Psalms 37

Moet jou nie ontstel

oor die kwaaddoeners nie;

moenie afgunstig wees op hulle

wat kwaadwillig optree nie,

₂want soos gras verdor hulle vinnig,

en soos groen plante verwelk hulle.

₃Vertrou op die Here

en doen die goeie,

bewoon die land

en waak oor betroubaarheid.

₄Vind jou vreugde in die Here,

dan sal Hy jou gee wat jou hart begeer.

₅Vertrou jou lewenspad

aan die Here toe,

vertrou op Hom, en Hy sal optree.

₆Hy sal jou •geregtigheid

soos die oggendlig laat verskyn

en jou reg soos die middagson.

₇Wees stil voor die Here,

en krimp ineen van vrees voor Hom.

Moet jou nie ontstel oor iemand

wat sukses behaal

op sy lewenspad nie,

oor 'n mens wat komplotte smee nie.

₈Moenie kwaad word nie

en laat vaar die woede;

moet jou nie ontstel nie,

dit bring net kwaad.

₉Want kwaaddoeners

sal vernietig word,

maar wie op die Here wag –

hulle sal die land besit.

₁₀Nog net 'n rukkie, dan sal daar

geen goddelose meer wees nie.

Jy sal sy plek dophou,

maar hy sal nie daar wees nie.

₁₁Die verdruktes sal die land besit

en hulle verlustig

in die oorvloed vrede.

₁₂'n Goddelose beplan onheil

teen die regverdige

en kners op sy tande vir hom.

₁₃My Heer lag vir hom,

want Hy sien dat sy dag kom.

₁₄Goddeloses trek die swaard

en span hulle boog

om die magtelose en behoeftige

neer te vel,

om dié wat opreg leef, af te slag.

₁₅Hulle swaard sal hulle eie hart

binnedring,

en hulle boë sal gebreek word.

₁₆Die bietjie wat 'n regverdige het,

is beter as die oorvloed

van baie goddeloses.

₁₇Want die arms van goddeloses

sal gebreek word,

maar die Here ondersteun regverdiges.

₁₈Die Here dra sorg

vir die lewensdae van hulle

wat onberispelik leef:

Hulle erfdeel bly vir altyd behoue.

₁₉Hulle sal nie beskaamd staan

in 'n tyd van teenspoed nie,

en in tye van hongersnood

is hulle versadig.

₂₀Maar goddeloses gaan tot niet,

die vyande van die Here –

soos kosbare weiveld verdwyn hulle,

in 'n rookwolk verdwyn hulle.

₂₁'n Goddelose leen

en betaal nie terug nie,

maar 'n regverdige is goedhartig

en mededeelsaam.

₂₂Ja, wie deur Hom geseën is,

sal die land besit,

maar wie deur Hom vervloek is,

sal uitgeroei word.

₂₃Danksy die Here

stap 'n jong man met ferm treë;

en die Here is tevrede

met sy lewenspad.

₂₄As hy val, sal hy nie neerslaan nie

want die Here hou hom aan sy hand.

₂₅Toe ek jonk was en selfs

noudat ek oud geword het,

het ek nie gesien

dat 'n regverdige versaak word,

of dat sy nageslag kos soek nie.

₂₆Hy is altyd goedhartig

en leen graag uit,

sy nageslag is 'n seën vir ander.

₂₇As jy die kwaad vermy

en die goeie doen,

sal jy vir altyd die land bewoon.

₂₈Want die Here het •geregtigheid lief

en wie aan Hom getrou is,

verlaat Hy nie;

en hulle word vir altyd beskerm,

maar die nageslag van goddeloses

word uitgeroei.

₂₉Regverdiges sal die land besit

en vir altyd daarin woon.

₃₀Die mond van 'n regverdige

prewel wysheid

en sy tong praat wat reg is.

₃₁Die wet van sy God is in sy hart,

sy voete sal nie struikel nie.

₃₂'n Goddelose hou die regverdige dop,

en is daarop uit om hom

dood te maak.

₃₃Die Here gee hom nie oor

in sy hand nie,

en veroordeel hom nie

wanneer hy teregstaan nie.

₃₄Wag op die Here, en hou by sy pad,

dan sal Hy jou aansien gee

om grond te besit.

Jy sal toekyk wanneer

goddeloses uitgeroei word.

₃₅Ek het 'n goddelose gesien,

'n gewelddadige, wat gedy het

soos 'n lowerryke, inheemse boom,

₃₆maar toe iemand weer

daar verbygaan, was hy weg!

En toe ek hom soek,

was hy nêrens te vinde nie.

₃₇Let maar op 'n onbesproke mens,

kyk maar na 'n opregte,

want 'n vredeliewende mens

het 'n toekoms;

₃₈maar oortreders

word almal saam uitgedelg,

die toekoms van goddeloses

word kortgeknip.

₃₉Regverdiges se verlossing

kom van die Here –

hulle toevlug in 'n tyd van verdrukking.

₄₀Die Here help hulle

en bevry hulle.

Hy bevry hulle van goddeloses

en verlos hulle,

want hulle skuil by Hom.