2 Emakhosi 15

₁Ngemnyaka wema-27 wekubusa kwaJerobowamu, inkhosi yaka-Israyeli, Uziya, umsa wa-Amasiya, inkhosi yakaJuda, wacala kubusa. ₂Abeneminyaka leli-16 budzala, ngesikhatsi abekwa kuba yinkhosi yakaJuda, wabusela eJerusalema iminyaka lengema-52. Libito lenina bekunguJekoliya, waseJerusalema. ₃Uziya wenta lokuhle emehlweni aSimakadze, njengobe uyise Amasiya abentile. ₄Tindzawo letiphakeme tekukhontela tithico noko tona atizange tisuswe, bantfu bachubeka kunikelela kuto ngemihlatjelo, batfuncisa nemphepho khona.

₅Simakadze washaya inkhosi ngesifo lesisabulephelo, kwaze kwaba lilanga leyafa ngalo, yase ihlala endlini yayo yodvwa. Kwase kunguJothamu, umsa wayo, labesengamele sigodlo, sekunguye nalobusa sive eveni.

₆Leminye imininingwane ngekubusa kwa-Uziya, nako konkhe lakwenta, kubhaliwe encwadzini yemilandvo yemakhosi akaJuda. ₇Uziya wase uyakhotsama wafihlwa kuboyisemkhulu eDolobheni laDavide. Jothamu, umsa wakhe, waba yinkhosi esikhundleni sakhe.

₈Ngemnyaka wema-38 wekubusa kwa-Uziya, inkhosi yakaJuda, ka-Israyeli kwabekwa Zakhariya, umsa waJerobowamu, kutsi abe yinkhosi. Wabusela eSamariya tinyanga letisitfupha. ₉Wenta lokubi emehlweni aSimakadze njengobe naboyisemkhulu babentile. Akazange aphendvuke etonweni taJerobowamu, umsa waNebati, labedvonsele ngato sive saka-Israyeli ekoneni.

₁₀Shalumi, umsa waJabeshi, wakhela Zakhariya luzungu, wamenta silo sengubo embikwebantfu, wambulala, wangena esikhundleni sakhe, waba yinkhosi. ₁₁Leminye imininingwane ngekubusa kwaZakhariya ibhaliwe encwadzini yemilandvo yemakhosi aka-Israyeli. ₁₂Ngaloko kwagcwaliseka livi laSimakadze lalikhuluma kuJehu litsi: “Situkulwane sakho siyawuhlala esihlalweni sebukhosi saka-Israyeli kuze kube ngusesitukulwaneni sesine.”

₁₃Shalumi, umsa waJabeshi, waba yinkhosi ngemnyaka wema-39 wekubusa kwa-Uziya, inkhosi yakaJuda; wabusela eSamariya inyanga yaba yinye. ₁₄Menahemu, umsa waGadi, wesuka eThisa waya eSamariya. Wahlasela Shalumi, umsa waJabeshi, eSamariya, wambulala, kwase kuba nguye inkhosi.

₁₅Leminye imininingwane ngekubusa kwaShalumi neluzungu lwakhe lalwenta, kubhaliwe encwadzini yemilandvo yemakhosi aka-Israyeli.

₁₆Ngaleso sikhatsi Menahemu wacala eThisa wahlasela iThifsa nabo bonkhe lababesedolobheni nasemacentselweni alo, ngobe bala kumvulela emasango abo. Wadzilita iThifsa, wahhubhuta tisu tabo bonkhe bafati lababetetfwele.

₁₇Ngemnyaka wema-39 wekubusa kwa-Uziya, inkhosi yakaJuda, Menahemu, umsa waGadi, waba yinkhosi yaka-Israyeli. Wabusela eSamariya iminyaka lelishumi. ₁₈Wenta lokubi emehlweni aSimakadze. Kuko konkhe kubusa kwakhe akazange asaphendvuke ngisho nakusinye setono taJerobowamu, umsa waNebati, labedvonsele ngato sive saka-Israyeli ekoneni.

₁₉Thiglathi Phileseri, inkhosi yase-Asiriya, wahlasela lelive, Menahemu wamnika emakhilogremu labengaba ti-34 000 esiliva, atincengela kutsi amsimise embusweni wakhe. ₂₀Menahemu lemali abeyikhiphisa labantfu baka-Israyeli ngenkhani. Wonkhe umuntfu labenjingile abefanele akhokhe tinhlavu tesiliva letingema-50 amunye, kutsi kutewunikwa inkhosi yase-Asiriya; nembala, yase iyamyekela Menahemu, yalishiya live lakhe.

₂₁Leminye imininingwane ngekubusa kwaMenahemu, nako konkhe lakwenta, kubhaliwe encwadzini yemilandvo yemakhosi aka-Israyeli. ₂₂Menahemu wase uyakhotsama. Phekahiya, umsa wakhe, waba yinkhosi esikhundleni sakhe.

₂₃Ngemnyaka wema-50 wekubusa kwa-Uziya, inkhosi yakaJuda, ka-Israyeli kwabekwa Phekahiya, umsa waMenahemu, kutsi abe yinkhosi. Wabusela eSamariya iminyaka lemibili. ₂₄Phekahiya wenta lokubi emehlweni aSimakadze. Akazange aphendvuke etonweni taJerobowamu, umsa waNebati, labedvonsele ngato sive saka-Israyeli ekoneni. ₂₅Lenye yetinceku takhe, Phekha, umsa waRemaliya, wamakhela luzungu. Wabutsa emadvodza langema-50 akaGileyadi, wenta Phekahiya silo sengubo. Phekha wabulala Phekahiya kanye nabo-Agobu na-Ariye; wababulalela enqabeni yesigodlo saseSamariya. Phekha wase uba yinkhosi.

₂₆Leminye imininingwane ngekubusa kwaPhekahiya, nako konkhe lakwenta, kubhaliwe encwadzini yemilandvo yemakhosi aka-Israyeli.

₂₇Ngemnyaka wema-52 wekubusa kwa-Uziya, inkhosi yakaJuda, Phekha, umsa waRemaliya, waba yinkhosi yaka-Israyeli. Wabusela eSamariya iminyaka lengema-20. ₂₈Wenta lokubi emehlweni aSimakadze. Akazange aphendvuke etonweni taJerobowamu, umsa waNebati, labedvonsele ngato sive saka-Israyeli ekoneni.

₂₉Ngesikhatsi saPhekha, inkhosi yaka-Israyeli, Thiglathi Phileseri, inkhosi yase Asiriya, yefika yatfumba i-Ijoni, ne-Abela Bhethi Makha, neJanowa, neKhedeshi kanye neHasori. Watfumba iGileyadi, neGalile, nalo lonkhe live lakaNaftali, bantfu wabatfumba wabayisa e-Asiriya.

₃₀Hosheya, umsa wa-Ela, wakha luzungu ngaPhekha, umsa waRemaliya. Wambamba sigulukudvwana, wambulala, kwase kube nguye inkhosi ngemnyaka wema-20 wekubusa kwaJothamu, umsa wa-Uziya.

₃₁Leminye imininingwane ngekubusa kwaPhekha, nako konkhe lakwenta, kubhaliwe encwadzini yemilandvo yemakhosi aka-Israyeli.

₃₂Ngemnyaka wesibili wekubusa kwaPhekha, umsa waRemaliya, inkhosi yaka-Israyeli, Jothamu, umsa wa-Uziya, inkhosi yakaJuda, wacala kubusa. ₃₃Abeneminyaka lengema-25 budzala ngesikhatsi acala kubusa. Wabusela eJerusalema iminyaka leli-16. Libito lenina bekunguJerusha, indvodzakati yaSadoki. ₃₄Jothamu wenta lokuhle emehlweni aSimakadze, njengobe uyise Uziya abentile. ₃₅Noko tindzawo letiphakeme tekukhontela tithico naye akazange atisuse, bantfu bachubeka nekunikelela kuto imihlatjelo, batfuncisa nemphepho khona. Jothamu wakha kabusha liSango lelingenhla lasethempelini laSimakadze.

₃₆Leminye imininingwane ngekubusa kwaJothamu, nako konkhe lakwenta kubhaliwe encwadzini yemilandvo yemakhosi akaJuda. ₃₇Ngalawo malanga Simakadze wacala kuvusa Resini, inkhosi yemaSiriya, naPhekha, umsa waRemaliya, kutsi bahlasele lakaJuda. ₃₈Jothamu wase uyakhotsama, wafihlwa kuboyisemkhulu eDolobheni laDavide, lidolobha labokhokho bakhe. Ahazi, umsa wakhe, waba yinkhosi esikhundleni sakhe.