Job 23

₂“Ook vandag is my klag rebels;

sy hand is swaar,

ten spyte van my gesug.

₃Ag, as ek maar geweet het

waar ek Hom kon vind,

as ek maar tot by

sy vaste woonplek kon kom!

₄Ek sou die saak voor Hom uiteensit;

my mond sou ek vul met pleitredes.

₅Ek sou kennis neem van die woorde

waarmee Hy teen my getuig;

ek sou begryp wat Hy vir my sê.

₆Sou Hy met groot krag

'n regstryd teen my voer?

Nee, maar Hy sal aan my

aandag gee.

₇'n Opregte sou daar

met Hom redeneer;

en ek sou vir altyd ontkom

aan my regter.

₈Kyk, gaan ek oos, is Hy nie daar nie,

en wes, dan gewaar ek Hom nie.

₉In die noorde, terwyl Hy werk,

merk ek Hom nie op nie;

verhul Hy Hom in die suide,

sien ek Hom nie raak nie.

₁₀Ja, Hy ken die pad waarop ek gaan;

as Hy my toets –

soos goud sal ek daar uitkom.

₁₁In sy spoor het my voete gebly;

by sy pad het ek gehou,

en nie afgedraai nie.

₁₂Die opdrag van sy lippe –

daaraan het ek my nie onttrek nie;

in die vou van my kleed

het ek die woorde uit sy mond

in bewaring gehou.

₁₃“Maar Hy is uniek –

wie kan Hom teengaan?

Wat Hy graag wil doen,

dit voer Hy uit.

₁₄Ja, Hy sal wat vir my bestem is, volbring.

Hy het baie dinge soos hierdie in gedagte.

₁₅Daarom staan ek verbysterd voor Hom;

as ek daaroor nadink, vrees ek Hom.

₁₆Dit is God wat my swak van hart maak;

dit is die Almagtige wat my verbysterd laat.

₁₇Ja, ek word nie stilgemaak

deur die donker nie,

deur die feit dat ek self

deur diepe duisternis omhul word nie.