2 Emakhosi 11

₁Athaliya, unabo-Ahaziya, watsi kube abone kutsi indvodzana yakhe seyifile, wachubeka wabulala bonkhe bantfwabenkhosi. ₂Kodvwa Jehosheba, indvodzakati yenkhosi Jehoramu labengudzadzewabo-Ahaziya, watsatsa Jowashi, umsa wa-Ahaziya, wamuba, wamsusa emkhatsini walaba labanye bantfwabenkhosi labese batawubulawa. Wamtsatsa wayakumbhacisa kanye nesidzandzane sakhe ekamelweni lekulala. Bamfihla-ke lomntfwana ku-Athaliya; ngako-ke akazange asabulawa Jowashi. ₃Wahlala abhaciswe naJehosheba, ethempelini laSimakadze iminyaka lesitfupha ngesikhatsi kusabusa Athaliya eveni.

₄Kwatsi ngemnyaka wesikhombisa Jehoyada, umphristi, watfumela kwalandvwa tindvuna temakhulu, tasesigodlweni, netabomahlalesangweni, watsi atiletfwe kuye ethempelini laSimakadze. Wenta sivumelwane nato watifungisa asethempelini laSimakadze. Wase utikhombisa lendvodzana yenkhosi. ₅Watidvonsa ngendlebe watsi: “Naku lokufanele nikwente: Nine lenisemabutfweni lamatsatfu langena emsebentini ngemaSabatha, libutfo leliyincenye yesitsatfu litabociza sigodlo, ₆lenye incenye yesitsatfu icize lisango iSuri, bese kutsi lenye incenye yesitsatfu icize lisango lelingemuva kwabomahlalesangweni labaciza lithempeli ngemagema. ₇Nine-ke leningemabutfo lamabili laphuma emsebentini ngemaSabatha nani nifanele nicize lithempeli, nilicizele inkhosi. ₈Tihleleni nisingatse inkhosi, ngulowo nalowo ahlome aphelele, aphatse tikhali takhe. Nome ngubani losondzela ngasebaleni lenilitungeletile abulawe. Nihlale nisedvutane nenkhosi, nome ngukuphi lapho iya khona.”

₉Letindvuna temakhulu tenta njengobe Jehoyada, umphristi, abeshito. Nguleyo yatsatsa akayo emadvodza, lawo labengena emsebentini ngemaSabatha nalawo labephuma emsebentini ngemaSabatha, eta kuJehoyada, umphristi. ₁₀Wase uhlomisa letindvuna ngetikhali nangemahawu lekwakukwenkhosi Davide, kugcinwe ethempelini laSimakadze. ₁₁Labomahlalesangweni, ngulowo abambe tikhali takhe, batihlela basingatsa inkhosi, edvute nelilati kanye nelithempeli, kusukela ngaseningizimu kuze kuye ngasenyakatfo kwelithempeli.

₁₂Jehoyada wase ukhipa lomntfwanenkhosi wametfwesa umchele webukhosi, wamnika incwadzi yesivumelwane, wase umemetela kutsi uyinkhosi. Bamgcoba, bantfu base bashaya tandla, bamemeta, batsi: “Lunwele loludze, nkhosi.”

₁₃Watsi Athaliya kube eve lomsindvo lowawentiwa bomahlalesangweni nesive, wase uya kulabantfu ethempelini laSimakadze. ₁₄Watsi uyabuka, wabona nanso inkhosi imile eceleni kwensika njengekwelisiko. Tindvuna nebashayi bemacilongo bebasingatse inkhosi, bonkhe bantfu belive bajabula bashaya nemacilongo. Ngako Athaliya wadzabula tingubo takhe, wamemeta watsi: “Ngemavukelambuso! Ngemavukelambuso!”

₁₅Jehoyada, umphristi, wayala letindvuna temakhulu letatiwaphetse watsi: “Mkhipheni Athaliya lapha emkhatsini weticheme, nibagwaze ngenkemba bonkhe labamlandzelako.” Ngobe umphristi abetsite: “Ningambulaleli ekhatsi ethempelini laSimakadze.” ₁₆Ngako bambhadzama, asatsi ufika kulendzawo lapho emahhashi angenela ngakhona, nakangena emabaleni asendlunkhulu, bambulalela khona lapho.

₁₇Jehoyada wase wenta sivumelwane emkhatsini waSimakadze nenkhosi nesive kutsi sebayawuba sive saSimakadze, wachubeka wenta sivumelwane emkhatsini webantfu nenkhosi. ₁₈Bonkhe bantfu bakulelo live baya ethempelini laBhali balibhidlita. Badzilita nemalati akhe kanye naletithico, kwaba tincetu, babulala naMathani, umphristi waBhali, bambulalela embikwalamalati.

Jehoyada, umphristi, wase umisa bomahlalesangweni basethempelini laSimakadze. ₁₉Wabutsa tindvuna temakhulu, netesigodlo, nabomahlalesangweni, kanye nabo bonkhe bantfu bakulelo live, behlisa inkhosi ethempelini laSimakadze, bashuca bayawungena esigodlweni, bangena ngendlela yelisango lalabaciza sigodlo. Inkhosi yavele yahlala esihlalweni sayo sebukhosi. ₂₀Bonkhe bantfu balelo live bajabula. Lidolobha laba nekuthula, ngobe phela Athaliya abebhokodzelwe ngenkemba ekhatsi esigodlweni.

₂₁Jowashi abeneminyaka lesikhombisa nakacala kubusa.