Volhard in Jesus Christus – Dag 14

Toe wyle Hansie Cronjé, oud-kaptein van die Suid-Afrikaanse krieketspan, betrokke was by ʼn groot skandaal oor wedstrydknoeiery het hy sy aandeel daaraan beken. Baie mense het hom uitgelag en bespot oor sy verskoning dat die duiwel hom dit laat doen het.

Die reaksie van mense moes vir Satan seker baie gelukkig gemaak het. Hoe meer daar gespot word met diegene wat glo dat Satan bestaan en aktief besig is in die lewens van mense, hoe beter vir hom. Hy kan voortgaan met sy goddelose aktiwiteite om mense in versoeking te lei om teen God te rebelleer.

Die Bybel openbaar hom as die grootste vyand van God en mens. In Efesiërs 2:2 word daar na hom verwys as “die vors van die onsigbare magte, die gees wat daar nou aan die werk is in die mense wat aan God ongehoorsaam is.”

Dit is ʼn fout om sy bestaan te ignoreer en ʼn selfs groter fout om die impak en invloed te onderskat wat hy op die lewens van diegene wat jy liefhet kan hê.

Jesus was goed voorberei vir sy ontmoeting met die duiwel (Matteus 4:1-11). Dit was net na sy doop toe die Heilige Gees Jesus die woestyn ingelei het waar Hy vir veertig dae en nagte gevas het.

Daar het die duiwel vir honger Jesus versoek om die klippe in brood te verander en hy het selfs al die koninkryke van die wêreld vir Hom aangebied indien Hy sou neerval en hom aanbid. Die Bybel vertel ons dat die engele gekom en vir Jesus versorg het nadat Hy die duiwel verwerp het.

Satan kom dikwels met sy versoekings na ons in die tye wat ons weerstand op die laagste is. Satan kan ons emosioneel teister en mishandel, maar ons kan weerstand bied want ons vyand is reeds verslaan. Sy krag en heerskappy oor gelowiges is reeds aan die kruis verbreek (Johannes 12:31).

“Onderwerp julle dan aan God. Staan die duiwel teë en hy sal van julle af wegvlug” (Jakobus 4:7).