2 Emakhosi 14

₁Ngemnyaka wesibili wekubusa kwaJehoyashi, umsa waJehoyahazi, inkhosi yaka-Israyeli, Amasiya, umsa waJowashi, inkhosi yakaJuda, wacala kubusa. ₂Abeneminyaka lengema-25 budzala ngesikhatsi acala kubusa. Wabusela eJerusalema iminyaka lengema-29. Libito lenina bekunguJehoyadini, waseJerusalema. ₃Wenta lokuhle emehlweni aSimakadze, kodvwa noko hhayi njengeyisemkhulu Davide. Kuko konkhe walandzela etinyatselweni teyise Jowashi. ₄Kodvwa tindzawo letiphakeme tekukhontela tithico tona atizange tisuswe; bantfu babechubeka banikelela kuto imihlatjelo yekushiswa, batfuncisa nemphepho khona.

₅Kwatsi ngesikhatsi umbuso wakhe nase ucinile esandleni sakhe, wase ubulala letindvuna letatisontse uyise labeyinkhosi. ₆Noko, akazange awabulale emadvodzana alamajabhane, kodvwa wenta njengobe kubhaliwe encwadzini yemtsetfo waMosi, lapho Simakadze ayala khona, watsi: “Boyise abayikubulawa ngenca yetono tebantfwababo, kanjalo nebantfwana abayikubulawa ngenca yetono taboyise; ngulowo nalowo uyawufela takhe tono.”

₇Nguye lowehlula ti-10 000 tema-Edomu eSigodzini Seluswayi, watfumba iSela emphini, wayetsa libito watsi yiJokthiyeli, lelo kuselibito layo nalamuhla loku.

₈Amasiya wase utfumela tigijimi kuJehoyashi, umsa waJehoyahazi, umsa waJehu, inkhosi yaka-Israyeli, wamnika insayeya watsi: “Wota, sitewubhekana buso nebuso.”

₉Kodvwa Jehoyashi, inkhosi yaka-Israyeli, waphendvula Amasiya, inkhosi yakaJuda, watsi: “Sihlahla sesitfwetfwe saseLebanoni satfumela umlayeto kumsedari waseLebanoni, lotsi: ‘Yendzisela umsa wami lentfombi yakakho.’ Kwase kusuka silwane sesiganga saseLebanoni seta satawugcobagcoba lesihlahla sesitfwetfwe ngetinselo taso. ₁₀Liciniso kutsi uyehlulile i-Edomu, nguko nje sewutikhukhumeta kangaka. Ludvumo alube kuwe ngekuncoba kwakho, kodvwa wena hlala phansi lapho kakho! Utibitelelani kuhlupheka, utidvonsele wena kuwa kwakho kanye nekwesive sonkhe sakaJuda?”

₁₁Kodvwa, Amasiya akazange atsandze kulalela. Ngako Jehoyashi, inkhosi yaka-Israyeli, wahlasela. Jehoyashi na-Amasiya, inkhosi yakaJuda, babhekana buso nebuso emphini yaseBhethi Shemeshi kulakaJuda. ₁₂Juda weyiswa baka-Israyeli, kwaba nguleyo naleyo ndvodza yabalekela ekhaya kayo. ₁₃Jehoyashi, inkhosi yaka-Israyeli, wabamba Amasiya, inkhosi yakaJuda, umsa waJowashi, labetalwa ngu-Ahaziya, wamtfumba eBhethi Shemeshi. Jehoyashi wase uyahamba waya eJerusalema, wafike wabhidlita lubondza lolwalutungelete iJerusalema kusukela eSangweni laka-Efrayimu kuze kuyewufika ngaseSangweni Leligumbi, indzawo leyayingemamitha labengaba li-180 budze. ₁₄Watsatsa yonkhe igolide nesiliva, nato tonkhe tintfo letatisethempelini laSimakadze, nasengcebeni yasesigodlweni, watfumba nebatfunjwa lababetibambiso, wabuyela nako eSamariya.

₁₅Leminye imininingwane ngekubusa kwaJehoyashi, konkhe lakwenta, nemphumelelo yakhe, kanye nemphi yabo na-Amasiya, inkhosi yakaJuda, kubhaliwe encwadzini yemilandvo yemakhosi aka-Israyeli. ₁₆Jehoyashi wase uyakhotsama, wafihlwa kuboyisemkhulu eSamariya, kanye nemakhosi aka-Israyeli. Jerobowamu, umsa wakhe, waba yinkhosi esikhundleni sakhe.

₁₇Amasiya, umsa waJowashi, inkhosi yakaJuda, waphila iminyaka leli-15 emvakwekufa kwaJehoyashi, umsa waJehoyahazi, inkhosi yaka-Israyeli. ₁₈Leminye imininingwane ngekubusa kwa-Amasiya ibhaliwe encwadzini yemilandvo yemakhosi akaJuda.

₁₉Bakha luzungu ngaye eJerusalema, wase uyabaleka waya eLakhishi; kodvwa batfumela emadvodza amcosha, afike ambulalela khona eLakhishi. ₂₀Wabuya asetfwelwe ngelihhashi, watawufihlwa emadlizeni aboyisemkhulu eJerusalema, Lidolobha laDavide.

₂₁Bonkhe bantfu bakaJuda base batsatsa Uziya labeneminyaka leli-16 budzala, bambeka inkhosi esikhundleni seyise, Amasiya. ₂₂Nguye lowakha kabusha i-Elathi wayibuyisela kaJuda, emvakwekukhotsama kweyise Amasiya.

₂₃Ngemnyaka weli-15 wekubusa kwa-Amasiya, umsa waJowashi, inkhosi yakaJuda, ka-Israyeli kwabekwa Jerobowamu, umsa waJehoyashi, kutsi abe yinkhosi. Wabusela eSamariya iminyaka lengema-41. ₂₄Wenta lokubi emehlweni aSimakadze, wangete waphendvuka ngisho nakusinye sono lesentiwa nguJerobowamu, umsa waNebati, labedvonsele ngato sive saka-Israyeli ekoneni. ₂₅Nguye lowabuyisela iminyele yaka-Israyeli kusukela eLebo Hamathi kuye eLwandle lwase-Arabha, njengekusho kwelivi laSimakadze, Nkulunkulu wema-Israyeli, lalikhuluma ngenceku yakhe Jona, umsa wa-Amithayi, umphrofethi waseGathi Heferi.

₂₆Simakadze wabona kutsi baka-Israyeli babeva buhlungu kanganani, bonkhe labakhululekile nalabatigcili; kwakute labengahle abasite. ₂₇Njengobe-ke Simakadze bekavele angazange asho kutsi uyakulesula libito la-Israyeli ebusweni bemhlaba, wabasindzisa ngesandla saJerobowamu, umsa waJehoyashi.

₂₈Leminye imininingwane ngekubusa kwaJerobowamu, nako konkhe lakwenta, nekuncoba kwakhe timphi, nekutsi wayibuyisela njani ka-Israyeli iDamaseko neHamathi, leyase iyakaJuda, kubhaliwe encwadzini yemilandvo yemakhosi aka-Israyeli. ₂₉Jerobowamu wase uyakhotsama, wafihlwa emakhosini aka-Israyeli. Zakhariya, umsa wakhe, waba yinkhosi esikhundleni sakhe.