2 Emakhosi 10

₁Ngaleso sikhatsi eSamariya bekunemadvodzana labengema-70 endlu yaka-Ahabi. Ngako Jehu wabhala tincwadzi watitfumela eSamariya etindvuneni taseJezreyeli, nakubaholi kanye nebacizi bebantfwana ba-Ahabi, watsi: ₂“Masinyane nje, nase nitfole lencwadzi, njengobe emadvodzana enkhosi yenu ahlala nani, futsi ninetincola nemahhashi emphi, nelidolobha lelibiyelwe, ninetikhali, ₃khetsani munye wemadvodzana enkhosi yenu lonemandla kakhulu nalofanelekile, nimbeke esihlalweni seyise, nilwele indlu yenkhosi yenu.”

₄Kodvwa bona betfuka batsi: “Nangabe emakhosi lamabili ehluleka kumelana naye, tsine-ke singamkhona kanjani?”

₅Ngako indvuna yasesigodlweni, neyasedolobheni, nebaholi, kanye nebacizi bebantfwana batfumela umlayeto kuJehu, batsi: “Sitinceku takho, sitakwenta nome ngabe yini lotsi asiyente. Ngeke sibeke muntfu kutsi abe yinkhosi yetfu; yenta loko lokubona kutsi kuncono.”

₆Jehu wase ubhala lenye incwadzi yesibili, watsi: “Nangabe nime ngakimi futsi nitangilalela, tsatsani tinhloko temadvodzana enkhosi yenu, bese nita nato lapha kimi eJezreyeli kusasa ngalesikhatsi.”

Manje bantfwabenkhosi labangema-70 nabo babekanye nebaholi belidolobha laseSamariya, lababengubona babakhulisa. ₇Ngalesikhatsi kufika lencwadzi, labaholi batsatsa lamadvodzana aka-Ahabi langema-70 bawasontsa onkhe. Batsatsa letinhloko tawo batifaka etitjeni batitfumela kuJehu, eJezreyeli. ₈Lesitfunywa sefika kuJehu satsi: “Baletse tinhloko tebantfwabenkhosi.”

Jehu wase utsi: “Tibekeni tincumbi letimbili esangweni lelidolobha, kuze kube ngusekuseni kusasa.”

₉Ngakusasa ekuseni Jehu waphuma wema embikwaso sonkhe sive, watsi: “Nine nimsulwa. Ngimi lengakhe luzungu ngenkhosi yami, ngayibulala; kodvwa-ke ngubani lobulele bonkhe laba? ₁₀Yatini-ke kutsi kute nalinye livi lalikhulumile Simakadze ngendlu ya-Ahabi leliyakuwela phansi. Simakadze ukwentile loko lakwetsembisa ngenceku yakhe Elija.” ₁₁Ngako Jehu wabulala bonkhe lababeseJezreyeli, labebasasele bendlu yaka-Ahabi, kanye nato tonkhe tikhulu takhe, nebangani bakhe, nebaphristi bakhe, kwangasali ngisho namunye.

₁₂Jehu wase uyaphuma ulibangisa eSamariya, kwatsi nakaseBhethi Ekedi yeBelusi, ₁₃wahlangana naletinye tihlobo ta-Ahaziya, inkhosi yakaJuda, watibuta watsi: “Nibobani nine?” Tamphendvula tatsi: “Sitihlobo ta-Ahaziya, sesehlele kutawubingelela imindeni yenkhosi neyendlovukazi.”

₁₄Jehu watsi: “Batsatseni baphila.” Ngako babatsatsa baphila, bababulalela eceleni kweBhethi Ekedi; bekungemadvodza langema-42. Jehu wacotfula imbokodvo nesisekelo ka-Ahabi.

₁₅Asesukile lapho, wefika kuJehonadabi, umsa waRekhabi, labesendleleni ayemhlangabeta. Jehu wambingelela watsi: “Ume ngakimi yini, njengobe nami ngibambisene nawe?”

Jehonadabi wamphendvula, watsi: “Yebo.”

Jehu watsi: “Nangabe kunjalo; bamba ingalo.” Ngako Jehonadabi wachawula, Jehu wamdvonsa, amgibelisa encoleni yakhe. ₁₆Jehu watsi: “Hamba nami ubone inshisekelo yami ngaSimakadze.” Ngako wamgibelisa encoleni yakhe wahamba naye.

₁₇Watsi kube efike eSamariya, Jehu wabulala bonkhe lababesasele bendlu ya-Ahabi, wababhubhisa njengekusho kwelivi laSimakadze lalikhuluma nga-Elija.

₁₈Jehu wabe sewubutsa sonkhe sive, wakhuluma kuso watsi: “Ahabi abekhonta Bhali kancane. Jehu utamkhonta kakhulu. ₁₉Manje-ke butsani bonkhe baphrofethi baBhali, nalabamkhontako, kanye nebaphristi bakhe, nibone kungasali ngisho namunye wabo, ngobe ngitakwenta lomkhulu umhlatjelo waBhali. Lowo loyawusala akayiwuchubeka aphila kuleli.” Kodvwa abebayenga nje, entela kubulala lababekhonta Bhali.

₂₀Jehu watsi: “Memetelani umhlangano kutewukhunjulwa Bhali.” Ngako bawumemetela. ₂₁Ngako watfumela livi kulo lonkhe laka-Israyeli. Bonkhe lababekhonta Bhali baphelela ngetinkhani, kwabate ngisho namunye lowasala. Bagcwala lithempeli laBhali kusuka ekucaleni kwayawuphuma ekugcineni. ₂₂Jehu wakhuluma kulomgcini wetembatfo, watsi: “Buyisa tembatfo tabo bonkhe lababekhonta Bhali.” Nembala watiletsa.

₂₃Ngako boJehu naJehonadabi, umsa waRekhabi, bangena ekhatsi ethempelini laBhali. Jehu wakhuluma kulababekhonta Bhali, watsi: “Calatani, nibuke kutsi kute namunye losisebenti saSimakadze lesikanye nani ngaphandle kwalababekhonta Bhali.” ₂₄Ngako bangena bayakwenta imihlatjelo neminikelo yekushiswa. Ngaleso sikhatsi Jehu abemise emadvodza langema-80 ngephandle, lawatjela watsi: “Nangabe lomunye wenu angahle ayekele munye nje walabantfu lengibanikele etandleni tenu, aphunyule, loko uyawukukhokhela ngemphilo yakhe.”

₂₅Kwatsi kube Jehu acedze kwenta iminikelo yekushiswa, wayala letindvuna takhe nabomahlalesangweni, watsi: “Ngenani nibabulale bonkhe, kungaphunyuli ngisho namunye.” Ngako babesukela bababhokodzela ngetinkemba. Labomahlalesangweni netindvuna bajikijela letidvumbu ngephandle, base bangena ekhatsi lelingekhatsi kakhulu ethempelini laBhali. ₂₆Batsatsa lelitje lekwakutsiwa lingcwele, balikhiphela ngephandle kwelithempeli laBhali, balishisa. ₂₇Balibhubhisa lelitje laBhali lekwakutsiwa lingcwele, babhidlita nalelithempeli laBhali. Bantfu balisebentisa njengemthoyi kusukela ngalelo langa kuze kube ngulamuhla.

₂₈Jehu wakucedza kanjalo-ke kukhontwa kwaBhali ka-Israyeli. ₂₉Noko akazange agucuke etonweni taJerobowamu, umsa waNebati, labedvonsele ngato sive sema-Israyeli ekoneni lekwakukukhonta litfole legolide eBetheli nakaDani.

₃₀Simakadze wakhuluma kuJehu, watsi: “Njengobe wente lokuhle, waphumelelisa loko lokuhle emehlweni ami, wenta nasendlini yaka-Ahabi konkhe loko lenganginako engcondvweni yami kutsi ngikwente, ngako situkulwane sakho sesiyawuhlala esihlalweni sebukhosi saka-Israyeli kuze kube ngusesitukulwaneni sesine.” ₃₁Kodvwa Jehu akazange acaphele kunakekela umtsetfo waSimakadze, Nkulunkulu wema-Israyeli, ngayo yonkhe inhlitiyo yakhe. Akazange aphendvuke etonweni taJerobowamu labedvonsele ngato sive sema-Israyeli ekoneni.

₃₂Ngalawo malanga Simakadze wacala kunciphisa live laka-Israyeli. Hazayeli wawehlula ema-Israyeli, walibusa lonkhe live lawo, ₃₃kusukela eJordane kuye emphumalanga, lonkhe live lakaGileyadi, sigodzi sakaGadi, naRubeni, naManase kusukela e-Aroyeri ngasemfuleni i-Anoni lesibhukula iGileyadi ekhatsi size siyewuphumela eBhashani.

₃₄Leminye imininingwane yaJehu nalokunye lakwenta, nekubusa kwakhe, nekuphumelela kwakhe, kubhaliwe encwadzini yemilandvo yemakhosi aka-Israyeli. ₃₅Jehu wase uyakhotsama, wafihlwa eSamariya. Jehoyahazi, umsa wakhe, waba yinkhosi esikhundleni sakhe. ₃₆Sikhatsi labusa ngaso Jehu etikwesive saka-Israyeli saba ngiminyaka lengema-28 seyiyonkhe.