1 KORONIKA 20

₁Nga ṱhumalurere, musi mahosi a tshi bva pfumo, Juaba a ranga mmbi phanḓa a phusukanya shango ḽa Amoni, khosi Dafita a sala Jerusalema. Vha govhela muḓi wa Raba, vha u dia, vha u phusukanya. ₂Milikhomu, mudzimu wa tshitungulo wa Vhaamoni, tsho vha tsho ambara khare ya musuku ya tshileme tsha khilogiramu dza 35, nahone yo vha i na ndalama khayo. Dafita a dzhia iyo ndalama a i lunzhedza kha khare yawe ya vhuhosi. Dafita a ita na u dzhia thundu nnzhi ye a i thuba afho muḓini a ṱuwa nayo. ₃Dafita a dzhia vhathu vha muḓi a vha shumisa nga dzisaha na tshezela dza tsimbi na dzimbaḓo. Na vhaṅwe vhathu vha miḓi yoṱhe ya Amoni a vha ita zwenezwo. Ndi hone ene na vhanna vhe a vha e navho vha tshi humela Jerusalema.

₄Ḽiṅwe ḓuvha ho bviwa pfumo ha yo lwiwa na Vhafilista muḓini wa Gezere. Zwenezwo Sibekhai wa Husha a vhulaha muṅwe muswonḓa we a vha a tshi pfi Siphai, Vhafilista vha kundwa.

₅Ha dovha ha lwiwa iṅwe nndwa na Vhafilista, Elihanani ṅwana wa Jairi a vhulaha Lahami wa Gathi, murathu wa Goliada. Pfumo ḽa Lahami ḽo vha ḽi na mufhiṋi wa vhudenya vhu no nga ha luṱanga lwa muhoṱi.

₆Ho lwiwa iṅwe nndwa Gathi. Henefho ho vha hu na muswonḓa wa minwe miṱanu na muthihi tshanḓani tshiṅwe na tshiṅwe na zwikunwane zwiṱanu na tshithihi mulenzheni muṅwe na muṅwe, zwo ṱangana zwa ita 24. Uyo na ene o vha e wa lutsinga lwa miswonḓa ya kale. ₇A nyefula Vhaisraele, Jonathani ṅwana wa Shama mukomana wa Dafita a mu vhulaha.

₈Havho vhararu vho vha vhe vha lutsinga lwa miswonḓa ya Gathi, hone vha vhulawa nga Dafita na vhanna vhawe.