Wie is hierdie Man? – Dag 7

Dit is wonderlik dat God sy mag en heerlikheid afgelê het en ʼn plek onder die mense ingeneem het. Uit ervaring het God geweet hoe stug en onbelangstellend mense is en dat hulle nie in Hom sou glo nie. Dit was ʼn gewaagde stap van God om die risiko te loop om na ʼn planeet te kom wat bekend is vir sy terrorisme en mafiabedrywighede en by mense te gaan woon wat bekend was dat hulle profete vermoor en verwerp. God het soveel geloofswerkers (profete) al gestuur en hulle is almal vermoor. Toe sê God: “Ek stuur my geliefde Seun. Hulle sal Hom ontsien.” Hulle sal Hom ontsien?

Eeue lank is die koms van die groot Verlosser aangekondig. Toe is Hy hier. Dit het alles begin met die geboorte van ʼn kind. God het die daad by sy woord gesit en gedoen wat Hy voorspel het. God het nie in die hemel gebly nie, maar Hy het aarde toe gekom. Die Woord het vlees geword. Die voorspelling het waar geword.

God het eers die wet op Sinai gegee, toe rigters aangestel, toe konings laat heers en later profete. Hulle het almal gesê: “Gaan terug na God.” Maar dit het nie gewerk nie. Die mense het bly wegloop van God en hulle van God vervreem.

Toe kom D-Dag. God self land op aarde. As niks dan help nie, sal Ek dit self doen. Ek sal julle kom terughaal en tuis bring. Ek sal vir eens en vir altyd vir julle laat sien hoe volmaak liefdevol en regverdig Ek is.

Met die geboorte van Jesus volg God ʼn nuwe benadering. Nie meer ʼn afstand tussen God en mens nie — ʼn kloof nie — nie meer mense namens God nie, maar God kom self.