Die krag van gelykenisse – 31 Maart 2022

Jesus was ‘n bobaas storieverteller, en Hy het dikwels mense deur gelykenisse geleer onder andere om die vals aantygings wat sy vyande teen Hom kon gebruik, te verhoed. Hulle het probeer om maniere te kry om Hom op grond van sy bewering dat Hy die Seun van God is, wat Hy is, te arresteer en te laat doodmaak. Daarom het Hy sekere dinge weggesteek totdat die regte tyd aangebreek het. (Lees: Lukas 9:21-22)

Jesus het ook gelykenisse gebruik om die waarheid op so ‘n manier te verduidelik dat dit moeilik is om te vergeet as ‘n mense dit eers verstaan. Sy gelykenisse plaas prentjies in ons gedagtes wat tot ‘n beter begrip van die koninkryk lei – en wat ons aanmoedig om uit te vind hoe ons soos kinders van God kan leef.

Die gelykenis van die saaier dwing ‘n mens om na die toestand van jou eie hart te kyk. Alhoewel ons graag aan onsself as goeie grond wil dink, weet die meeste van ons dat die gejaagdheid van die lewe, sowel as die uitdagings wat hartseer en angs bring, ons kan vasvang en van ons geloof beroof.

Tog verseker Jesus ons van die volgende wonderlike waarheid: goeie grond bestaan wel. Dit is asof Hy so ‘n akker goeie grond tussen die rotse en onkruid van hierdie wêreld aan ons uitwys. Jesus se uitdaging kan ook ‘n woord van bemoediging wees wanneer ons die verhaal van verlossing in Christus hoor en daarop reageer. In onverwagte plekke kan God ‘n groot oes van geregtigheid laat groei. Mag al ons harte wees soos die goeie grond, gereed en gewillig om te antwoord op God se Woord.

Gebed: Here, u gelykenisse is dikwels ‘n wekroep vir ons. Lei ons gedagtes en optredes elke dag sodat ons deur u Woord en tot u eer die bes moontlike lewe kan leef. Amen