1 KORONIKA 18

₁Ngavhuya khosi Dafita a kunda Vhafilista, vha mu luvha, a vha dzhiela muḓi wa Gathi na miḓana yo u tangaho.

₂Dafita a kunda na Vhamuaba, vha vha vhalanda vhawe, a vha thelisa mithelo.

₃Dafita a dovha a lwa na khosi Hadada Ezere wa Tsoba u vhuya u swika shangoni ḽa Hamathi, musi Hadada Ezere a tshi khou ya u dovha u luvhisa iḽo shango u navha na mulambo wa Yufuratha. ₄Dafita a thuba gariki dzawe dza tshigidi na vhatshimbidzi vha dzigariki vha 7 000 na vhahali vha 20 000 vha tshimbilaho nga milenzhe. Dafita a holefhadza bere dzoṱhe, a tou sia dzi no kona u kokodza gariki dza ḓana fhedzi.

₅Musi Vhaaramu vha Damasko vha tshi ḓa u ima na khosi Hadada Ezere wa Tsoba, Dafita a vhulaha Vhaaramu vha 22 000. ₆Dafita a ṱoka mishasha ya mmbi muvhusoni wa Vhaaramu wa Damasko, Vhaaramu vha mu luvha vha thela muthelo. Muṋe washu a ita uri Dafita a kunde hoṱhe he a ya.

₇Dafita a dzhia zwiṱangu zwa musuku zwe zwa vha zwi tshi farwa nga magota a Hadada Ezere a zwi isa Jerusalema. ₈A dzhia na musinaseṱha munzhi miḓini ya Tibihathi na Khunu ye ya vha i tshi vhuswa nga Hadada Ezere. Ndi uyo musinaseṱha we Solomoni a sala a tshi ita ngawo thannge na dziphuphu na midzio ya thembele.

₉Musi Thoi khosi ya Hamathi a tshi zwi pfa uri Dafita o kunda mmbi yoṱhe ya Hadada Ezere khosi ya Tsoba, ₁₀a ruma ṅwana wawe Joramu ha khosi Dafita u yo mu resha na u mu fhululedza zwe a kunda Hadada Ezere nndwani, ngauri Hadada Ezere o vha a tshi endela u lwa na Thoi. Joramu a isela Dafita zwifhiwa zwa musuku na siliva na musinaseṱha. ₁₁Khosi Dafita a kumedza Muṋe washu izwo zwithu sa zwe a ita nga siliva na musuku zwe a zwi dzhiela tshakha dzoṱhe dze a dzi kunda, dza Edomo na Muaba na Amoni na Filista na Amaleke.

₁₂Abishai ṅwana wa Tseruya o vhulaha Vhaedomo vha 18 000 Govhani ḽa Muṋo ₁₃a konou ṱoka mishasha ya mmbi shangoni ḽa Edomo, vhathu vhoṱhe vha Edomo vha luvha Dafita. Muṋe washu a ita uri Dafita a kunde hoṱhe he a ya.

₁₄Dafita a vhusa ḽoṱhe ḽa Israele, a tshi tevhedza mulayo, a tshi tonda vhathu vhawe vhoṱhe. ₁₅Mulangammbi o vha e Juaba ṅwana wa Tseruya, Josafati ṅwana wa Ahiludu e tshanḓa tsha khosi, ₁₆Tsadoko ṅwana wa Ahitubu na Ahimelekhe ṅwana wa Abiathara vhe vhotshifhe, Shausha e muṅwaleli wa khosi, ₁₇Benaya ṅwana wa Jehoyada e mulangi wa vhalindi vha Dafita. Vhana vha khosi Dafita na vhone vho vha vhe vhakoma vhahulwane.