Wie is hierdie Man? – Dag 18

Worstel jy ook soms met jou karakter? Ek het ook slegte kante waarmee ek behoorlik worstel. So het elke mens karaktereienskappe waarmee jy worstel of waaroor jy deur ander gekonfronteer word. Mense waardeer jou oor sommige persoonlike eienskappe en oor ander veroordeel hulle jou. “Moet tog nie so bot wees nie.” “Wat is jy vandag weer so iesegrimmig?” Ons is maar hard op mekaar, het min geduld en is geneig om net die negatiewe te sien. ʼn Mens het maar min ruimte om te wees wie jy is, met jou goeie en slegte kante.

Miskien is Jesus se karakter wel die indrukwekkendste aspek van Hom. Ons lê altyd nadruk op wat Hy gedoen het, maar sien ons ook wie Hy is? Wat sy karakter betref, was Jesus maar ʼn vreemde eend op die dam. Jesus self is meer geïnteresseerd in wie jy is as wat jy doen. Die bergrede lê veral klem op wie jy is. Ons lees daar oor sagmoedigheid, geduld en mense wat vrede najaag. God wil jou hart hê. God soek egtheid. Die bergrede het ʼn hekel aan skynheiligheid. Mooi woorde, gereeld na die kerk gaan en uiterlik ordentlik, maar intussen … Dit gaan vir God om jou motiewe. Waarom jy doen wat jy doen.

In Jesus sien ons ʼn egte en mooi karakter. Sy karakter is seldsaam en daarom die moeite werd om te ondersoek. Vir die Skrifgeleerdes wat so baie van hulleself gedink en op die hoeke van die strate gestaan en bid het, het Jesus gesê: “Wees tog net normaal. Bid by jou huis in die kamer. Los jou hoogmoed.”

Niemand was vir Jesus onbelangrik nie. Jesus het geleer dat dit by God nie saak maak of jy die direkteur of die skoonmaker is nie. By die kruis val alle verskille weg. Elkeen het Jesus Christus en sy vergewing nodig.