1 MAHOSI 16

₁Ipfi ḽa Muṋe washu ḽa ḓa ha Jehu ṅwana wa Hanani ḽi tshi kaidza Baasha ḽa ri, ₂“Ndo u wana u si tshithu, nda u hulisa nda u ita murangaphanḓa wa Vhaisraele, hone iwe wa kanda vhuṱalani ha Jerobiamu, wa ita uri vhathu vhanga Vhaisraele vha tshinye, vha ntsinyusa nga vhutshinyi havho. ₃Zwenezwo ndi ḓo ṱuwa ndi tshi u lozwa na nnḓu yau, nnḓu yau ndi ḓo i ita zwe nda ita nnḓu ya Jerobiamu ṅwana wa Nebati. ₄Vha nnḓu ya Baasha, vha no ḓo fela muḓini vha ḓo ḽiwa nga mmbwa, vha no ḓo fela ḓakani vha ḓo ḽiwa nga maṋoni.”

₅Mafhungo maṅwe oṱhe a Baasha na zwe a ita na mishumo i no sumbedza vhuhali hawe, zwo ṅwalwa buguni ya Histori ya Mahosi a Israele. ₆Baasha a dzama, a swiṱwa Thiritsa, ṅwana wawe Ela a vha khosi vhudzuloni hawe.

₇Ipfi ḽa Muṋe washu ḽa ḓa nga mulomo wa muporofita Jehu ṅwana wa Hanani ḽa amba na Baasha na vha nnḓu yawe, nga zwoṱhe zwe a ita zwi sa takadzi Muṋe washu, a tshi mu sinyusa nga zwe a ita, zwa nga zwa nnḓu ya Jerobiamu, a dovha a vha ene we a vha lozwa.

₈Nga ṅwaha wa 26 wa muvhuso wa Asa khosi ya Juda, Ela ṅwana wa Baasha a vha khosi ya Israele, a vhusa e Thiritsa a fhedza miṅwaha mivhili. ₉Zimiri o vha e muṅwe wa magota awe, a tshi langa hafu ya gariki dzawe dza nndwa; onoyo a mu itela tshimbevha. Ela o vha e Thiritsa, a tshi khou kambwa hayani ha Aritsa munna we a vha a tshi langa pfamo i re Thiritsa. ₁₀Zimiri a dzhena nḓuni, a mu rwa a wela fhasi a mu vhulaha. Hezwo zwo itea nga ṅwaha wa 27 wa muvhuso wa Asa khosi ya Juda. Zimiri a vha khosi vhudzuloni ha Ela.

₁₁Huno Zimiri a tshi tou thoma u vhusa, a vhulaha vhoṱhe vha nnḓu ya Baasha. Munna muṅwe na muṅwe na a re shaka kana khonani vha vhulawa. ₁₂Zimiri a lozwa nnḓu yoṱhe ya Baasha, zwi tshi tevhedza ipfi ḽo ambiwaho nga Muṋe washu a tshi kaidza Baasha nga mulomo wa muporofita Jehu, ₁₃nga vhuvhi hoṱhe he Baasha na ṅwana wawe Ela vha vhu ita, zwa ita uri na Vhaisraele vha tshinye, u ralo ha vha u sinyusa Muṋe washu Mudzimu wa Israele nga midzimu yavho i si tshithu.

₁₄Mafhungo maṅwe a Ela na zwoṱhe zwe a ita o ṅwalwa buguni ya Histori ya Mahosi a Israele.

₁₅Nga ṅwaha wa 27 wa muvhuso wa Asa khosi ya Juda, Zimiri o vha khosi, a vhusa Israele e Thiritsa a fhedza maḓuvha maṱanu na mavhili. Mmbi yo vha i tshi khou govhela Gibithoni, muḓi wa Vhafilista. ₁₆Musi Vhaisraele vha re mishashani vha tshi pfa uri Zimiri o itela khosi tshimbevha a i vhulaha, vha mbo ḓi dzhia Omuri mulangammbi musi wonoyo henefho mishashani vha mu vhumba khosi ya Israele. ₁₇Ndi hone Omuri na Vhaisraele vhoṱhe vhe a vha e navho vha tshi ṱuwa Gibithoni vha yo govhela Thiritsa. ₁₈Zimiri a tshi vhona uri muḓi wo dzhiwa, a dzhena dzhavheloni ḽa ngomu ḽa pfamo ya musanda, a fhisa pfamo, mulilo wa mu tanga, a swa nga khavhu ya mulilo a fa, ₁₉nga vhuvhi he a ita, a tshi ita zwi sa takadzi Muṋe washu, a tshi kanda vhuṱalani ha Jerobiamu, a ita vhuvhi he Jerobiamu a ita, zwa ita uri na Vhaisraele vha tshinye.

₂₀Mafhungo maṅwe a Zimiri na tshimbevha tshe a ita o ṅwalwa buguni ya Histori ya Mahosi a Israele.

₂₁Vhaisraele vha fhandekana vha bva zwigwada zwivhili, vhaṅwe vha ima na Thibini ṅwana wa Ginathi uri a vhe khosi, vhaṅwe vha ima na Omuri. ₂₂Vhane vha ima na Omuri vha kunda vhane vha ima na Thibini ṅwana wa Ginathi. Thibini a fa, Omuri a vha khosi.

₂₃Omuri o vha khosi ya Israele nga ṅwaha wa 31 wa muvhuso wa Asa khosi ya Juda, a vhusa a fhedza miṅwaha ya 12, miṅwaha miṱanu na muthihi a vhusa e Thiritsa. ₂₄Omuri a renga tshikwara tsha Samaria nga mangwende a 6 000 a siliva kha muṅwe munna we a vha a tshi pfi Shemere, a fhaṱa muḓi henefho nṱha ha tshikwara itsho, wa pfi Samaria, u tshi rinelwa Shemere, we kale a vha e muṋe watsho.

₂₅Huno Omuri a ita zwi sa takadzi Muṋe washu, a tshinya u fhira vhoṱhe vho mu rangaho phanḓa. ₂₆O kanda vhuṱalani hoṱhe ha Jerobiamu ṅwana wa Nebati na vhuvhini hawe he a ita ngaho uri Vhaisraele vha tshinye, vha sinyusa Muṋe washu Mudzimu wa Israele nga midzimu yavho i si na mushumo.

₂₇Mafhungo maṅwe oṱhe a Omuri, na mishumo mihulu ye a vuledza, zwo ṅwalwa buguni ya Histori ya Mahosi a Israele. ₂₈Omuri a dzama, a swiṱwa Samaria, ṅwana wawe Ahaba a vha khosi vhudzuloni hawe.

₂₉Nga ṅwaha wa 38 wa muvhuso wa Asa khosi ya Juda, Ahaba ṅwana wa Omuri a vha khosi ya Israele, a vhusa e Samaria a fhedza miṅwaha ya 22. ₃₀Ahaba ṅwana wa Omuri a ita zwinzhi zwi sa takadzi Muṋe washu u fhira vhoṱhe vho mu rangaho phanḓa. ₃₁Ene ho ngo tou ita vhuvhi ho itwaho nga Jerobiamu ṅwana wa Nebati fhedzi, o ita na u dzea Jesebele ṅwananyana wa khosi Ethibaali wa Sidoni, a thoma u shumela Baali a u luvha. ₃₂Ahaba a fhaṱela Baali aḽiṱari thembeleni ya wonoyo Baali ye a i fhaṱa Samaria. ₃₃Ahaba a ita na mulagalu wa thanda wa mudzimu wa musadzi, a ita zwi no sinyusa Muṋe washu Mudzimu wa Israele, zwi no fhira zwa mahosi oṱhe a Israele o mu rangaho phanḓa.

₃₄Misi ya Ahaba, Hiele wa Bethele a vusa Jerikho. A tshi tea miteo, Abiramu ṅwana wawe wa tanzhe a fa, a tshi kwea dzigethe ha fa Segubu ṅwana wawe wa phedzi, zwi tshi tevhedza ipfi ḽe Muṋe washu a amba nga mulomo wa Joshua ṅwana wa Nunu.