Gomelelo ḽa misi ya Elia
1Zwino Elia, muṅwe muporofita we a vha a tshi bva Thishibe kha ḽa Giliadi a vhudza khosi Ahaba a ri, “Nga Muṋe washu Mudzimu a tshilaho wa Israele ane nda vha muḓinḓa wawe, ndi ri a hu nga wi ṅwando kana ha na mvula miṅwaha i ḓaho nṋe ndi sa athu amba nda ri zwi vhe hone.”
2Ndi hone ipfi ḽa Muṋe washu ḽi tshi ḓa ha Elia ḽa ri, 3“Ṱuwa fhano u livhe vhubvaḓuvha u yo dzumbama mulamboni wa Kherithi, vhubvaḓuvha ha Jorodani. 4Maḓi u ḓo nwa henefho mulamboni nahone ndo ruma mahunguvhu uri a u ḓisele zwiḽiwa.”
5Elia a ita zwe Muṋe washu a mu vhudza, a ya mulamboni wa Kherithi, vhubvaḓuvha ha Jorodani, a dzula hone. 6Mahunguvhu a mu ḓisela vhurotho na ṋama nga matsheloni na nga madekwana, a nwa maḓi henefho mulamboni.
Elia na tshilikadzi ya Tsariphathi
7Ngavhuya mulambo wa xa nge mvula ya vha i sa ni shangoni iḽo. 8Ipfi ḽa Muṋe washu ḽa ḓa kha Elia ḽa ri, 9“Takuwa u ye muḓini wa Tsariphathi thungo dza Sidoni u dzule hone. Ndo vhudza iṅwe tshilikadzi i re henefho uri i u fhe zwiḽiwa.” 10Ndi hone Elia a tshi ya Tsariphathi. Musi a tshi swika khoroni ya muḓi, a vhona tshilikadzi i tshi khou reḓa khuni. Elia a vhidza uyo musadzi a ri, “Nga vha mphe maḓinyana nga mvuvhelo ndi nwe!” 11Musi uyo musadzi a tshi khou yo ka maḓi, Elia a vhidzelela a ri, “Vha nnḓele na kurotho.”
12Musadzi a fhindula a ri, “Nga Yahavee Mudzimu wavho a tshilaho ndi ri a thi na na kugaku zwakwo, ndi tou vha na zwikopfu zwi sa ḓadzi tshanḓa mvuvheloni na zwipfuranyana kha mudzio. Ndi khou reḓa khuninyana uri ndi ise hayani ndi ḓibikele zwiḽiwa na ṅwananga wa mutuka ri ḽe ri fe zwashu.”
13Elia a vhudza musadzi uyo a ri, “Vha songo ofha tshithu. Nga vha ye vha ite zwe vha amba. Hone nga vha thome u mmbikela kugakunyana nga zwine vha vha nazwo vha nnḓisele vha konou ḓibikela vhone na ṅwana wavho. 14Ndi uri Muṋe washu Mudzimu wa Israele u ri, ‘Vhukhopfu vhu re mvuvheloni a vhu nga fheli, na mapfura a re mudzioni ha nga fheli Muṋe washu a vhuya a nisa mvula shangoni.’ ”
15Musadzi a ṱuwa a ya a ita zwe Elia a mu vhudza. Elia na uyo musadzi na muṱa wawe vha ḽa. 16Vhukhopfu vhu re mvuvheloni a ho ngo fhela, na mapfura a re mudzioni ho ngo fhela, nga he ipfi ḽa Muṋe washu ḽa ambiwa nga Elia.
17Ngavhuya ṅwana wa uyo musadzi muṋe wa nnḓu a lwala, vhulwadze ha ḓi hulela vhu tshi ya, ha swika he a si tsha kona u fema. 18Musadzi a amba na Elia a ri, “Nandi vhone muḓinḓa wa Mudzimu, ndo vha tshinyani? Vho ḓela u nkhumbudza vhuvhi hanga na u vhulaha ṅwananga?”
19Elia e fhindula a ri, “Nga vha nṋekedze ṅwana wavho.” Elia a dzhia uyo ṅwana zwanḓani zwa mme awe, a mu takula a gonya nae kamarani ya nṱha he a vha a tshi dzula hone, a mu vhea vhulaloni hawe. 20Ndi hone a tshi vhidzelela Muṋe washu a ri, “Yawee Muṋe washu Mudzimu wanga, kani vhukuma wo tou ri u vhaise iyi tshilikadzi ine nda dzula nayo nga u ita uri ṅwana wayo a fe?” 21Ndi hone Elia a tshi shuvhama nṱha ha uyo mutukana kararu, a vhidzelela Muṋe washu a ri, “Yawee Muṋe washu Mudzimu wanga, litsha mutukana hoyu a dovhe a tshile!”
22Muṋe washu a thetshelesa tshililo tsha Elia, mutukana a dovha a fema, a tshila. 23Elia a takula ṅwana, a tsela nae fhasi a tshi bva kamarani ya nṱha, a mu ṋekedza mme awe a ri, “Nga vha vhone, ṅwana wavho u khou tshila!”
24Ndi hone uyo musadzi a tshi amba na Elia a ri, “Zwino ndi vho zwi ḓivha uri vha muḓinḓa wa Mudzimu na uri ipfi ḽine vha amba ndi ḽa Yahavee vhukuma.”
