2 Emakhosi 9

₁Umphrofethi Elisha watfuma lomunye welicembu lebaphrofethi lababenaye, watsi kuye: “Bopha lijazi lakho ngelibhande, utsatse luphondvo lwemafutsa uhambe nalo uye eRamothi Gileyadi. ₂Utawutsi ungefika lapho, ufune Jehu, umsa waJehoshafati, lotalwa nguNimshi. Ubofika ucondze kuye umkhiphe emkhatsini walabangani bakhe, umngenise ekamelweni lelingekhatsi kakhulu. ₃Ubobe sewutsatsa loluphondvo lwemafutsa umtsele ngalamafutsa enhloko yakhe utsi: ‘Naku lakushoko Simakadze: “Ngikugcoba kuba yinkhosi etikwesive saka-Israyeli,” ’ usuke lapho uvule umnyango ucele empunzini, ungalibali!”

₄Ngako lelijaha, lelalingumphrofethi, lesuka lacondza eRamothi Gileyadi. ₅Latsi nalifika khona, lakhandza letindvuna temphi tihleti ndzawonye, lafike latsi: “Nginemlayeto wakho, ndvuna.”

Jehu walibuta watsi: “Ukhuluma nabani?”

Lomphrofethi wamphendvula, watsi: “Nawe, ndvuna.”

₆Jehu wasukumela etulu bayawungena endlini. Lomphrofethi wase utsela emafutsa etikwenhloko yaJehu, watsi: “Naku lakushoko Simakadze, Nkulunkulu wema-Israyeli, utsi: ‘Ngiyakugcoba kutsi ube yinkhosi etikwesive saSimakadze, ema-Israyeli. ₇Ufanele ubhubhise indlu yaka-Ahabi, inkhosi yakho; ngitawukhipha sibhongo sengati yetinceku tami, baphrofethi, nengati yato tonkhe tinceku taSimakadze leyacitfwa nguJezebeli. ₈Yonkhe indlu yaka-Ahabi itawubhubha. Ngitawubhubhisa ka-Ahabi bonkhe labadvuna labasele ka-Israyeli, labakhululekile nalabatigcili.

₉“ ‘Ngiyakwenta indlu yaka-Ahabi ibe njengendlu yakaJerobowamu, umsa waNebati, nanjengendlu yakaBhasha, umsa wa-Ahiya. ₁₀Jezebeli yena uyawudliwa tinja kulendzawo yaseJezreyeli, futsi akayiwungcwatjwa ngumuntfu.’ ” Wesuka lapho wavula umnyango, wacela empunzini.

₁₁Watsi Jehu nakaphumela kulabangani bakhe, lomunye wabo wambuta watsi: “Kusahamba kahle yini? Loluhlanya belutekwentani lapha kuwe?”

Jehu wamphendvula, watsi: “Niyamati lomuntfu kanye naletintfo latikhulumako.”

₁₂Batsi: “Unemanga! Sitjele.”

Jehu wabaphendvula, watsi: “Naku lakushito kimi: ‘Naku lokushiwo nguSimakadze, utsi: “Ngiyakugcoba kutsi ube yinkhosi etikwa-Israyeli.” ’ ”

₁₃Besuka lapho bamphutfuma bamendlalela emajazi abo etikwetitebhisi, ngaphansi kwetinyawo takhe. Base bashaya emacilongo bamemetela batsi: “Jehu yinkhosi!”

₁₄Jehu, umsa waJehoshafati, lotalwa nguNimshi, wakha luzungu ngaJoramu. Ngaleso sikhatsi Joramu kanye nabo bonkhe baka-Israyeli babesolomane bavikele iRamothi Gileyadi kuHazayeli, inkhosi yemaSiriya, ₁₅kodvwa Joramu abesabuyele kulela laseJezreyeli kuyawuphotisa emanceba labewagwazwe ngemaSiriya emphini yawo naHazayeli, inkhosi yemaSiriya. Jehu watsi: “Nangabe nani nibona kanjalo, caphelani kutsi kungaphunyuli ngisho namunye lapha edolobheni ahambe ayewuteka letindzaba lena eJezreyeli.” ₁₆Ngako wagibela encoleni yakhe yemphi, wabanga eJezreyeli, ngobe phela Joramu abephumulele lapho, kantsi na-Ahaziya, inkhosi yakaJuda, abehlile kuyakumvusela.

₁₇Kwatsi mahlalesangweni waseJezreyeli nakatsi uphakamisa emehlo, asetulu embhoshongweni, wabona ngemabutfo aJehu eta avivile, wamemeta watsi: “Ngibona emabutfo eta avivile.”

Joramu watsi: “Tfumela sigijimi lesingumgibeli, usitfume kutsi siyewubabuta sitsi: ‘Nita ngekuthula yini?’ ”

₁₈Lomgibeli waphutfuma wayawuhlangabeta Jehu, wafike watsi: “Naku lokushiwo yinkhosi, itsi: ‘Uta ngekuthula yini?’ ”

Jehu wasiphendvula, watsi: “Utakwentani ngekuthula? Jikela ngasemvakwami, ungilandzele.”

Lomahlalesangweni wabika watsi: “Lesitfunywa sesifikile kubo, kodvwa asibonakali kubuya.”

₁₉Ngako inkhosi yakhipha lesinye sitfunywa ngelihhashi, satsi nasifika kubo, satsi: “Naku lokushiwo yinkhosi, itsi: ‘Uta ngekuthula yini?’ ”

Jehu naso wasiphendvula, watsi: “Utakwentani ngekuthula? Jikela ngasemvakwami, nawe ungilandzele.”

₂₀Lomahlalesangweni wabika watsi: “Sigijimi sesifikile kubo, kodvwa naso asisabonakali kubuya. Lokugijima ngencola yemphi kubonakala shangatsi kwaJehu, umsa waNimshi, ugijimisa kweluhlanya.”

₂₁Joramu watsi: “Bophelani incola yami.” Kwatsi nase tiboshelwe, Joramu, inkhosi yaka-Israyeli, na-Ahaziya, inkhosi yakaJuda, baphuma bajikeka ngetincola tabo, nguloyo agibele yakakhe incola, bayawuhlangabeta Jehu. Bahlangana naye kulesivini lesasisaNabothi waseJezreyeli. ₂₂Watsi Joramu kube abone Jehu, wambuta watsi: “Ute ngekuthula yini, Jehu?”

Jehu waphendvula watsi: “Kuthula kungaba khona kanjani, nangabe solomane kusekhona tithico nebutsakatsi benyoko Jezebeli?”

₂₃Joramu wagucuka wacela empunzini, amemeta Ahaziya, atsi: “Limbuka! Ahaziya!”

₂₄Jehu wase unsala butjoki bakhe wamjijimeta, umcibisholo wangena emhlabankhomo, wadzabula inhlitiyo ekhatsi, Joramu wadzilika encoleni yakhe. ₂₅Jehu wakhuluma kuBidkari, umshayeli wencola yakhe, watsi: “Tsatsa lesidvumbu sakhe usijike lapha kulesivini lebesisaNabothi waseJezreyeli. Khumbula kutsi tsine nawe sasihamba sobabili sigibele incola yinye sidledlemuka emvakwa-Ahabi, uyise, ngesikhatsi Simakadze akhuluma lesiphrofetho ngaye, watsi: ₂₆‘Itolo ngibone ingati yaNabothi kanye neyemadvodzana akhe, kusho Simakadze, vele ngiyawukwenta uyikhokhele kuyo yona lendzawo lena, kusho Simakadze,’ Manje-ke mtsatseni, nimjike kuleyo ndzawo, njengekusho kwelivi laSimakadze.”

₂₇Watsi kube Ahaziya, inkhosi yakaJuda, akubone konkhe lokwase kwentekile, wabaleka ngemgwaco wacondza eBhethi Hagani. Jehu wamcosha, amemeta, atsi: “Mbulaleni naye!” Bamgwaza asesencoleni yakhe emanceba lamabi ngesikhatsi asabaleka ngemgwaco loya eGuri ngaseJibleyamu, kodvwa noko wabaleka wangenisa eMegido, wafike wafela khona. ₂₈Tinceku takhe tamgibelisa encoleni yakhe tammikisa eJerusalema, lapho tafike tamfihlela khona kanye naboyisemkhulu edlizeni lakhe, eDolobheni laDavide. ₂₉Ngemnyaka weli-11 waJoramu, umsa wa-Ahabi, Ahaziya waba yinkhosi yakaJuda.

₃₀Jehu wase uya eJezreyeli. Watsi kube akuve loko Jezebeli, wapenda emehlo akhe, walungisa tinwele takhe, wase uvela ngelifasitelo. ₃₁Watsi nje Jehu asangena esangweni, wambuta watsi: “Ute ngekuthula yini, Zimri, wena mbulali wenkhosi yakho?”

₃₂Jehu wabuka etulu efasitelweni, wamemeta watsi: “Ngubani lome ngakimi? Ngubani?” Babili nome batsatfu batsenwa bambuka ngelifasitelo. ₃₃Jehu wabamemeta watsi: “Khiphani Jezebeli, nimjike phansi!” Ngako bambamba bamkhipha ngelifasitelo, emasaphatelo engati yakhe abhoca lubondza kanye nemahhashi ngesikhatsi asamgcobagcoba ngetinselo tawo.

₃₄Jehu wangena, wadla, wanatsa, wase utsi: “Nimnakekele lomfati localekisiwe, nimngcwabe; ngobe abeyindvodzakati yenkhosi.” ₃₅Kodvwa batsi nabaphumela ngephandle kuyawumngcwaba, bakhandza kute lutfo ngaphandle kwelukhakhayi nje, netinyawo, netandla. ₃₆Bancandzeka bayawubikela Jehu. Jehu watsi: “Leli livi laSimakadze lalikhuluma ngenceku yakhe Elija waseThishbe: ‘Kuleyo ndzawo eJezreyeli, tinja tiyawudla sidvumbu saJezebeli. ₃₇Sidvumbu saJezebeli siyawuba njengemangcoliso kuleyo ndzawo, esigcawini saseJezreyeli, kangangekutsi kuyawubate loyawuphindze ambone aze atsi: “Lona nguJezebeli.” ’ ”