Volhard in Jesus Christus – Dag 15
God laat alles ten goede meewerk
Bybelteks(te)
ROMEINE 8
GENESIS 37
GENESIS 50
Die lewe is nie altyd maklik nie. Soms gebeur dinge wat ons seermaak of ons laat swaarkry. ʼn Ernstige ongeluk, siekte, afdankings, emosionele verraad – hierdie is alles slegte goed wat gereeld met mense gebeur.
In sulke tye is dit normaal om vir God te vra: “Waarom gebeur dit met my, Here?”
Josef het seker ook hierdie vraag gevra. Hy is deur sy broers afgeknou, hulle het sy kleed gevat, hom in die put gegooi, en hy is as ʼn slaaf aan Potifar – die hoof van die farao se lyfwag – verkoop (Genesis 37:23-28). Waar was God tydens hierdie gebeure?
Josef het baie goed gedoen in diens van sy eienaar, maar sy probleme was nog lank nie verby nie. Alhoewel hy heeltemal onskuldig was, is hy vals beskuldig dat hy probeer het om Potifar se vrou te verkrag en hy is in die tronk gegooi.
Dit was eers jare later dat Josef besef het dat God die kwaad wat hom aangedoen is ten goede laat meewerk het sodat die lewens van baie mense gered kon word (Genesis 50:20).
Naas Josef is Moses, Jesaja en Esegiël ook voorbeelde van mense in die Bybel wat baie swaargekry het, maar die Here wou daarmee goed doen. Hy wou hierdie swaarkry ten goede laat meewerk.
Hy werk ook in ons lewens want Hy het ʼn wonderlike plan en doel met elkeen van ons. Soms kan ons egter dit wat met ons gebeur glad nie verstaan nie – en ook nie waarom dit gebeur nie.
Dan is dit juis nodig dat ons meer as ooit op Hom moet vertrou, met die volle wete dat sy liefde en krag ons sal dra totdat ons uiteindelik in sy heerlikheid sal deel.
