‘n Vrugbare lewe! – 12 April 2023

Een van die groot vrae wat die dissipels vir Jesus gevra het, was wat God van ons wil hê. Een van die mooi antwoorde sien ons in vers 8 – ons is geroep om baie vrug te dra, wat God sal verheerlik. Dit gebeur wanneer ons dissipels is, mense wat Jesus volg waar Hy ons lei. Dissipels is mense wat hulle hele lewe daaraan wy om Jesus in alle opsigte te volg. Hy is Here oor elke stukkie van ons lewe, en in alles wat ons doen, wil ons Hom graag eer.

In vers 5 sien ons die geheim – ons is juis gemaak om in Jesus te bly. Ons plaas ons vertroue in hierdie lewe in Hom. Hy is ons Here en ons Verlosser. Hy stel ons in staat om die vrug te dra. Mense wat nie in Hom glo nie, kan nie die vrug dra wat God verlang nie.

Om vrug te dra, moet ons in Jesus bly. Ons moet ons geloof in Hom stel. Ons gaan nie uit ons eie vrug dra nie. Die Here verwag dit ook nie van ons nie. Daarom is een van die kragtigste hulpbronne wat Hy ons gegee het, die voorreg om te mag bid. Wanneer ons saam met Hom ons lewenspad stap, en sy woorde toelaat om ons lewe te vorm, kom die uitnodiging: Het jy iets nodig om vrug te dra? Bid! Vra dit van die Here, want Hy wil dit graag vir jou gee!

Vers 7 word so maklik misbruik as dit om ons eie belange gaan. Die Here gee ons nie ‘n blanko tjek om net te vra wat ons eie hart begeer nie. Daar is ‘n voorwaarde, en ‘n gevolg. Die voorwaarde: bly in My, volg my Woord. Die gevolg: omdat jy my wil soek, sal jy ontvang wat jy nodig het.

Die Here wil ons so graag help om vrugbare lewens tot sy eer te lewe. Jesus het dit ook in die Bergrede gesê, in Matteus 6:33 “Maar soek eers die koninkryk van God en sy geregtigheid, en al hierdie dinge sal vir julle bygevoeg word.” Die Here weet wat ons nodig het, nog voordat ons vra. Hy voorsien, sodat ons vrugbaar kan lewe tot sy eer.

Gebed: Here Jesus, in U is die lewe. Help my om in U te bly, sodat ek waarlik kan lewe en vrug dra tot u eer. Ek wil ‘n getroue dissipel wees, wat in u voetspore volg waar U my lei. Amen