Vriendskap – dag 21

In die vorige dagstukkies het ons baie geleer van verskillende vriende in die Bybel en hoe hulle in verskillende situasies gereageer het. Hier leer ons van Jesus self oor vriendskap en Hy draai nie doekies om nie. Wees lief vir mekaar. Wees selfs bereid om vir mekaar te sterf indien nodig.
Vriendskap gaan oor opoffering. Dit gaan oor die ander persoon, nie oor jouself nie. Jesus is die volmaakte voorbeeld: Om ʼn vriend te wees beteken om alles te gee sonder om iets terug te verwag. Soms is dit makliker gesê as gedaan, veral as ons baie omgee vir die persoon vir wie ons die opoffering moet maak. Maar Jesus het nie gesê dat dit maklik is om Hom te volg nie, of hoe?
Hoe naby aan Jesus se voorbeeld is jou vriendskap? Wat verhoed jou om iemand anders se behoeftes bo jou eie te stel? Wat kan jy vandag doen om uit te reik na iemand in jou onmiddellike kring? Jou klein gebaar beteken dalk die wêreld vir iemand anders.
Vier jou vriendskappe en sluit nuwes. Hernieu en versterk jou bande met ou vriende, want soos ons ouer word verander hierdie verhoudings dikwels. Verbreed jou netwerk, reik uit na mense wat jy nie goed ken nie. Daar is altyd iemand wat dit wat jy kan gee, nodig het.