2 Emakhosi 8

₁Elisha abekhulume kulomfati labekavuse umfanyana wakhe ekufeni, watsi: “Baleka kanye nemndeni wakho niyewubhaca nome ngukuphi lapho ningabhaca khona, kube sikhashana, ngobe Simakadze sewukumisile kutsi kube nendlala eveni letawutsatsa iminyaka lesikhombisa.” ₂Lomfati wavele wenta njengobe umuntfu waNkulunkulu abeshito. Wahamba kanye nemndeni wakhe wayawuhlala eveni lemaFilisti iminyaka lesikhombisa.

₃Kwatsi ekupheleni kwaleminyaka lesikhombisa wabuya esuka eveni lemaFilisti, wacondza enkhosini wayawucela indlu yakhe kanye nemhlaba wakhe. ₄Inkhosi yayikhulume naGehazi, inceku yemuntfu waNkulunkulu, yatsi: “Ngitjele ngato tonkhe tintfo letinkhulu letentiwe ngu-Elisha.” ₅Kwatsi ngaleso sikhatsi Gehazi asalandzisa inkhosi kutsi Elisha ubavuse kanjani labafile, kwangena lomfati, Elisha labemvusele umfanyana wakhe ekufeni, atewucela indlu yakhe nemhlaba wakhe.

Gehazi watsi: “Nangu-ke lomfati, nkhosi yami, nkhosi; nalona ngulomfanyana wakhe lowavuswa ngu-Elisha ekufeni.” ₆Inkhosi yabuta lomfati ngaloko, wayilandzisa.

Inkhosi yase itfuma lenye yetindvuna tayo, yatsi: “Hamba unike lomfati konkhe lobekukwakhe, kanye nayo yonkhe inzuzo letfolakele ngemhlaba wakhe, kusukela ngelilanga lahamba ngalo kulelive kuze kube ngulamuhla.”

₇Elisha wesuka lapho waya eDamaseko; Bheni Hadadi, inkhosi yemaSiriya, abegula. Inkhosi yatsi nayitjelwa ngaloko kutsiwa: “Umuntfu waNkulunkulu udzabule lonkhe lelive waze wefika lapha,” ₈yatsi kuHazayeli: “Tsatsa sipho uhambe naso uyewuhlangabeta lomuntfu waNkulunkulu ngaso. Buta kuSimakadze ngaye, utsi: ‘Ngitawusindza yini kulokugula?’ ”

₉Hazayeli wahamba wayawuhlangabeta Elisha, wachuba nalesipho bekayakumnika sona setfwelwe ngemakamela langema-40. Kwakusipho lesasitinhlobonhlobo tetintfo leticolisakele taseDamaseko. Wangena wema embikwakhe, watsi: “Indvodzana yakho Bheni Hadadi, inkhosi yemaSiriya, ingitfume kutsi ngitewubuta kutsi itawusindza yini kulokugula.”

₁₀Elisha waphendvula watsi: “Hamba ufike kuye utsi: ‘Ngempela utawusindza.’ Kodvwa Simakadze ukwembulile kimi kutsi empeleni yena utakufa.” ₁₁Wambukisisa, waze Hazayeli wadliwa ngemahloni. Umuntfu waNkulunkulu wase uyakhala.

₁₂Hazayeli wabuta watsi: “Inkhosi yami ikhalelani?” Wamphendvula watsi: “Kungobe ngiyawati umonakalo lotakuwenta esiveni saka-Israyeli. Utawuhloseka ngemlilo tonkhe tindzawo tabo letitinqaba, ugwaze labasha babo ngenkemba, udzacate tinswane tabo phansi, uhhubhute tisu tebafati babo labatetfwele.”

₁₃Hazayeli watsi: “Inceku yakho, inja nje, ingakwenta kanjani loko? Ingafinyelela kanjani kulobo buluhlata?”

Elisha wamphendvula, watsi: “Simakadze ungibonisile kutsi wena utawuba yinkhosi yemaSiriya.”

₁₄Hazayeli wase uyesuka ushiya Elisha, wabuyela enkhosini yakhe. Bheni Hadadi wambuta, watsi: “Utsiteni Elisha kuwe?” Hazayeli waphendvula watsi: “Ungitjelile watsi ngempela utawusindza.” ₁₅Kodvwa kwatsi ngakusasa, Hazayeli watsatsa sicephu lesilicinsi kakhulu wasenya emantini, wase useneka ebusweni benkhosi, yase iyafa. Ngako Hazayeli wase utsatsa sikhundla sayo, waba yinkhosi yemaSiriya.

₁₆Ngemnyaka wesihlanu wekubusa kwaJoramu, umsa wa-Ahabi inkhosi yaka-Israyeli, ngesikhatsi Jehoshafati ayinkhosi yakaJuda, Jehoramu, umsa wa-Jehoshafati wacala kuba yinkhosi yakaJuda. ₁₇Abeneminyaka lengema-32 ngesikhatsi nakabekwa kuba yinkhosi; wabusela eJerusalema iminyaka lesiphohlongo. ₁₈Wahamba etinyatselweni temakhosi aka-Israyeli, njengobe kwakwenta bendlu yaka-Ahabi, yena-ke washada nendvodzakati ya-Ahabi. Wenta lokubi emehlweni aSimakadze. ₁₉Noko ngenca yenceku yakhe Davide, Simakadze abengakatimiseli kubhubhisa sive sakaJuda. Abetsembisile kutsi uyawutigcinela sibane endlini yakaDavide kuze kube phakadze.

₂₀Ngesikhatsi saJehoramu baka-Edomu bavukela bakaJuda, base batibekela yabo inkhosi. ₂₁Ngako Jehoramu wahamba waya eSayire kanye nato tonkhe tincola takhe temphi. Baka-Edomu bamvimbetela naletindvuna takhe tetincola temphi, kodvwa wavuka waphulukundlela ebusuku, kwatsi emabutfo akhe abaleka, abuyela emuva emakhaya. ₂₂Kuze kube ngulamuhla naloku baka-Edomu seloku bayiphuma balwisana nebakaJuda. Ngasona leso sikhatsi nebakaLibna bavuka umbhejazane.

₂₃Leminye imininingwane ngekubusa kwaJehoramu, nako konkhe lakwenta kubhaliwe encwadzini yemilandvo yemakhosi akaJuda. ₂₄Jehoramu wase uyakhotsama, wafihlwa emadlizeni aboyisemkhulu, eDolobheni laDavide. Ahaziya, umsa wakhe, waba yinkhosi esikhundleni sakhe.

₂₅Ngemnyaka weli-12 wekubusa kwaJoramu, umsa wa-Ahabi, inkhosi yaka-Israyeli, Ahaziya, umsa waJehoramu, inkhosi yakaJuda, wacala kubusa. ₂₆Ahaziya abeneminyaka lengema-22 budzala, nakacala kubusa; wabusela eJerusalema umnyaka waba munye. Libito lenina bekungu-Athaliya, umntfwanemntfwana-Omri, inkhosi yaka-Israyeli. ₂₇Wahamba etinyatselweni tebendlu yaka-Ahabi, wenta lokubi emehlweni aSimakadze, njengobe kwakwenta indlu yaka-Ahabi, ngobe abehlobene nemndeni waka-Ahabi ngekwemshado.

₂₈Ahaziya wahamba naJoramu, umsa wa-Ahabi, bayakulwa naHazayeli, inkhosi yaseSiriya, eRamothi Gileyadi. EmaSiriya amlimata Joramu, ₂₉ngako inkhosi Joramu yancandzeka yabuyela eJezreyeli yayawuphotisa khona lamanceba leyayiwahlatjwe ngemaSiriya, eRamothi, emphini yakhe naHazayeli, inkhosi yemaSiriya.

Ahaziya-ke, umsa waJehoramu, inkhosi yakaJuda, wase uyehla waya eJezreyeli ayawuvusela Joramu, umsa wa-Ahabi, njengobe abegwaziwe anemanceba.