Job 22

₂“Kan 'n man vir God

van waarde wees?

Ja, kan selfs iemand met insig

vir Hom van waarde wees?

₃Vind die Almagtige vreugde daarin

wanneer jy regverdig optree,

of hou dit vir Hom voordeel in

wanneer jy onberispelik optree?

₄Is dit oor jou ontsag vir Hom

dat Hy jou teregwys,

met jou in 'n regstryd betrokke raak?

₅Is jou boosheid nie groot nie?

Daar is geen einde

aan jou sondeskuld nie!

₆Ja, jy het sonder rede 'n pand

geneem van jou volksgenote,

die klere van halfnaaktes afgestroop.

₇Jy het geen water te drinke gegee

aan wie uitgeput was nie,

van wie honger was,

het jy brood weerhou.

₈Mense met mag,

vir hulle was grond beskikbaar,

dié met aansien,

hulle kon daarop woon.

₉Weduwees het jy met leë hande weggestuur,

die hande van vaderlose kinders is afgekap.

₁₀Daarom is daar valstrikke rondom jou,

en oorweldig vrees jou onverwags.

₁₁Of sien jy nie die duisternis,

die watervloed wat jou bedek nie?

₁₂“Is God nie in die hoë hemel nie?

Kyk maar net na die hoogste sterre,

ja, kyk hoe hoog is hulle!

₁₃Maar jy sê,

‘Wat weet God?

Kan Hy deur diepe duisternis

'n oordeel vel?

₁₄Wolke omhul Hom;

Hy sien nie terwyl Hy bo

die hemelkoepel rondwandel nie.’

₁₅Wil jy by die oeroue pad hou

wat bose mense oopgetrap het,

₁₆hulle wat voor hulle tyd

weggeruk word,

hulle wie se fondament

deur 'n rivier weggevoer word,

₁₇hulle wat vir God gesê het,

‘Bly van ons af weg!’

en,

‘Wat kan die Almagtige

aan ons doen?’

₁₈en dit terwyl Hy die Een is

wat hulle huise gevul het met die goeie?

Maar die planne van goddeloses

is ver van my.

₁₉Regverdiges sien dit en is bly.

Onskuldiges dryf die spot met hulle,

₂₀‘Voorwaar, ons teenstanders is uitgewis,

en wat van hulle oor was,

is deur vuur verteer.’

₂₁“As jy jou maar met Hom versoen,

sal jy daardeur vrede hê;

dan sal die goeie weer na jou toe kom.

₂₂Aanvaar tog die onderrig uit sy mond,

en hou sy woorde in jou hart.

₂₃As jy terugkeer na die Almagtige,

sal jy herbou word –

as jy onreg uit jou tent verwyder.

₂₄Gooi gouderts in die stof,

goud van Ofir tussen die rotse van die spruite.

₂₅Dan sal die Almagtige

jou gouderts en uitgesoekte

silwer vir jou wees.

₂₆Ja, dan sal jy jou vreugde vind

by die Almagtige,

en jou gesig na God ophef.

₂₇Jy sal by Hom pleit

en Hy sal jou verhoor;

jou beloftes sal jy betaal.

₂₈Jy sal oor 'n saak besluit,

en dit sal vir jou vervul word;

oor jou paaie sal 'n lig skyn.

₂₉Wanneer mense iemand verneder,

sal jy sê,

‘Dit is hoogmoed!’

Wie neergeslane oë het, verlos Hy.

₃₀Hy bevry selfs iemand

wat nie onskuldig is nie,

iemand wat sal ontkom

omdat jou hande skoon is.”