1 KORONIKA 19

₁Ngavhuya khosi Nahashi wa Vhaamoni a dzama, ṅwana wawe Hanunu a vha khosi vhudzuloni hawe. ₂Khosi Dafita a ri, “Hanunu ṅwana wa Nahashi ndi ḓo mu itela vhuthu nge khotsi awe a nnyitela vhuthu.” Ndi hone Dafita a tshi ruma vhaḓinḓa ha Hanunu u yo imela nge khotsi awe a dzama.

Musi vhanna vhe vha ruṅwa nga Dafita vha tshi swika ha Hanunu shangoni ḽa Vhaamoni uri vha mu ime maṱoni, ₃vhahulwane vha Vhaamoni vha vhudza Hanunu vha ri, “Vha vhona unga Dafita u khou hulisa khotsi avho nga u ruma vhanna khavho u ḓa u imela? Izwi avha vhanna a vho ngo ḓa khavho u tandula shango na u ḽi fhiriṱanya uri vha ḽi kunde?”

₄Ndi hone Hanunu a tshi fara vhanna vhe vha rumiwa nga Dafita, a vha vheula, a fhafhula zwiambaro zwavho u guma nga maraho, a vha thatha. ₅Dafita a tshi ḓivhiswa zwe vhaḓinḓa vhawe vha itwa, a ruma vhaḓinḓa u yo vha ṱanganedza, ngauri vho vha vho nyadziswa zwihulu. Khosi Dafita a ri, “Dzulani Jerikho ndebvu dzaṋu dzi vhuye dzi mele, ni konou vhuya.”

₆Musi Vhaamoni vha tshi vhona uri vho no nukhela Dafita nga zwe vha ita, Hanunu na Vhaamoni vha bvisa khilogiramu dza 34 000 dza siliva ya u thola gariki na vhanameli vhadzo dzi tshi bva kha Vhaaramu vha Misopothamia na Vhaaramu vha Maakha na Tsoba. ₇Vha thola gariki dza 32 000 na vhanameli vhadzo, khathihi na khosi ya Maakha na mmbi yayo, vha ḓa vha ṱoka mishasha tsini na Medeba, ngeno Vhaamoni vho bva miḓini yavho vha rambana uri vha bve pfumo.

₈Dafita a tshi pfa izwo a ruma Juaba na mmbi yoṱhe ya vhahali. ₉Vhaamoni vha bva vha yo ima muṋangoni wa muḓi wavho wa Raba, ngeno mahosi e a vha o ḓa u vha tikedza vho ima vhe vhoṱhe ḓakani.

₁₀Juaba a vhona uri hu na mmbi dza maswina phanḓa hawe na murahu hawe, ndi hone a tshi nanga vhahali vhomakone vha Israele a vha vhea vho livhana na Vhaaramu. ₁₁Vhaṅwe vhanna vhoṱhe a ri vha langwe nga murathu wawe Abishai, vha vhewa vho livhana na Vhaamoni. ₁₂Juaba a ri, “Arali Vhaaramu vha nkunda, ni ḓe ni mphalale, hone arali Vhaamoni vha ni kunda, nṋe ndi ḓo ḓa nda ni phalala. ₁₃Khwaṱhani ri lwele vhathu vha hashu na miḓi ya Mudzimu washu ri sa ofhi. Muṋe washu u ḓo ita zwine a vhona zwi zwavhuḓi.”

₁₄Ndi hone Juaba na vhanna vhe a vha e navho vha tshi tshoṱhela Vhaaramu, Vhaaramu vha mu shavha. ₁₅Musi Vhaamoni vha tshi vhona uri Vhaaramu vha khou shavha, na vhone vha shavha murathu wawe Abishai vha dzhena muḓini. Juaba a humela Jerusalema.

₁₆Musi Vhaaramu vha tshi vhona uri vho kundwa nga Vhaisraele, vha ruma vhaḓinḓa vha ramba Vhaaramu vha seli ha Yufuratha, Shobakha mulangammbi wa Hadada Ezere ó vha ranga phanḓa. ₁₇Musi Dafita a tshi zwi pfa, a ramba Vhaisraele vhoṱhe, vha wela Jorodani, a yo vha dia, a vhea vhanna vhawe vha mmbi u livhana navho. Dafita a vhekanya mmbi dzawe uri a yo ṱangana na Vhaaramu i lwiwe, vhone vha lwa nae. ₁₈Hone nndwa i tshi ṱangana Vhaaramu vha shavha Vhaisraele. Dafita a vhulaha vhanameli vhavho vha dzigariki vha 7 000 na vhahali vha tshimbilaho nga milenzhe vha 40 000. A vhulaha na Shobakha mulangammbi wavho. ₁₉Musi mahosi e a vha a tshi vhuswa nga Hadada Ezere vha tshi vhona uri vho kundwa nga Vhaisraele, vha pfumedzana na Dafita vha mu luvha. Vhaaramu vha si tsha funa u dovha vha tikedza Vhaamoni.