Psalms 36

₂'n Uitspraak oor die oortreding

van 'n goddelose

leef in my gedagtes:

“Daar is geen vrees vir God nie.

₃Want in sy eie oë is hy te seker

van homself om sy sondeskuld

te ontdek, om dit te haat.

₄Die woorde uit sy mond

is onreg en bedrog;

hy laat na om wys op te tree,

om goed te doen.

₅Onreg bedink hy op sy bed;

hy gaan staan op 'n pad

wat nie goed is nie;

kwaad verwerp hy nie.”

₆Here, tot aan die hemel

reik u troue liefde,

u getrouheid tot aan die wolke.

₇U geregtigheid is soos massiewe berge,

u regspraak soos die groot •oerwater.

U verlos mens en dier, Here.

₈Hoe kosbaar is u troue liefde, o God!

Mense skuil in die skadu van u vlerke.

₉Hulle drink hulle versadig

aan die oorvloed van u huis,

uit die stroom van u genietinge

laat U hulle drink.

₁₀Ja, by U is die fontein van lewe,*

in u lig sien ons lig.

₁₁Reik met u troue liefde uit

na hulle wat U ken,

met u •geregtigheid

na die opregtes van hart.

₁₂Laat 'n verwaande voet

my nie inhaal nie,

en die hand van goddeloses

my nie laat rondswerf nie.

₁₃Daar val hulle

wat onreg pleeg;

hulle word platgedruk

en kan nie weer opstaan nie.