Twee en twintig mense in die Bybel met meer geduld as ons: Rut - 21 Augustus 2023
Deur Xanthe Hancox
Bybelteks(te)
Rut se reis begin met ‘n groot verlies – sy word ‘n weduwee. Instede van om na haar ouerhuis terug te keer, kies Rut om by haar skoonma, Naomi, te bly. Hierdie keuse van Rut is ‘n bewys van haar lojaliteit en toewyding en dit het die weg gebaan vir die vervulling van God se plan.
Soos die verhaal ontvou, sien ons hoe Rut se geduldige gees haar lei. Boas, ‘n familielid van Naomi, het die sleutel tot Rut se toekoms in sy hande gehou. Naomi se wyse raad lei Rut tot ‘n oomblik van geduldige afwagting. In Rut 3:4 lees ons dat sy bereid was om geduldig vir die regte oomblik te wag voordat sy Boas nader. Hierdie was nie net bloot ‘n romantiese daad nie, maar ‘n bewys van haar vertroue dat God sal voorsien.
Rut se verhaal is ‘n bewys dat geduld nie passief is nie; dit is ‘n aktiewe uitdrukking van geloof. Rut het nie net op haar louere gerus nie, sy het stappe, geanker in geloof, geneem om God se leiding te volg. Haar geduldige agtervolging van Boas is gekenmerk deur ‘n onwrikbare geloof dat God elke detail in haar lewe laat gebeur vir ‘n doel ver bo haar verwagtinge.
Rut se geduld en lojaliteit is beloon toe Boas haar gevra het om met hom te trou. Haar lewe wat vooheen deur hartseer en onsekerheid gekenmerk is, is deur God se voorsienigheid en haar vaste geloof verander.
Soos Rut, beleef ons ook soms tye van wag, verlange en ‘n soeke na God se leiding. In sulke tye kan ons weet dat God se tydsberekening onberispelik is en dat, selfs wanneer ons nie die volledige prentjie kan sien nie, Hy aan die werk is. Terwyl ons die lewe se kinkels beleef, moet Rut se geduldige gees ons opnuut laat besef dat ons aktief moet wag, God se leiding moet vertrou en oop moet wees vir die onverwagte seëninge wat sy tydsberekening bring.
Gebed: Hemelse Vader, leer ons om met ‘n vaste geloof aktief te wag. Gee dat ons met ‘n geduldige gees en met vertroue u leiding sal soek. Soos Rut se verhaal van u getrouheid vertel, gee dat ons lewensverhale ook van u goedheid sal getuig. In Jesus se Naam. Amen
