2 Emakhosi 13

₁Ngemnyaka wema-23 wekubusa kwaJowashi, umsa wa-Ahaziya, inkhosi yakaJuda, ka-Israyeli kwabekwa Jehoyahazi, umsa waJehu, kutsi abe yinkhosi yaka-Israyeli. Wabusela eSamariya iminyaka leli-17. ₂Wenta lokubi emehlweni aSimakadze, walandzela tono letatentiwa nguJerobowamu, umsa waNebati, labedvonsele ngato sive saka-Israyeli ekoneni, akazange aphendvuke kuto. ₃Ngako-ke lulaka lwaSimakadze lwavutsa etikwesive saka-Israyeli. Kwaba sikhatsi lesidze, solomane Simakadze abayekelele ngaphansi kwesandla saHazayeli, inkhosi yemaSiriya, kanye nesaBheni Hadadi, umsa wakhe.

₄Jehoyahazi wase ufuna lusito lwaSimakadze, Simakadze wamuva, ngobe wabona kutsi inkhosi yemaSiriya ibacindzetele kangakanani baka-Israyeli. ₅Simakadze wabavetela umkhululi baka-Israyeli, baphunyula esandleni senkhosi yemaSiriya. Ngako baka-Israyeli base bahlala emakhaya abo, njengobe babenta kucala. ₆Kodvwa abazange baphendvuke etonweni tendlu yakaJerobowamu, labedvonsele ngato sive saka-Israyeli ekoneni; bachubeka bona ngato. Insika ya-Ashera yachubeka yema eSamariya.

₇Kwase kute lokwase kusele emabutfweni akaJehoyahazi ngaphandle kwebagibeli bemahhashi lababengema-50, netincola temphi letilishumi, nemasotja labeshuca ngetinyawo labeti-10 000. Inkhosi yemaSiriya yayiwabhubhise onkhe lamanye, yawenta aba njengelutfuli lwanakubhulwako.

₈Leminye imininingwane ngekubusa kwaJehoyahazi, nako konkhe lakwenta, nekuphumelela kwakhe kubhaliwe encwadzini yemilandvo yemakhosi aka-Israyeli. ₉Jehoyahazi wase uyakhotsama, wafihlwa kuboyisemkhulu, eSamariya. Jehoyashi, umsa wakhe, waba yinkhosi esikhundleni sakhe.

₁₀Ngemnyaka wema-37 wekubusa kwaJowashi, inkhosi yakaJuda, ka-Israyeli kwabekwa Jehoyashi, umsa waJehoyahazi, kutsi abe yinkhosi ka-Israyeli. Wabusela eSamariya iminyaka leli-16. ₁₁Wenta lokubi emehlweni aSimakadze, wangete waphendvuka ngisho nakusinye setono taJerobowamu, umsa waNebati, labedvonsele ngato sive saka-Israyeli ekoneni; wachubekela embili nato.

₁₂Leminye imininingwane ngekubusa kwaJehoyashi, nako konkhe lakwenta, nemphumelelo yakhe, lokufaka ekhatsi imphi yakhe layilwa na-Amasiya, inkhosi yakaJuda, kubhaliwe encwadzini yemilandvo yemakhosi aka-Israyeli. ₁₃Jehoyashi wase uyakhotsama, wafihlwa kuboyisemkhulu. Jerobowamu waze wahlala esihlalweni sakhe sebukhosi. Jehoyashi wafihlwa eSamariya, emadlizeni emakhosi aka-Israyeli.

₁₄Ngaleso sikhatsi Elisha abegula aphetfwe sifo lesagcina sendlule naye, simbulele. Jehoyashi, inkhosi yaka-Israyeli, wehla wayakumhlola, wafike wamtsela ngetinyembeti, watsi: “Babe wami! Babe wami! Incola yaka-Israyeli nebagibeli bakhe bemahhashi!”

₁₅Elisha watsi: “Tsatsa butjoki nemicibisholo.” Wakwenta loko. ₁₆Elisha watjela inkhosi, watsi: “Bamba lobutjoki ngetandla takho.” Yatsi inkhosi nase ibubambile, Elisha wabeka takhe tandla etikwaleti tenkhosi.

₁₇Wakhuluma futsi enkhosini, watsi: “Vula lifasitelo langasemphumalanga.” Inkhosi yalivula. Elisha watsi kuyo: “Dubula.” Inkhosi yadubula. Elisha wamemeta, watsi: “Umcibisholo waSimakadze wekuncoba, umcibisholo wekuncoba emaSiriya! Utawabhubhisa aphele emaSiriya e-Afeki.”

₁₈Wachubeka Elisha watsi: “Tsatsa lemicibisholo.” Inkhosi yayitsatsa. Elisha wayitjela watsi: “Shaya umhlabatsi.” Inkhosi yawushaya katsatfu, yase iyawuyekela. ₁₉Umuntfu waNkulunkulu wayitfukutselela inkhosi, watsi: “Ngabe umhlabatsi uwushaye kwaba kasihlanu nome kasitfupha, ngobe bewutawube uyehlulile-ke iSiriya, wayibhubhisa yaphela. Kodvwa manje utayehlula katsatfu kuphela.”

₂₀Elisha wase uyafa, wafihlwa.

EmaMowabi abesavame kungenela lelive njalo nje entfwasahlobo atelihlasela. ₂₁Kwake kwatsi ngalesinye sikhatsi baka-Israyeli, basalibele kungcwaba lenye indvodza, betfuka sekuchamuka libutfo lebahlaseli lita livivile; base bajika lesidvumbu salendvodza ethuneni la-Elisha. Satsi lesidvumbu nasitsintsana nematsambo a-Elisha, sidvumbu savuka saphila, umuntfu wasukuma wema ngetinyawo.

₂₂Hazayeli, inkhosi yemaSiriya, wacindzetela baka-Israyeli ngaso sonkhe sikhatsi sekubusa kwenkhosi Jehoyahazi. ₂₃Kodvwa Simakadze waba nemusa nabo, waba nesihawu, wabanakekela ngenca yesivumelwane sakhe na-Abrahama, na-Isaka, naJakobe. Kuze kube ngulamuhla akakavumi kubabhubhisa abacoshe ebukhoneni bakhe.

₂₄Hazayeli, inkhosi yemaSiriya, wase uyakhotsama; Bheni Hadadi, umsa wakhe, waba yinkhosi esikhundleni sakhe. ₂₅Jehoyashi, umsa waJehoyahazi, waphindze futsi wawatsatsa etandleni taBheni Hadadi, umsa waHazayeli, onkhe lamadolobha labewatfumbe emphini kuyise, Jehoyahazi. Jehoyashi wehlula Bheni Hadadi kwaze kwaba katsatfu. Jehoyashi wawabuyisa lamadolobha aka-Israyeli labetfunjwe ngemaSiriya.