁₉Ita uri ṅwananga Solomoni a tevhedze ndaela dzau na zwine wa zwi ṱoḓa na ndayo dzau nga mbilu yoṱhe, a fhaṱe thembele ye nda i dzudzanyela.”

₂₀Ndi hone Dafita a tshi vhudza tshivhidzo tshoṱhe a ri, “Rendani Muṋe washu Mudzimu waṋu!” Ndi hone vhoṱhe vha tshi renda Muṋe washu Mudzimu wa vhokhotsi avho, vha gwadama, vha shuvhama phanḓa ha Muṋe washu na khosi.

₂₁Nga matshelo vha ṱhavhela Muṋe washu zwiṱhavhelo, vha mu ṋekedza nduvho dzi fhiswaho, vha mu ṱhavhela mboho dza tshigidi na thutha dza tshigidi na zwitutana zwa tshigidi, vha ṋekedza na nduvho dzadzo dzi nwiwaho, na dziṅwe nduvho nnzhi vha tshi itela Vhaisraele vhoṱhe. ₂₂Musi wonoyo vha ḽa vha nwa, vha pembela phanḓa ha Muṋe washu.

Ndi hone vha tshi ḓivhadza lwa vhuvhili uri Solomoni ṅwana wa Dafita ndi khosi, vha mu ḓodza mapfura nga dzina ḽa Muṋe washu uri a vhe muvhusi wavho, Tsadoko a vha tshifhe. ₂₃Solomoni a mbo dzula kha khuluṋoni ya Muṋe washu a vha khosi vhudzuloni ha khotsi awe Dafita. Zwa mu nakela, Vhaisraele vhoṱhe vha mu thetshelesa. ₂₄Magota oṱhe na vhahali na vhana vhoṱhe vha khosi Dafita vha vhatuka vha fulufhedzisa uri vha ḓo luvha khosi Solomoni. ₂₅Muṋe washu a hulisa Solomoni zwihulu Vhaisraele vhoṱhe vha tshi zwi vhona, a mu ṋea vhugala ha vhuhosi vhu sa athu ṋewa khosi na nthihi yo vhusaho Israele.

₂₆Dafita ṅwana wa Isai o vha e khosi ya ḽoṱhe ḽa Israele. ₂₇O vhusa ḽa Israele a fhedza miṅwaha ya 40; o vhusa miṅwaha miṱanu na mivhili e Hebroni, Jerusalema a vhusa miṅwaha ya 33. ₂₈O dzama o no ḓi vha wa maḓuvha vhukuma, o lalama, o pfuma, a tshi huliswa. Ṅwana wawe Solomoni a vha khosi vhudzuloni hawe. ₂₉Mafhungo a khosi Dafita, u bva mathomoni u swika magumoni, o ṅwalwa kha mafhungo a muporofita Samuele na a muporofita Nathani na a muporofita Gadi. ₃₀Mafhungo ayo a ri anetshela zwa muvhuso wawe na maanḓa awe na zwithu zwo iteaho khae na kha Vhaisraele na kha mivhuso ya maṅwe mashango oṱhe.