Jesaja 41

₁“Luister in stilte na My, eilande!

Laat die volke nuwe krag kry;

laat hulle na vore tree,

dan kan hulle die woord voer.

Laat ons saam nader kom

vir die regsgeding.

₂Wie het hom uit die ooste opgewek,

hy op wie oorwinning wag

met elke tree wat hy gee?

Hy laat nasies voor hom verskyn,

en konings onderwerp hy.

Hy maak hulle

soos stof met sy swaard,

soos strooi wat wegwaai met sy boog.

₃Hy agtervolg hulle,

hy trek ongedeerd verby;

hy raak nie met sy voet

aan 'n pad nie.

₄Wie het dit bewerk en uitgevoer,

terwyl Hy van die begin af

die geslagte roep?

Ek, die Here, was die eerste,

en by die laaste geslagte

sal Ek steeds daar wees.

₅“Die eilande het dit gesien

en is bevrees,

die eindes van die aarde beef.

Hulle het nader gekom,

hulle het aangekom;

₆hulle help mekaar.

Die een sê vir die ander,

‘Hou moed!’

₇Die vakman bemoedig die smid;

die een wat met 'n hamer

die uitklopwerk doen,

bemoedig die een

wat op 'n aambeeld slaan.

Hy sê van die smeewerk,

‘Dit is goed!’

Hulle slaan die beeld

met spykers vas,

sodat dit nie omkantel nie.

₈“Maar jy, Israel, my dienskneg,

Jakob, wat Ek uitgekies het,

nakomeling van Abraham,

my vriend,

₉jy, die een wat Ek gegryp het

van die eindes van die aarde af,

wat Ek van sy verste dele af

geroep het,

vir jou het Ek gesê,

‘Jy is my dienskneg!’

Ek het jou uitgekies,

jou nie verwerp nie.

₁₀Moenie bang wees nie,

want Ek is by jou;

moenie vrees nie,

want Ek is jou God.

Ek versterk jou;

ook help Ek en ondersteun Ek jou

met my seëvierende regterhand.

₁₁Kyk, hulle sal beskaamd staan

en verneder word –

almal wat vir jou kwaad is.

Hulle sal soos niks wees

en tot niet gaan,

daardie manne wat teen jou

'n regstryd voer.

₁₂Jy sal hulle soek,

maar hulle nie vind nie,

daardie manne wat teen jou

stryd voer.

Hulle sal soos niks,

soos iets niksseggends wees,

daardie manne wat teen jou

oorlog voer.

₁₃Want Ek, die Here jou God,

gryp jou regterhand vas,

Ek wat vir jou sê,

‘Moenie bang wees nie –

Ek is die Een wat jou help.’

₁₄Moenie bang wees nie,

wurm Jakob,

mense van Israel,

Ek is die Een wat jou help!”

is die uitspraak van die Here.

“Jou losser

is die Heilige van Israel.

₁₅Kyk, Ek maak jou

'n skerp nuwe dorsslee,

een met dubbele rye tande.

Jy sal berge dors en fynmaal,

en heuwels sal jy soos kaf maak.

₁₆Jy sal hulle uitwan;

die wind sal hulle wegdra;

'n stormwind sal hulle

uitmekaar waai.

Maar jy sal juig oor die Here,

oor die Heilige van Israel sal jy roem.

₁₇“Die magteloses en behoeftiges

soek water,

maar daar is niks;

hulle tonge verdroog van dors.

Ek, die Here, sal hulle verhoor;

Ek, die God van Israel,

Ek sal hulle nie verlaat nie.

₁₈Op kaal hoogtes

laat Ek riviere ontspring,

fonteine in die middel van valleie.

Van 'n woestyn maak Ek

'n waterryke vleiland,

van 'n dor land waterbronne.

₁₉Ek laat in die woestyn seders,

doringbome, mirtebome

en wilde-olyfhoutbome opskiet;

Ek plant in woestynvlaktes sipresse,

en daarmee saam

wildevlierbome en dennebome,

₂₀sodat mense kan sien en erken,

dit ter harte neem,

en tegelykertyd begryp

dat die hand van die Here

dit gedoen het,

dat die Heilige van Israel

dit geskep het.

₂₁“Lê julle regsaak voor,”

sê die Here.

“Bring julle bewyse!”

sê die Koning van Jakob.

₂₂“Laat hulle dit bring

en ons inlig oor wat gebeur:

Die vroeëre gebeure – wat was dit?

Lig ons in, sodat ons

dit ter harte kan neem,

sodat ons kan weet

wat die afloop daarvan was;

of, die komende gebeure –

laat ons hoor wat dit sal wees!

₂₃Lig ons in oor wat later kom,

sodat ons kan weet

dat julle gode is.

Ja, doen iets goeds of slegs,

sodat ons bevrees,

ja, almal saam bang kan word.

₂₄Kyk, julle is minder as niks,

en julle dade is minder werd

as iets waardeloos!

Afstootlik is hy wat vir julle kies.

₂₅“Ek het hom uit die noorde

opgewek, en hy het gekom.

Van waar die son opkom,

sal hy my Naam aanroep.

Hy vertrap landvoogde

soos kleigrond,

soos 'n pottebakker die klei trap.

₂₆Wie het dit van die begin af

aangekondig,

sodat ons kon kennis neem,

vantevore al, sodat ons kon sê,

‘Hy was reg!’?

Daar is niemand wat dit

aankondig nie,

niemand wat iets laat hoor nie,

ja, niemand wat julle woorde

hoor nie.

₂₇Ek was die eerste

om aan Sion te sê,

‘Kyk, hier is hulle wat dit

verkondig het!’

Aan Jerusalem gee Ek

'n boodskapper van vreugde.

₂₈Ek kyk rond,

maar daar is niemand nie;

onder hulle is daar nie een

wat kan raad gee nie.

Ek vra hulle,

maar hulle antwoord nie.

₂₉Kyk, hulle almal is niks;

hulle dade is niksseggend.

Wind en leegheid

is hulle gegote beelde.