1 MAHOSI 15

₁Nga ṅwaha wa 18 wa muvhuso wa Jerobiamu khosi ya Israele ṅwana wa Nebati, Abia a vha khosi ya Juda, ₂a vhusa e Jerusalema a fhedza miṅwaha miraru. Mme awe o vha e Maakha ṅwananyana wa Abisalomo. ₃O ita vhuvhi hoṱhe he khotsi awe a ita; o vha a songo ḓikumedza Muṋe washu Mudzimu wawe nga mbilu yoṱhe unga makhulu wawe Dafita. ₄Naho zwo ralo, Muṋe washu Mudzimu wawe, a tshi itela Dafita, o siela Abia luvhone a mu ṋea ṅwana uri a vhuse Jerusalema ene o no fa, na u tsireledza muḓi wa Jerusalema. ₅Ndi uri Dafita o ita zwe zwa takadza Muṋe washu, a si litshe u tevhedza ndaela dza Muṋe washu maḓuvha oṱhe a vhutshilo hawe. Vhuvhi vhuthihi he a ita ndi zwiḽa zwa u vhulahisa Uria wa Muhithi.

₆Abia na Jerobiamu vho vha vha tshi ḓi bvelana pfumo misi yoṱhe hu tshi vhusa Abia. ₇Mafhungo maṅwe oṱhe a muvhuso wa Abia na zwoṱhe zwe a ita zwo ṅwalwa buguni ya Histori ya Mahosi a Juda.

₈Abia a dzama, a swiṱwa Muḓini wa Dafita, ṅwana wawe Asa a vha khosi vhudzuloni hawe.

₉Nga ṅwaha wa 20 wa muvhuso wa Jerobiamu khosi ya Israele, Asa a vha khosi ya Juda, ₁₀a vhusa e Jerusalema a fhedza miṅwaha ya 41. Makhulu wawe o vha e Maakha ṅwananyana wa Abisalomo.

₁₁Asa a ita zwe zwa takadza Muṋe washu, u ḓi nga zwe makhulu wawe Dafita a ita. ₁₂A thatha phombwe dza vhanna na dza vhasadzi dza u luvha midzimu, dza si tsha vha hone shangoni, a thutha midzimu yoṱhe i nengisaho yo itwaho nga vho mu rangaho phanḓa. ₁₃Asa a bvisa makhulu wawe Maakha vhudzuloni hawe a si tsha vha vhakoma, nge a ita tshitungulo tsha mulagalu u nengisaho wa Ashera mudzimu wa musadzi wa zwa mbebo. Asa a rema iyo thanda a i fhisa Govhani ḽa Kidroni. ₁₄Naho Asa a songo thutha zwitembele zwa zwikwarani, o vha o ḓikumedza Muṋe washu nga mbilu yoṱhe vhutshilo hawe hoṱhe. ₁₅O dzhia na siliva na musuku na midzio ye ene na khotsi awe vha vha vho i kumedza Mudzimu, a zwi vhea thembeleni.

₁₆Asa khosi ya Juda na Baasha khosi ya Israele vho vha vha tshi dzula nga u bvelana pfumo musi vha tshi kha ḓi vhusa. ₁₇Baasha khosi ya Israele a gonya a yo dia ḽa Juda, a thoma u vusa Rama uri hu si tsha vha na muthu ane a bva kana a dzhena shangoni ḽa Asa khosi ya Juda.

₁₈Khosi Asa a dzhia siliva yoṱhe na musuku woṱhe zwe zwa vha zwo sala mbulungeloni dza thembele ya Muṋe washu na pfamoni, a ruma vhaṅwe magota awe vha zwi isa Damasko ha khosi ya Aramu, Beni Hadadi ṅwana wa Tabrimoni, ṅwana wa Hesioni, a ri, ₁₉“Nṋe na vhone nga ri vhofhe mulanga unga khotsi anga na khotsi avho. Ndi khou vha rumela tshifhiwa tsha siliva na musuku. Zwino nga vha litshe mulangano we vha vhofha na Baasha khosi ya Israele uri a nṱutshele.”

₂₀Khosi Beni Hadadi a tenda zwe khosi Asa a mu vhudza, a ruma vhalangammbi vhawe vha bva na mmbi vha yo dia miḓi ya Israele. Vha kunda vha Iyoni na Dani na Abele Bethe Maakha, na shango ḽoṱhe ḽi re tsini ha Khinirethe, na shango ḽoṱhe ḽa Nafuthali. ₂₁Musi khosi Baasha a tshi zwi pfa, a litsha u khwaṱhisa Rama a humela Thiritsa.

₂₂Ndi hone khosi Asa a tshi bvisa ndaela ya ya kha ḽoṱhe ḽa Juda uri hu si vhuye ha sala muthu, muṅwe na muṅwe a ye Rama a yo hwala matombo na matanda zwe Baasha a vha a tshi khou khwaṱhisa ngazwo muḓi. Khosi Asa a dzhia iyo thundu a khwaṱhisa ngayo Geba, kha ḽa Benyamini, a khwaṱhisa na Mitsipha.

₂₃Mafhungo maṅwe oṱhe a khosi Asa, zwoṱhe zwe a ita na mishumo i no sumbedza vhuhali hawe na miḓi ye a i vusa, zwoṱhe zwo ṅwalwa buguni ya Histori ya Mahosi a Juda. Huno musi o no kalaha milenzhe yawe ya farwa nga vhulwadze. ₂₄Asa a dzama, a swiṱwa zwaloni zwa musanda Muḓini wa Dafita, ṅwana wawe Josafati a vha khosi vhudzuloni hawe.

₂₅Nga ṅwaha wa vhuvhili wa muvhuso wa Asa khosi ya Juda, Nadaba ṅwana wa Jerobiamu a vha khosi ya Israele, a vhusa a fhedza miṅwaha mivhili. ₂₆Nadaba a ita zwi sa takadzi Muṋe washu, a kanda vhuṱalani ha khotsi awe, a ita vhuvhi honovhuḽa he khotsi awe a ita uri Vhaisraele vha tshinye ngaho.

₂₇Baasha ṅwana wa Ahia, wa mutupo wa Isakhara, a itela Nadaba tshimbevha a mu vhulaha musi ene Nadaba na mmbi yawe vha tshi khou govhela muḓi wa Gibithoni kha ḽa Filista. ₂₈Baasha o vhulaha Nadaba nga ṅwaha wa vhuraru wa muvhuso wa Asa khosi ya Juda, Baasha a vha khosi ya Israele vhudzuloni ha Nadaba. ₂₉Hezwi a tshi tou thoma u vhusa, a vhulaha vha nnḓu ya Jerobiamu vhoṱhe. Ho ngo siela Jerobiamu na muthihi zwawe we a sala a tshi tshila, o vha lozwa vhoṱhe, zwi tshi tevhedza ipfi ḽe Muṋe washu a ḽi amba nga mulomo wa muḓinḓa wawe, muporofita Ahia wa Shilo. ₃₀Izwo zwo itea nge Jerobiamu a sinyusa Muṋe washu Mudzimu wa Israele nga vhuvhi he a vhu ita, a dovha a ita uri Vhaisraele vha tshinye-vho.

₃₁Mafhungo maṅwe oṱhe a Nadaba na zwoṱhe zwe a ita, zwo ṅwalwa buguni ya Histori ya Mahosi a Israele. ₃₂Asa khosi ya Juda na Baasha khosi ya Israele vho vha vha tshi ḓi dzula vha tshi bvelana pfumo misi yoṱhe ya u vhusa havho.

₃₃Nga ṅwaha wa vhuraru wa muvhuso wa Asa khosi ya Juda, Baasha ṅwana wa Ahia a vha khosi ya Israele, a vhusa e Thiritsa a fhedza miṅwaha ya 24. ₃₄Baasha a ita zwi sa takadzi Muṋe washu, a kanda vhuṱalani ha Jerobiamu, we a ita uri Vhaisraele vha tshinye.